ايماق باسشىسى دانيال احمەتوۆ جاڭا ورىنباسارىن تانىستىردى. بۇل قىزمەتكە وسىعان دەيىن ق ر پرەزيدەنتى اكىمشىلىگىنىڭ مەملەكەتتىك باقىلاۋ جانە اۋماقتى-ۇيىمداستىرۋ جۇمىسى بولىمىندە مەملەكەتتىك ينسپەكتور قىزمەتىن اتقارعان شالقار بايبەكوۆ تاعايىندالدى، دەپ حابارلايدى Qamshy.kz اقپارات اگەنتتىگى شقو اكىمدىگىنىڭ باسپا ءسوز قىزمەتىنە سىلتەمە جاساپ.

شالقار بايبەكوۆ 1967 جىلى 6 اقپاندا بۇرىنعى سەمەي وبلىسى، اباي اۋدانىندا دۇنيەگە كەلگەن. 1996 جىلى قازاقستان مەملەكەتتىك باسقارۋ اكادەمياسىنىڭ «ەكونوميكا» ماماندىعى بويىنشا ءبىلىم الىپ، 2001 جىلى قازاقستان مەملەكەتتىك زاڭ اكادەمياسىنىڭ «زاڭگەر» ماماندىعى بويىنشا ءتامامدايدى.

قىزمەت جولىن 1988 جىلى سەمەي وبلىسى مەملەكەتتىك ساقتاندىرۋ ينسپەكسياسىنىڭ جاڭاسەمەي اۋدانى اعا ينسپەكتورى لاۋازىمىنان باستاعان.

1990 جىلدىڭ شىلدە ايىنان باستاپ سەمەي سالىق ينسپەكسياسى سالاسىندا قىزمەت ەتتى. 1999 جىلدان باستاپ پاۆلودار، كەيىن استانا، قاراعاندى سالىق كوميتەتتەرىنىڭ ءتوراعاسى بولادى.

2008-2014 جىلدار ارالىعىندا استانا قالاسى سالىق دەپارتامەنتىنىڭ ەسىل اۋدانى بويىنشا سالىق باسقارماسى باسشىسى قىزمەتىن اتقارادى.

شقو اكىمى دانيال احمەتوۆ جاڭا ورىنباسارىن تانىستىرا وتىرىپ، شالقار بايبەكوۆ اگرارلىق سەكتوردى دامىتۋداعى ماڭىزدى سۇراقتاردى شەشۋدە ءوز تاجىريبەسىن ءتيىمدى پايدالانادى دەگەن سەنىمىن ءبىلدىردى.