«تۇركىستان – تۇركى الەمىنىڭ 2017 جىلعى مادەني استاناسى» اياسىندا كوپتەگەن يگى شارالاردى ۇيىمداستىرىپ جۇرگەن «ازىرەت سۇلتان» مەملەكەتتىك تاريحي-مادەني قورىق-مۋزەيىندە ۇلت-ازاتتىق قوزعالىسىنىڭ باسشىسى، اتاقتى باتىر سىرىم دات ۇلىنىڭ تۋعانىنا 275 جىل تولۋىنا وراي وڭىرلىك عىلىمي-پراكتيكالىق كونفەرەنسيا بولىپ ءوتتى، دەپ حابارلايدى Qamshy.kz اقپارات اگەنتتىگى "ازىرەت-سۇلتان" قورىق-مۇراجايىنىڭ باسپا ءسوز قىزمەتىنە سىلتەمە جاساپ.

جيىنعا ءتوراعالىق ەتكەن قورىق-مۋزەي ديرەكتورى جاندوس اۋباكىر مۋزەيلەر اراسىنداعى ساباقتاستىقتى، تاريحي تۇلعالاردى تانىپ بىلۋدەگى بۇل كونفەرەنسيانىڭ ماڭىزدىلىعىنا باسا نازار اۋدارۋ قاجەتتىگىنە جۇرت ىقىلاسىن اۋداردى.

كونفەرەنسيادا باس قوسقاندار سىرىم دات ۇلىنىڭ شەجىرەسى مەن تاريحى، سىرىم باستاعان ۇلت-ازاتتىق قوزعالىسىنىڭ باستالۋى جانە ونىڭ بارىسى، شەشەندىك تۇلعاسى سىندى تاقىرىپتاردا بايانداما وقىدى.

اتاپ ايتساق، «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ باس رەداكتورى ابدىكەرىم ماناپوۆ «سىرىم دات ۇلى جانە قازاق حالقىنىڭ شەشەندىك ونەرى»، «ازىرەت سۇلتان» قورىق-مۋزەيى عىلىمي زەرتتەۋ ءبولىم مەڭگەرۋشىسى عاني يسكاكوۆ ت.ع.ك.، «سىرىم دات ۇلى – قازاق ۇلت-ازاتتىق كوتەرىلىسىنىڭ جەتەكشىسى»، ن.تورەقۇلوۆ مۋزەيىنىڭ مەڭگەرۋشىسى د. كەرىمبەكوۆا «سىرىم شەشەندىك ونەردى دامىتۋشى»، «ازىرەت سۇلتان» قورىق-مۋزەيىنىڭ ارحەولوگيا جانە تاريحي ەسكەرتكىشتەردى قورعاۋ ءبولىمىنىڭ مەڭگەرۋشىسى م.تۇياقبايەۆ «قوجا احمەت ياساۋي كەسەنەسىندە جەرلەنگەن باتىرلار» تاقىرىپتارىندا مازمۇندى باياندامالار جاسادى.

جيىن سوڭىندا كونفەرەنسياعا كەلۋشىلەر ارنايى ۇيىمداستىرىلعان «ەل باستاعان كوسەم، ءسوز باستاعان شەشەن» تاقىرىبىنداعى كورمەنى تاماشالاپ، ءوز ويلارىن ورتاعا سالدى. قاتىسۋشىلارعا «ازىرەت سۇلتان» قورىق-مۋزەيىنىڭ اتىنان سەرتيفيكاتتار تابىستالدى.