تاجىكستاننىڭ دۋستي اۋدانىنداعى جەرگىلىكتى يمام-حاتيبەرگە ساقال قويۋعا رۇقسات بەرىلدى، تالابى – ۇزىندىعى 3 سانتيمەتردەن اسپاۋ كەرەك، دەپ جازادى Qamshy.kz اقپارات اگەنتتىگى.

بۇل تۋرالى اۋداندىق حاتيبيا باسشىسى سالوحيددين رادجابزودا جۋرناليستەرمەن اڭگىمەسى بارىسىندا مالىمدەدى. شەنەۋنىكتىڭ ايتۋىنشا، 3 سانتيمەترلى ساقال تاجىكتەردىڭ مادەنيەتى مەن دىنىنە سايكەس كەلەدى.

دۋستي اۋدانىنداعى ورتالىق مەشىتتىڭ يمام-حاتيبى ناسرۋللو فايزۋللويەۆ بيلىك ورگاندارىنىڭ مالىمدەمەسىنە ءبىرىنشى بولىپ پىكىر ءبىلدىردى. جەرگىلىكتى راديو وزودي پورتالىمەن سۇحباتىندا حانافيت مازحابى ءىزباسارلارىنىڭ ساقالىنىڭ ۇزىندىعى جۇدىرىقتان اسپاۋ كەرەك ەكەنىن ايتتى. ساقال قويۋدىڭ مۇنداي ەرەجەسى 2012 جىلدىڭ قاراشاسىندا تاجىكستاندا وتكەن ۋلەم كەڭەسىندە بەكىتىلگەن.

تاجىكستاندا 2014 جىلدان باستاپ مەملەكەتتىك قىزمەتكەرلەرمەن قاتار مەشىتتەردىڭ يمام-حاتيبتەرى دە جالاقى الادى. ەلدەگى يمام-حاتيبەتردىڭ سانى – 265. وزگە دە ءدىن مۇشەلەرى مەن كونفەسسيا وكىلدەرىنە جالاقى بەرىلمەيدى.

2009 جىلى تاجىكستاندا ۇستازدىق قىزمەتتەگى 50 جاستان اسقان ەر ادامدارعا ساقال قويۋعا رۇقسات ەتىلگەن. ۇزىندىعى 3 سانتيمەتردەن اسپاۋ كەرەك دەگەن تالاپ بولدى.

ال 2 جىل بۇرىن ەلدە ساقالدىلارعا قارسى نارازىلىق ناۋقانى باستالدى. ميليسيا قىزمەتكەرلەرى ساقال ءوسىرىپ العان جۇزدەگەن ەر ادامدى ۇستاعان. تەرگەۋ جۇمىستارىنان سوڭ كۇش قولدانۋ ارقىلى ساقالدارىن قىرعىزعان.

تاجىكستان ءىىم اتالمىش ناۋقانعا قاتىسى بار-جوعىن جاسىرىپ قالعان. 2015 جىلدىڭ كوكتەمىندە قۇقىق قورعاۋ ورگاندارى ازاماتتاردىڭ ساقالىن كۇشتەپ قىرعىزعان ەكى ميليسيا قىزمەتكەرىنىڭ ۇستالعانىن حابارلاعان.

ساراپشىلاردىڭ پىكىرىنشە،  تاجىك بيلىگىنىڭ ساقال قوويۋعا تىيىم سالۋى راديكاليزممەن كۇرەس اياسىندا جۇرگىزىلگەن.