ق ر پرەزيدەنتى ن. نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىنا سايكەس تۋريستىك الەۋەتتى دامىتۋ ەلىمىزدە ەكونوميكالىق ءوسىمنىڭ جاڭا مودەلىن قالىپتاستىرۋ كەزىندە ماڭىزدى باعىتتاردىڭ ءبىرى بولىپ تابىلادى. وسىعان وراي ۇكىمەت اتالعان سالادا كەشەندى جۇمىستار جۇرگىزىپ جاتىر.

باقىتجان ساعىنتايەۆ شاڭعى سپورتى بازاسىن ارالاۋ بارىسىندا قۇرىلىس عيماراتتارىمەن تانىسىپ، نىسانداعى قازىرگى جاعداي مەن جۇمىستاردى اياقتاۋدىڭ جوسپارداعى مەرزىمدەرى تۋرالى باياندامانى تىڭدادى. نىساننىڭ عيماراتتارى مەن قۇرىلىس كەشەنى 140،5 گا اۋماقتا ورنالاسقان. بۇگىنگى تاڭدا ونىڭ ازىرلىك دەڭگەيى - 90%-دان جوعارى. جاڭا رەسپۋبليكالىق شاڭعى سپورتى بازاسىندا شاڭعى جارىستارى، بياتلون، شاڭعى-روللەر سپورتى بويىنشا جاتتىعۋلار مەن حالىقارالىق جارىستار وتكىزۋ جوسپارلانعان دەپ حابارلايدى Qamshy.kz اقپارات اگەنتتىگى.  

وسىدان كەيىن ق ر پرەمەر-مينيسترى «بۋراباي» مەملەكەتتىك ۇلتتىق تابيعي پاركىنىڭ شيپاجايلىق-كۋرورتتىق نىساندارىمەن جانە كورىكتى جەرلەرىمەن تانىستى.

بۇدان وزگە، باقىتجان ساعىنتايەۆ 2017 جىلعى ساۋىر-شىلدە ارالىعىندا جۇرگىزىلگەن «ششۋچينسك - بۋراباي» اۆتوكولىك جولىنىڭ 16-18 شاقىرىم ۋچاسكەسىندەگى جوندەۋ جۇمىستارىنىڭ ناتيجەسىمەن تانىستى. وبلىس اكىمى مالىك مىرزالين جۇرگىزىلگەن رەكونسترۋكسيالاۋ جۇمىستارى تۋرالى جانە جالپى ءوڭىر جولدارىن جوندەۋ بويىنشا الداعى جوسپارلار تۋرالى ەسەپپەن تانىستىردى.

ايتا كەتكەن ءجون، ششبكا دامىتۋدىڭ نەگىزگى بازالىق قۇجاتى - حالىقارالىق ساراپشىلاردىڭ قاتىسۋىمەن ازىرلەنگەن بۋراباي كۋرورتتىق ايماعىن دامىتۋدىڭ 2020 جىلعا دەيىنگى جۇيەلىك جوسپارى. جوسپار ينۆەستيسيالاۋعا قولايلى 5 نەگىزگى ايماقتى دامىتۋدى قاراستىرادى. ولاردىڭ قاتارىندا شاباقتى كولىندەگى جاپپاي دەمالىس ايماعى، شورتاندى كولىندەگى پرەميۋم ساناتتاعى تۋريزم ايماعى، قاتاركول كولىندەگى بالالاردى ساۋىقتىرۋ ءتۋريزمى مەن ات سپورتى ورتالىعى، سارىبۇلاق ا. ەكو اۋىل، سونداي-اق جوكەي كولىندەگى كەمپينگ.