قىزىلوردا وبلىسىندا ءبىر جارىم عاسىرعا جۋىق جەر استىندا كومۋلى جاتقان قاسيەتتى كىتاپ تابىلدى دەپ حابارلايدى  Qamshy.kz اقپارات اگەنتتىگى 24.kz-كە سىلتەمە جاساي وتىرىپ.

19-عاسىرعا تيەسىلى قۇندى جادىگەر جالاعاش اۋدانىنداعى مىرزاباي اۋليە مازارىنىڭ ماڭىن قازعان كەزدە شىققان. ءوز زامانىنىڭ اۋليە، ەمشىسى بولعان احۋن مىرزاباي ازامات ۇلى 1833 جىلى سىر وڭىرىندە ومىرگە كەلگەن. كونە كىتاپتى بابا قورىمىن قايتا جوندەمەك بولعان ۇرپاقتارى تاۋىپ الدى. سول ۋاقىتتا قازاق جەرىندە ازاتتىقتىڭ تاڭى اتاتىنىن ايتىپ كەتكەن اۋليە قاسيەتتى قۇران كىتابىن الاساپىران زاماندا ءوزى كومگەنگە ۇقسايدى. مۇقابالارى ءشىرىپ، پاراقتارى جىرتىلعانمەن، جازۋلارى انىق ساقتالىپتى.

«بالام ەكەۋمىز مەشىتتىڭ ىشىنە جوندەۋ جۇمىستارىن جاساپ جاتقان بولاتىنبىز، ءبىر بۇرىشتى قازىپ جاتقاندا  ءبىر كىتاپتى كوزىم شالدى. ال قۇران كىتاپ ەكەن. كىتاپ وتە ەسكى. ءبىر جارىم عاسىر جەر استىندا جاتقاندىقتان كىتاپتاردىڭ كوبىسى شىرىگەن، ال جارتاسىنىڭ جازۋلارى انىق كورىنەدى. كىتاپتا نە جازىلعانىن عالىمدار انىقتاپ بەرسە ەكەن»،- دەيدى مىرزاباي اۋليەنىڭ شوبەرەسى وراز سالقاش ۇلى.