الماتىدا ءبىقاتار كادرلىق تاعايىنداۋ بولدى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
قازاقستان رەسپۋبليكاسى پرەزيدەنتىنىڭ كادر ساياساتى جونىندەگى ۇلتتىق كوميسسياسىنىڭ ۇسىنىسى جانە مەملەكەتتىك قىزمەت ىستەرى مەن سىبايلاس جەمقورلىققا قارسى ءىس-قيمىل اگەنتتىگىنىڭ كەلىسىمى بويىنشا الماتىدا ءبىرقاتار كادرلىق تاعايىنداۋلار بولدى.
الاتاۋ اۋدانىنىڭ اكىمى باعدات مانزوروۆ الماتى قالاسى مەملەكەتتىك ساۋلەت- قۇرىلىس باقىلاۋ باسقارماسىنىڭ باسشىسى، ال جەتىسۋ اۋدانىنىڭ اكىمى تالعات رازاقوۆ الماتى قالاسى مەملەكەتتىك ەڭبەك ينسپەكسياسى جانە كوشى-قون باسقارماسىنىڭ باسشىسى بولىپ تاعايىندالدى.
الاتاۋ اۋدانىنىڭ اكىمى - باعدات مانزوروۆ
جەتىسۋ اۋدانىنىڭ اكىمى - تالعات رازاقوۆ
الماتى اكىمى مەملەكەتتىك ساۋلەت- قۇرىلىس باقىلاۋ باسقارماسى جاڭا باسشىسىنىڭ الدىنا ءپرينسيپتى جانە جۇيەلى ءىستى تالاپ ەتەتىن ءبىرقاتار مىندەتتەردى قويدى.
ياعني، قالادا سالىنىپ جاتقان بارلىق نىساندارعا جۇيەلى باقىلاۋ جۇرگىزىلۋى ءتيىس. وسى جىلدار ىشىندە كوپتەگەن تۇرعىن كەشەندەرىنىڭ، كوممەرسيالىق نىسانداردىڭ ءبىرقاتارى زاڭسىز سالىنعان. الماتى اكىمى قۇرىلىس جۇرگىزۋگە ليسەنزيا بەرۋ ءىسىن رەتتەۋدى تاپسىردى. ويتكەنى،ليسەنزيا العان كەيبىر جاۋاپكەرشىلىگى تومەن قۇرىلىسشىلار ساپاسىز نىسان سالادى، سونىڭ سالدارىنان تۇرعىنداردان كوپ شاعىم تۇسەدى.
الماتى اكىمى مەملەكەتتىك ەڭبەك ينسپەكسياسى جانە كوشى-قون باسقارماسى جاڭا باسشىسى الدىنا دا جاڭا مىندەتتەر قويدى، باسقارما جۇمىسىن تۇبەگەيلى وزگەرتۋدى، ساراپتاما جاساۋعا باستى نازار اۋدارۋدى، ناقتىلى ماسەلەلەردى جۇيەلى شەشۋدى تاپسىردى.
جالاقى تولەۋدەگى قارىز ماسەلەسىن ناقتىلى شەشىپ، جۇمىستى وڭتايلاندىرۋ قاجەت ەكەنىن اتاپ ءوتتى. ەڭبەكاقى بويىنشا قارىز بولىپ قالماۋدىڭ ءتيىمدى جولدارىن ىزدەستىرۋ كەرەكتىگىن ايتتى. زەينەتاقى ءتولۋ ورتالىعىمەن، سالىق جونىندەگى مەملەكەتتىك كىرىس دەپارتامەنتىمەن بىرىگىپ جۇمىس ىستەۋ كەرەكتىگىن ناقتىلادى. قازىرگى كەزدە مەملەكەتتىك ەڭبەك ينسپەكسياسى تەك شاعىم تۇسكەن كەزدە قيمىلدايدى، مۇنداي نەمقۇرايدىلىققا جول بەرىلمەۋى ءتيىس ەكەنىن جەتكىزدى.
الماتى اكىمى جاڭا باسشىنىنىڭ نازارىن كولەڭكەلى ەكونوميكا ماسەلەلەرىن شەشۋگە، سونىڭ ىشىندە كولەڭكەلى جۇمىس كۇشىنىڭ زاڭسىزدىعىنا، قۇرىلىستا ءقاۋىپسىز ەڭبەكتى قامتاماسىز ەتۋگە اۋداردى. زەينەتاقى قورىنا قارجى اۋدارماي، سالىق تولەمەي، كونۆەرتپەن جالاقى الاتىنداربار ەكەنى، كاسىپورىنداردا كوپتەگەن قايعىلى جايتتاردىڭ ورىن الاتىندىعى جاسىرىن ەمەس. مىنە، وسى كەلەڭسىز جايتتاردىڭ بارلىعىنا توسقاۋىل قويىلۋى ءتيىس.
سونداي-اق، اكىمدىكتەگىلەر الاتاۋ اۋدانىنىڭ 9 جىل ىشىندە جەدەل قارقىنمەن دامىعانىن ايتىپ ءوتتى. "مۇندا 4 جاڭا ەمحانا، 9 مەكتەپ، 12 مەملەكەتتىك بالا باقشا، اتلەتتەر اۋىلى، "الماتى ارەنا" سالىندى. "العاباس-6"، "نۇركەنت"، "اقكەنت" ىقشام اۋداندارىندا تۇرعىن كەشەندەرىنىڭ قۇرىلىسى جالعاسۋدا. 9 جىل ىشىندە اۋداندا ءوندىرىس ءونىمى 12 ،3 ەسە، ينۆەستيسيا 32 ەسە ءوستى. سالىق ءتۇسىمى 3 ەسە ارتىپ، 22،5 ميلليارد تەڭگەنى قۇرادى. ال جەتىسۋ اۋدانىندا سوڭعى 4 جىل ىشىندە سالىق ءتۇسىمى 21 پايىزعا ارتتى، ءوندىرىس ءونىمى 30 ميلليارد تەڭگەگە (22 پايىز) جەتتى، نەگىزى كاپيتال ينۆەستيسياسى ەكى ەسە ءوستى، 14 جەكە بالا باقشالار مەن 11 مينيورتالىقتار اشىلدى"، - دەپ حابارلادى اكىمدىكتىڭ باسپا ءسوز قىزمەتىندەگىلەر.
پىكىر قالدىرۋ