ەكى سالماق دارەجەسىندە الەمنىڭ بۇرىنعى چەمپيونى ساۋل "كانەلو" الۆارەس (49-1-1، 34 كو) ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى قازاقستاندىق بوكسشى گەنناديي گولوۆكين (37-0، 33 كو) جەكپە-جەك الدىندا ۇلكەن قاتەلىككە بوي الدىرۋى مۇمكىن ەكەنىن ايتتى دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساي وتىرىپ.

بوكسشىلار وسىدان بىرنەشە جىل بۇرىن شارشى الاڭدا بەيرەسمي تۇردە كەزدەسكەن، ولار كاليفورنيادا سپاررينگ-سەسسيالارىن وتكىزگەن. "كانەلونىڭ" ايتۋىنشا، گولوۆكين سول جاتتىعۋلار ارقىلى "ءوز قارسىلاسىنىڭ شاماسىن ءبىلدىم" دەگەن ويدان اۋلاق بولۋى ءتيىس، سەبەبى ونى توسىن سىي كۇتىپ تۇر.

"ەگەر ولار بۇرىنعى مەنىڭ قاتىسۋىممەن وتكەن جاتتىعۋلاردى ەسكەرە وتىرىپ دايىندالسا، بۇل ۇلكەن قاتەلىك. مەن ولاردىڭ بۇل كەزدەسۋدى نە ءۇشىن ايتىپ جۇرگەنىن بىلمەيمىن، ءبىراق بۇل كەزدەسۋ شىنىمەن بولدى جانە ولار وسىنى نەگىزگى ستراتەگيا رەتىندە قولداناتىن بولسا، ول ماعان ۇتىمدى. بىرنەشە جىل بۇرىن گولوۆكينمەن جۇدىرىقتاسقان جىگىتپەن مەنىڭ ايىرماشىلىعىم جەر مەن كوكتەي. مەن ءوز جاتتىعۋىمدا قاتەلىككە جول بەرمەيمىن، قارسىلاستى تۋرا باعالايمىن. مەن ونىڭ پانچەر ەكەنىن جاقسى بىلەمىن، سەبەبى بۇرىندارى كەزدەسكەنمىن. مەن وسىعان دايىندالىپ جاتىرمىن"، – دەدى الۆارەس بەرگەن سۇحباتىندا.