ءقازىر شەت ەلدەن كەلەتىن ەتنيكالىق قازاقتاردان سوتتالماعانى تۋرالى انىقتامانى تالاپ ەتپەۋ ماسەلەسى قارالىپ جاتىر، دەپ حابارلايدى Qamshy.kz اقپارات اگەنتتىگى 24.kz-كە  سىلتەمە جاساي وتىرىپ.

بۇل ەلباسىنىڭ تىكەلەي تاپسىرماسى. مەملەكەت باسشىسى دۇنيەجۇزى قازاقتارىنىڭ 5-قۇرىلتايىندا ايتقان قۇزىرەتتى ورگاندارعا وسىنداي مىندەت جۇكتەگەن ەدى. اسىرەسە، بۇل جۇڭگو حالىق رەسپۋبليكاسىنان اتامەكەنىنە ورالىپ جاتقان قانداستارىمىزعا قاتىستى ايتىلعان بولاتىن. سەبەبى جۇڭگو ەلىنىڭ زاڭىندا سوتتالماعان دەگەن انىقتاما بەرىلمەيدى. ال سوتتالعان ازاماتقا شەكارادان شىعۋعا تىيىم سالىنعان.

«جۇڭگو حالىق رەسپۋبليكاسىنان كەلگەن ەتنيكالىق قازاقتاردان، سول ەلدىڭ ازاماتى بولىپ تابىلاتىن قازاقتاردان وسى سوتتىلىعىنىڭ بار-جوعى تۋرالى انىقتامانى تالاپ ەتپەۋ جونىندە ءىس-شارالار جۇرگىزىلىپ جاتىر. بۇل جونىندە قانداي قۇقىقتىق، قانداي نورماتيۆتىك قۇقىقتىق زاڭنامالارعا، اكتىلەرگە وزگەرىستەر ەنگىزۋگە بولاتىندىعى تۋرالى ساراپتامالار جۇرگىزىلۋدە. بۇگىنگى كۇنى مەملەكەتتىك ورگاندارعا كەلىسۋگە جوبالار جىبەرىلدى»، - دەدى ق ر ءىىم كوشى-قون قىزمەتى كوميتەتىنىڭ اعا ينسپەكتورى گۇلميرا ءاليايدار قىزى.