«Qazaqstan» تەلەراديوكورپوراسياسىنىڭ قۇرامىنا كىرەتىن 14 ايماقتىق تەلەارنالاردىڭ ەفيرىندە اۋقىمدى وزگەرىستەر باستالدى، — دەپ حابارلايدى Qamshy.kz اقپارات اگەنتتىگى. بۇل تۋرالى ساياساتكەر ەرلان قارين ءوزىنىڭ فەيسبۋك پاراقشاسىنا جازدى. 

«بۇگىن «Qazaqstan» تەلەراديوكورپوراسياسىنىڭ قۇرامىنا كىرەتىن 14 ايماقتىق تەلەارنالاردىڭ ەفيرىندە اۋقىمدى وزگەرىستەر باستالدى. جاڭا ماۋسىم اياسىندا، ەفيرلەردىڭ گرافيكالىق بەزەندىرىلۋى، ستۋديالاردىڭ ديزاينى مەن دەكوراسيالارى جاڭارتىلىپ، ءار ءتۇرلى جانردى قامتيتىن جاڭا باعدارلامالار كورەرمەندەرگە ۇسىنىلادى.

سونداي-اق، بارلىق تەلەارنالاردىڭ جەكە اتاۋلارى وزگەرىپ، ارنا لوگوتيپتەرى كورپوراسيانىڭ ورتاق بەلگىسىمەن بەزەندىرىلەدى. ەگەر بۇرىن، «قازاقستان - قاراعاندى»، «قازاقستان – قىزىلوردا»، «قازاقستان – پاۆلودار»، «قازاقستان – پەتروپاۆل» ت.ب دەپ اتالسا، ەندى «Saryarqa»، «Qyzylorda»، «Ertis»، «Qyzyljar» بولىپ وزگەرەدى. ءار ايماقتىڭ بۇرىننان كەلە جاتقان تاريحي جەر-سۋ اتاۋلارى مەن وڭىرلەردىڭ قالىپتاسقان اتاۋلارى نەگىزگە الىندى. رەبرەندينگتىڭ باستى ماقساتى — كورپوراسياعا قاراستى ايماقتىق تەلەارنالارعا جاڭا سەرپىلىس بەرىپ، زامان تالابىنا ساي دامۋ جولدارىن قاراستىرىپ، ساپالى،ينتەللەكتۋالدى باعدارلامالاردىڭ سانىن ارتتىرۋ. جاڭا ماۋسىم اياسىندا ايماقتىق تەلەارنالاردا 96 باعدارلاما شىعادى.

ءبىز مۇمكىندىگىمىزشە كورەرمەندەرىمىزدىڭ تالعامى مەن تالابىن ەسكەرە وتىرىپ، تالداۋ جاساپ، ساپالى كونتەنت ۇسىنۋعا تىرىسامىز. بۇل جۇمىس الداعى ۋاقىتتا دا جالعاساتىن بولادى»، — دەپ جازدى ەرلان قارين.