كونگو ەلىندەگى سارباز بالالار جەرگىلىكتى داستۇرگە ساي ءوز قۇرباندارىنىڭ قاندارىن ىشەدى. مۇنداي ءراسىم ارقىلى جەتكىنشەك ساربازعا قوسىمشا كۇش داريدى دەپ سەنەدى. بۇل تۋرالى جۇما كۇنى بۇۇ ادام قۇقىقتارىن قورعاۋ كوميسسياسى حابارلادى.

«كامۋينا نساپۋ» ۇيىمىنىڭ ساربازدارى كاسايدىڭ ورتالىق پروۆينسياسىنا شابۋىل جاساۋ بارىسىندا جاۋىنگەرلەر رەتىندە 7-13 جاس ارالىعىنداعى جەتكىنشەكتەردى پايدالانادى دەلىنگەن باياندامادا.

ماگيالىق ءراسىم كەزىندە سارباز قىزدار ساباننان جاسالعان بەلدەمشەلەرىن ءبىر سىلتەپ الىپ، قۇرباندارىنىڭ قانىن ىشەدى.

بۇۇ حابارلاعانداي، جەرگىلىكتى تۇرعىندار جەتكىنشەكتەردىڭ اتالمىش راسىمگە تارتىلعاندارىن ءوز كوزدەرىمەن كورگەن. ءتىپتى بۇگىندە كوبىسىنىڭ بويىن ۇرەي بيلەگەن. «بۇل نانىم ەل اراسىندا كەڭىنەن تارالعان. بالالاردان تۇراتىن ساربازداردىڭ 1 جىلدان كەيىن ۇلتتىق اسكەر قۇرامىنا ەنە الاتىن كۇشتەرى بولادى»، – دەپ جازىلعان باياندامادا. بايانداما كونگودا ءومىر ءسۇرىپ، قىسىمعا شىداماي انگولاعا كوشىپ كەتكەن تۇرعىنداردىڭ اڭگىمەسىنىڭ جەلىسىمەن جازىلعان.

بوسقىنداردىڭ ايتۋىنشا، جەرگىلىكتى قاۋىپسىزدىك كۇشتەرى شابۋىلدارعا بەلسەندى تۇردە ارالاسىپ، الگىندەي ۇيىمدارعا قولداۋ كورسەتەدى ەكەن، ءتىپتى بيلىكتەرىن جۇرگىزىپ وتىرادى.

كاساي پروۆينسياسىنداعى داعدارىس بيلىكتىڭ جەرگىلىكتى كوشباسشىلاردىڭ ءبىرى جان-پەرۋ مپانديگە «كامۋينا نساپۋ» لاقاپ اتىن بەرۋدەن باس تارتۋىنان باستالعان.

بۇل وقيعادان سوڭ مپاندي بيلىككە قارسى كۇش جينايدى. ول 2016 جىلدىڭ تامىزىندا ءولتىرىلدى. ونىڭ ولىمىنەن كەيىن قىسىم كورسەتۋ كۇشەيە ءتۇستى. كاتوليك شىركەۋى مەن بۇۇ مالىمەتتەرىنە سايكەس، 3 مىڭعا جۋىق ادام ءولتىرىلىپ، 1،3 ميلليون تۇرعىن ۇيلەرىن تاستاپ باس ساۋعالاۋعا ءماجبۇر بولدى. ال 30 مىڭعا جۋىعى انگولاعا قاشقان.

بۇۇ قىزمەتكەرلەرى كاساي پروۆينسياسىنا ەڭ كەمى 80-گە جۋىق ادامداردىڭ جەرلەنگەن ورنىن انىقتاعان.