ونسىز دا جۇڭگو بيلىگىنەن زارداپ شەگىپ كەلە جاتقان ۇيعىر حالقىنىڭ ەندىگى ءتىلى دە ءسونۋدىڭ ءسال الدىندا تۇر. سينسزيان-ۇيعىر اۆتونومياسىنىڭ بيلىگى اۋدانداعى مەكتەپكە دەيىنگى ورتالىقتار مەن ورتا مەكتەپتەردە ۇيعىر ءتىلىنىڭ وقىتىلۋىنا تىيىم سالدى. بۇل تۋرالى yenicag.ru پورتالى حابارلايدى.

بيلىك 56 كىشى ۇلتتاردى مويىنداعانىنا قاراماستان، ەلدە «گوموگەندى» قوعام قالىپتاستىرۋعا تىرىسىپ باعۋدا. سونداي-اق وزگە ۇلتتاردىڭ، ونىڭ ىشىندە تۇركى ءتىلدى ۇيعىرلاردىڭ مادەنيەتىن تاس-تالقان ەتۋدى كوزدەپ وتىر.

دەرەكتەرگە سايكەس، مەكتەپ باعدارلاماسىندا ۇيعىر ءتىلىن وقىتۋعا تىيىم سالۋ تۋرالى ۇكىمدى حوتان پروۆينسياسىنىڭ ءبىلىم بەرۋ ورگاندارى شىعارعان.

قۇجاتتا كورسەتىلگەندەي، مەكتەپتەردە ءبىر ءتىلدى دارىپتەۋدى تالاپ ەتۋ كەرەك. كۇزدە وقۋ جىلى باستالعان ۋاقىتتا جۇڭگو ءتىلى باستاۋىش سىنىپتارعا جانە ورتا سىنىپتارعا وقىتىلاتىنداي باعدارلاما دايىن تۇرۋ كەرەك.

وسى ۋاقىتقا قحر ۇيعىرلاردىڭ قۇندىلىقتارىن جويۋعا تىرىسىپ كەلدى. ماسەلەن، مۇسىلماندىقتان ايىرماق بولدى. ۇيعىرلار ءوز بالالارىنا مۇسىلمان ەسىمىن بەرە المايتىن حالگە جەتتى. سونداي-اق، رامازان ايىندا كۇندىز تاماقتانۋدان باس تارتۋعا قىتايلىق ۇيعىرلاردىڭ قاقى جوق ەدى.

رەسمي دەرەككە سۇيەنسەك، اۋداندا 10 ميلليونعا جۋىق ۇيعىرلار ءومىر سۇرەتىن كورىنەدى.