پەتروپاۆلداعى   مادەنيەت جانە دەمالىس ساياباعىندا مەملەكەت جانە قوعام قايراتكەرى، ۇلى وتان سوعىسىنىڭ ارداگەرى، سوسياليستىك ەڭبەك ەرى، سولتۇستىك قازاقستان وبلىسىنىڭ قۇرمەتتى ازاماتى  بايكەن ءاشىموۆتىڭ ەسكەرتكىش-مۇسىنىنىڭ اشىلۋىنا ارنالعان سالتاناتتى ءراسىم ءوتتى. بۇل  شارا بايكەن ءاشىم ۇلىنىڭ تۋعانىنا 100 جىل تولۋىنا وراي  ۇيىمداستىرىلدى دەپ حابارلايدى Qamshy.kz اقپارات اگەنتتىگى.

اتالمىش شاراعا  قوعام قايراتكەرلەرى،  شىعارماشىل زيالى قاۋىم،  ارداگەرلەر، مەرەيتوي يەسىنىڭ تۋىسقاندارى، سول سياقتى جەرگىلىكتى ۋنيۆەرسيتەت پەن كوللەدجدەردىڭ ستۋدەنتتەرى قاتىستى.  جينالعانداردى سولتۇستىك قازاقستان وبلىسىنىڭ اكىمى قۇمار اقساقالوۆ قۇتتىقتادى. ءوڭىر باسشىسى ۇلى تۇلعالاردىڭ  ەسىمىن ۇلىقتاۋ، تاريحي-مادەني نىساندار اشۋ، ەسكەرتكىشتەر ورناتۋ -  ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرۋدىڭ وزەكتى باعىتتارىنىڭ ءبىرى ەكەندىگىن اتاپ ايتتى.

«باعدارلامانى جۇزەگە اسىرۋ ءبىزدىڭ مەملەكەتىمىزدىڭ، حالقىمىزدىڭ تاريحىن تانۋعا،  ەل تاريحىندا ەشكىمگە ۇقسامايتىن بايكەن ءاشىموۆ سياقتى كەمەل تۇلعالاردىڭ  عالامات ءرولىن سەزىنۋگە جول اشادى. ۇلى وتان سوعىسى جىلدارىندا كورسەتكەن ەرلىگى مەن تاباندىلىعى ءۇشىن  «قىزىل جۇلدىز»، ەكى مارتە ءبىرىنشى دارەجەلى «وتان سوعىسى» وردەندەرىمەن، «ەرلىگى ءۇشىن» \مەدالىمەن، پولشانى ازات ەتكەنى ءۇشىن وردەنمەن ماراپاتتالدى. پارتيالىق كەڭەس جۇمىسىندا ول ءوزىن دانا ۇيىمداستىرۋشى جانە ساياساتكەر  رەتىندە ،كورسەتە ءبىلدى. ارينە، ول مينيسترلەر كابينەتىنىڭ ءتوراعاسى  لاۋازىمىندا قازاق  كسر-ىنىڭ دامۋىنا  باعا جەتپەس ۇلەس قوستى. مەملەكەت باسشىسى بايكەن ءاشىموۆتى «وتان» وردەنىمەن  ماراپاتتاي وتىرىپ، بايكەن ءاشىم ۇلىنىڭ ءومىرى ۇلى وتانىمىزعا قالتقىسىز قىزمەت ەتۋدىڭ جانە قاجىرلىلىقتىڭ  جارقىن ۇلگىسى ەكەندىگىن اتاپ ايتقان بولاتىن. بايكەن ءاشىموۆتىڭ ەسىمى ءبىزدىڭ جۇرەگىمىزدە ماڭگى ساقتالادى. ونىڭ ءومىرى وسكەلەڭ ۇرپاق ءۇشىن ۇلگى بولاتىندىعىنا سەنمدىمىن»،- دەدى  قۇمار اقساقالوۆ.

 داڭقتى جەرلەسىمىزدىڭ  مەرەيتويىنا وراي  سولتۇستىك قازاقستان وبلىسىندا  جاستاردىڭ، زيالى قاۋىم مەن ەتنومادەني بىرلەستىكتەر وكىلدەرنىڭ قاتىسۋىمەن  ءبىرقاتار شارالار وتەتىندىگىن اتاپ ايتۋ كەرەك.  سوعان وراي قىركۇيەك ايىندا وبلىس ورتالىعىندا  بايكەن ءاشىمىوۆتىڭ 100 جىلدىعىنا بايلانىستى  وڭىرلىك جاستار فورۋمىن وتكىزۋ جوسپارلانعان.

سول سياقتى سالتاناتتى شارا بارىسىندا  باكەن ءاشىموۆتىڭ ۇلى، م.قوزىبايەۆ اتىنداعى ءسقمۋ-دىڭ رەكتورى وڭداسىن ءاشىموۆ سويلەدى.

«بۇگىن ءبىزدىڭ وتباسىمىز ءۇشىن  ەلەۋلى وقيعا  بولدى، ءبىزدىڭ اكەمىزگە پەتروپاۆل قالاسىندا ەسكەرتكىش ورناتىلۋى ماڭگى ەسىمىزدە قالادى. بۇعان دەيىن الماتى قالاسىندا ءبىر كوشەگە، قاراعاندىدا جاڭا شاعىناۋدانعا  اكەمىزدىڭ ەسىمى بەرىلگەن بولاتىن. ەسكەرتكىشتىڭ اشىلۋى  ەرەكشە  وقيعا. وبلىس پەن قالا باسشىلىعىنا وسىنداي قوماقتى شارانى جۇزەگە اسىرعانى ءۇشىن زور العىسىمدى بىلدىرەمى. وسى جوبانى جۇزەگە اسىرعان ءمۇسىنشى قازبەك ساتىبالدىعا دا ايتار العىسىم شەكسىز»،- دەدى وڭداسىن ءاشىموۆ.

سالتاناتتى ءراسىم بارىسىندا ق ر پارلامەنتى ءماجىلىسىنىڭ دەپۋتاتى كارىباي مۇسىرمان، ق ر پارلامەنتى سەناتىنىڭ دەپۋتاتى اناتوليي باشماكوۆ، سول سياقتى ەڭبەك ارداگەرلەرى جاقسىلىق ىسقاقوۆ پەن اليك  ديادين بايكەن ءاشىموۆ تۋرالى ءوز ەستەلىكتەرىمەن ءبولىستى.

ەسكەرتكىشتى قۇرمەتتى اشۋ قۇقىعى  ءوڭىر باسشىسى قۇمار اقساقالوۆ پەن م.قوزىبايەۆ اتىنداعى ءسقمۋ-دىڭ رەكتورى وڭداسىن اشىموۆكە بەرىلدى.

 سالتاناتتى شارانىڭ سوڭىندا پەتروپاۆل قالاسىنىڭ تۇرعىندارى بايكەن ءاشىموۆتىڭ ەسكەرتكىشىنە گۇل شوقتارىن قويدى.