سىرتقى ىستەر مينيسترلىگىندە «قازاقستان – شەتەلدىك ب ا ق كوزىمەن» اتتى ءتورتىنشى حالىقارالىق بايقاۋ جەڭىمپازدارىن ماراپاتتاۋ ءراسىمى ءوتتى. بايقاۋدى ق ر ءسىم جانە قازاقستاننىڭ باس رەداكتورلار كلۋبى بىرلەسىپ وتكىزدى دەپ حابارلايدى Qamshy.kz اقپارات اگەنتتىگى ق ر ءسىم باسپا ءسوز قىزمەتىنە سىلتەمە جاساي وتىرىپ.

ازەربايجان، يزرايل، يتاليا، كانادا جانە كورەيا رەسپۋبليكاسىنىڭ اۆتورلارى بايقاۋ جەڭىمپازدارى اتاندى.

جەڭىمپازداردى قۇتتىقتاي وتىرىپ، سىرتقى ىستەر ءمينيسترى قايرات ءابدىراحمانوۆ زاماناۋي قوعامداعى كاسىبي جۋرناليستيكانىڭ ماڭىزدى ءرولىن اتاپ ءوتتى. «ول كوپشىلىكتىڭ وي-پىكىرىن قالىپتاستىراتىن، ىسكە قوزعالتاتىن كۇش بولىپ تانىلادى»، – دەدى ول. بۇل سالانىڭ جوعارى دەڭگەيىن، شىعارماشىلىعىن، ادىلدىگىن ءارى بەيتاراپتىلىعىن قولداۋدى مينيسترلىك وزىنە ابىروي سانايدى. ق. ءابدىراحمانوۆ شەتەلدىك جۋرناليستەردى قازاقستاندا «ءۇشىنشى جاڭعىرۋ» شەڭبەرىندە اتقارلىپ جاتقان ساياسي جانە ەكونوميكالىق رەفورمالار، سونداي-اق «رۋحاني جاڭعىرۋ» باعدارلاماسىنىڭ باسىمدىقتارى تۋرالى حاباردار ەتتى.

بايقاۋ تۋرالى ايتا كەلىپ، ق ر سىرتقى ىستەر ءمينيسترى بيىلعى جىلعى وتىنىشتەر سانىنىڭ كوبەيگەنىن اتاپ ءوتتى: ءادىلقازىلار القاسى 29 ەلدەن 83 جاريالانىم الدى. كوبىسى استاناداعى «ەكسپو-2017» كورمەسىنە ارنالدى. بۇل شەتەلدىك باق-تاردىڭ حالىقارالىق كورمەگە دەگەن ۇلكەن قىزىعۋشىلىعىن راستايدى. وسى جىلدىڭ شىلدە ايىندا بەس ءوڭىردىڭ ءارقايسىسىنان بايقاۋدىڭ ءبىر جەڭىمپازى انىقتالدى.

ازەربايجاندىق «1news.az» اقپاراتتىق اگەنتتىگىنىڭ ءتىلشىسى پارۆانا سۋلتانوۆا تمد جانە بالتىق ەلدەرىنىڭ اۆتورلارى اراسىنان جەڭىمپاز بولىپ تاڭدالدى. ەۋروپا ەلدەرىنەن جارىسقا قاتىسقانداردىڭ اراسىنان ۇزدىك ماقالانى «Vocal Europe» ءتىلشىسى، يتاليا ازاماتشاسى يلاريا كاپيتانيو جاريالادى. امەريكاندىق اۆتورلار اراسىندا «Wildlives.co» رەسۋرسىندا ماقالا جاريالاعان توماس تەيلور جەڭىمپاز اتاندى. «The Korea Herald» گازەتىنىڭ ءتىلشىسى دجوەل لي ازيا، اۋستراليا جانە وكەانيا ەلدەرىنىڭ اۆتورلارى ىشىنەن جەڭىمپاز بولىپ تاڭدالدى. تاياۋ شىعىس پەن افريكادان «The Jerusalem Post» گازەتىندەگى ماقالاسى ءۇشىن يزرايلدىك ۋدي شاحام جەڭىمپاز جاريالاندى.

ماداقتاما مەن ەستەلىك كادەسىيلارعا قوسا، جەڭىمپازدار قازاقستانعا، اتاپ ايتقاندا استانا، الماتى جانە بۋرابايعا ساپارمەن ماراپاتتالدى. ساپار بارىسىندا قوناقتار «ەكسپو-2017» كورمەسىنە بارۋ، قازاقستاننىڭ مادەني جانە تاريحي نىساندارى مەن ەلىمىزدىڭ زاماناۋي ساۋلەت ونەرىمەن، كوركەم تابيعاتىمەن تانىسۋ مۇمكىندىگىنە يە بولادى. ماراپاتتاۋ سالتاناتىندا ق. ءابدىراحمانوۆ جۋرناليستەردىڭ قازاقستانعا ساپارىن ۇيىمداستىرۋعا قوسقان ۇلەسى ءۇشىن بايقاۋ سەرىكتەستەرىنە شىنايى ريزاشىلىعىن جەتكىزدى.

سالتاناتتى راسىمگە باس رەداكتورلار كلۋبىنىڭ پرەزيدەنتى ەرلان بەكقوجين، ديپلوماتيالىق كورپۋس جانە بايقاۋ سەرىكتەستەر – «قازاقستان تەمىر جولى» ۇك» اق، «استانا ەكسپو-2017» ۇك» اق، ق ر ۇلتتىق وليمپيادالىق كوميتەتى، «LOT Polish Airlines» اۋەكومپانياسى، «Rixos Borovoe» جانە «Ramada Plaza Astana» قوناقۇيلەرى، سونداي-اق «ارعىماق» كولىك كومپانياسىنىڭ وكىلدەرى قاتىستى.

«LOT Polish Airlines» اۆياكومپانياسىنىڭ رەسمي وكىلى ادريان كۋبيسكيي «ەكسپو-2017» قارساڭىندا مامىر ايىندا اشىلعان «ۆارشاۆا – استانا» تىكەلەي رەيسىنىڭ پولياك جانە ەۋروپالىق جولاۋشىلار اراسىنداعى تانىمالدىلىعىن اتاپ ءوتتى. ونىڭ ويىنشا، حالىقارالىق باق-تاردىڭ قازاقستانعا قىزىعۋشىلىعى، وسىنداي بايقاۋلارعا دا وراي ەلىمىزدىڭ تارتىمدى تۋريستىك باعىت رەتىندە تانىمال بولۋىنا جاعداي جاسايدى.

جەڭىمپازداردى استانا قالاسىندا اككرەديتتەلگەن ازەربايجان، كانادا، يتاليا جانە كورەيا رەسپۋبليكاسى ديپلوماتيالىق ميسسيالارىنىڭ باسشىلارى مەن لاۋازىمدى وكىلدەرى دە قۇتتىقتادى.