رەسەيدىڭ اسكەري وپەراسياسى بارىسىندا وسى ايدىڭ ىشىندە سيريا اۋماعىندا بەكىنگەن 800 لاڭكەستىڭ كوزى جويىلعان دەپ حابارلايدى Qamshy.kz اقپارات اگەنتتىگى شەتەلدىك باق-قا سىلتەمە جاساپ.

تەك سوڭعى 5 تاۋلىك ىشىندە عانا 819 اۋە شابۋىلى جاسالىپ، «يراك پەن ليەۆانت لاڭكەستىك توبىنا» تيەسىلى 40 تەحنيكا كۇل-تالقان بولدى. بۇل مالىمەتتى رەسەيدىڭ قورعانىس مينيسترلىگىنىڭ وكىلدەرى جاريا ەتىپ وتىر. نەگىزى ءقازىر سيريا اۋماعىندا 3 ءقاۋىپسىز ايماق بار.

رەسەيلىك اسكەريلەردىڭ ايتۋىنشا، استانا پروسەسى بارىسىندا قول جەتكىزىلگەن كەلىسىمدەر ارقاسىندا بۇل ەلدە گۋمانيتارلىق اپاتقا جول بەرىلمەدى. ويتكەنى بىرىككەن ۇلتتار ۇيىمى مەن حالىقارالىق قىزىل كرەست كوميتەتى وسى ءقاۋىپسىز ايماقتارعا 14 مارتە كومەك جەتكىزگەن. ال رەسەيدىڭ جۇك تاسىمالدايتىن ۇشاقتارى ءبىر اي ىشىندە سودىرلاردىڭ قورشاۋىنداعى دەير-ەز-زور قالاسىنا شامامەن 300 توننا ازىق-تۇلىك پەن دارى-دارمەك اپارا الدى. اسكەريلەر: «ءدال وسى شاھار «يراك پەن ليەۆانت لاڭكەستىك توبىنان» ازات ەتىلسە، اتىشۋلى ۇيىم جەندەتتەرىنە ويسىراتا سوققى بەرىلۋى ءتيىس»، – دەپ وتىر.