شىمكەنتتەگى 300-دەن استام كوشەگە تاريحي اتاۋلار بەرىلمەك. قالاداعى اباي، ءال-فارابي، ەڭبەكشى جانە قاراتاۋ اۋداندارىنداعى جاڭا كوشەلەرگە اتاۋ بەرۋ جونىندەگى ۇسىنىستى قازاقستان رەسپۋبليكاسى ۇكىمەتى جانىنداعى ونوماستيكا كوميسسياسى قولدادى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.

«اكىمشىلىك-اۋماقتىق بىرلىكتەرگە، ەلدى مەكەندەردىڭ قۇرامداس بولىكتەرىنە اتاۋ بەرۋ، قايتا اتاۋ، سونداي-اق، ولاردىڭ اتاۋلارىنىڭ ترانسكريپسياسىن ناقتىلاۋ مەن وزگەرتۋ كەزىندە ءتيىستى اۋماق حالقىنىڭ پىكىرىن ەسكەرۋ قاعيداسىنىڭ» تالاپتارىنا سايكەس، بۇگىندە ءتۇسىندىرۋ جۇمىستارى جۇرگىزىلىپ، كوشە تۇرعىندارىنىڭ كەلىسىمى الىنعان. الداعى ۋاقىتتا اتالعان ۇسىنىستار وبلىس اكىمدىگى جانىنداعى كاسىپكەرلىك ماسەلەلەرى جونىندەگى ساراپتامالىق كەڭەس پەن وبلىستىق قوعامدىق كەڭەستىڭ قاراۋىنا ەنگىزىلمەك. ءتيىستى كەلىسىمدەر الىنعاننان كەيىن وبلىستىق ءماسليحاتتىڭ كەزەكتى سەسسياسىنا ۇسىنىلادى.

ايتا كەتەيىك، بۇگىندە شىمكەنت قالاسىندا 2129 كوشە بار. سونىڭ ىشىندە يدەولوگيالىق تۇرعىدان ەسكىرگەن 39 جانە نومىرلەنگەن 79 كوشەنىڭ اتاۋىن ۇلتتىق تانىمعا جاقىن ءداستۇرلى اتاۋلارمەن وزگەرتۋ باعىتىندا جەرگىلىكتى اكىمدىك جۇيەلى جۇمىستار اتقارىپ كەلەدى.