ءال-فارابي اتىنداعى قازاق ۇلتتىق ۋنيۆەرسيتەتى جۋرناليستيكا فاكۋلتەتىندە اقىن، پۋبليسيست، «اقيقات» جۋرنالىنىڭ باس رەداكتورى، م.ماقاتايەۆ اتىنداعى سىيلىقتىڭ جانە حالىقارالىق «الاش» ادەبي سىيلىعىنىڭ يەگەرى امانحان الىمۇلىمەن «بۇگىنگى ادەبيەت جانە جاستار» اتتى كەزدەسۋ ءوتتى،-دەپ حابارلايدى Qamshy.kz اقپارات اگەنتتىگى. 

اقىن اڭگىمەنىڭ ءالقيسساسىن جاستىق شاعىن ەسكە الۋدان باستادى. «مەن بالا كۇنىمدە كىتاپحاناشى بولۋدى ارماندادىم. كۇنى بويى كىتاپحانادا وتىراتىنمىن. وسە كەلە ادەبيەتشىگە اينالا باستادىم. ولەڭدەرىم جەرگىلىكتى باسىلىمدارعا شىعىپ ءجۇردى. مەكتەپ بىتىرگەن سوڭ، كازگۋ-دىڭ جۋرناليستيكا فاكۋلتەتىنە قۇجات تاپسىردىم. ءبىراق تۇسە المادىم. جىلدا تاپسىرامىن، جىلدا تۇسە المايتىن ەدىم. ءوستىپ التى جىل ءجۇردىم. مەن ەمتيحان تاپسىرۋعا بارعان سايىن، ونداعىلار «ماڭگىلىك ابيتۋرەنت» كەلدى دەپ قالجىڭدايتىن. جەتىنشى رەت تاپسىرعاندا جۋرفاككا دا ءتۇستىم-اۋ ايتەۋىر» دەپ اقىن ءوزى وقىعان ءبىلىم شاڭىراعىندا ستۋدەنتتىك شاعىن ەسكە الىپ قويدى.  

ستۋدەنتتەر كەزدەسۋ قوناعىنان ونىڭ جۋرناليستىك قىزمەتى مەن اقىندىق قابىلەتى اراسىندا قانداي بايلانىس بار ەكەنىن سۇرادى. «مەن اقىندىق پەن جۋرناليستيكانى ارالاستىرعان ەمەسپىن. جۋرناليستيكا مەن كوركەم دۇنيە ەكەۋى ەكى نارسە. بۇرىنىراق ءبىر جىگىت ماعان: «امانحان، سەنىڭ ولەڭدەرىڭ ماحاببات پەن ليريكاعا تولى. ال ماقالالارىڭدا باسقالاردى جانىن شىعارىپ، باس-كوزىن جارىپ اياماي سىنايسىڭ» دەپ ايتىپ ەدى. مەن باسىلىمنىڭ رەداكسياسىندا ءجۋرناليستپىن، رەداكسيادان شىققان سوڭ اقىنمىن» دەدى ا.ءالىم ۇلى كەزدەسۋگە جينالعان ستۋدەنتتەرگە.

بولاشاق جۋرناليستەردى بۇگىنگى ادەبيەتتىڭ جاعدايى قاتتى تولعاندىرادى ەكەن. ولاردىڭ بۇگىنگى ادەبيەتشىلەرگە كوڭىلىڭىز تولا ما، قازىرگى جاس اقىنداردان كىمدەردى جوعارى باعالايسىز دەگەن سۇراعىنا «بۇگىنگى ادەبيەتكە كوڭىلىم تولادى. ۇزدىك شىعارمالار ومىرگە كەلىپ جاتىر. جاس اقىندار شوعىرى قالىپتاسىپ كەلەدى. اباي وراز، قايرات سەيىتقازين سىندى جىگىتتەردى جوعارى باعالايمىن» دەپ جاۋاپ بەردى ا.ءالىم ۇلى.

كەزدەسۋ بارىسىندا اقىن ستۋدەنتتەرگە ءوزىنىڭ جۇرەكجاردى ولەڭدەرىن وقىپ بەردى. سىرلى جىر شۋماقتارىنا ريزا بولعان جاستار وعان ءالسىن-السىن قول شاپالاقتاپ، قوشەمەت كورسەتىپ وتىردى. جيىن سوڭىندا ا.ءالىم ۇلى كەزدەسۋ كەزىندە ساۋاتتى سۇراق قويا بىلگەن ءتورت ستۋدەنتكە ءوز قالامىنان تۋعان «وتكىردىڭ ءجۇزى» كىتاپتارىن قولتاڭباسىمەن سىيعا تارتتى.

ج.ناۋرىزالييەۆ