تانىمال ءانشى التىناي جورابايەۆا حابار تەلەارناسىنداعى «تىكەلەي ەفير» باعدارلامىسىنا بارمايتىنىن مالىمدەدى، دەپ جازادى Qamshy اقپارات اگەنتتىگى. بۇل تۋرالى ول ءوزىنىڭ ينستاگرام پاراقشاسىنا جازعان. 

ول رەيتينگ ءۇشىن جالعان اقپارات تاراتقان حابار تەلەارناسىن سىنعا الدى. ايتا كەتەتىن بولساق «تىكەلەي ەفير» باعدارلاماسىن تانىمال تەلەجۇرگىزۋشى ءلايلا سۇلتان قىزى جۇرگىزەدى. 

«مىناۋ نە سۇمدىق! نەگە مەنىمەن اقىلداسپايدى؟ سوندا رەيتينگ ءۇشىن بىرەۋدىڭ ءومىرىن تالقىلاۋ كەرەك پە؟ حابار ارناسىنىڭ ابىرويىنا مىناداي باعدارلاما ۇيات! حابار تەلەارناسىنا ەشقانداي جامان پىكىرىم، نيەتىم جوق! مىناۋ «تىكەلەي ەفير» دەگەن باعدارلاماعا شاقىراتىن كەزدە ، تەك مەنىڭ شىعارماشىلىعىم، استانادا قالاي تۇرىپ جاتقانىمىز، قىزدارىم استانانى قالاي قابىلدادى؟ اكەم مەن انامنان مەنىڭ بالالىق شاعىم جايىندا وي وربىتەتىندەرى جايلى ايتقان بولاتىن. ال مىنانى قالاي تۇسىنۋگە بولادى؟ اق ساقالدى اكەم مەن اق جاۋلىقتى انام، باۋىرىمدى ، قۇربىمدى الدىرتتى ۇشاقپەن. قىزدارىمدى شاقىرىپ ، ەفيرگە شىعارىپ قويىپ، ءسابيت ەكەۋىمىزدىڭ ءومىرىمىزدى بۇكىل حالىقتىڭ الدىندا نە ءۇشىن تالقىلاۋىمىز كەرەك ؟ نەگە؟! مەنىڭ نيەتىم ، كۇيەۋگە ءتيىپ ، باقىتتى ، ۇلگىلى وتباسى بولۋ ەدى. ءتىپتى ساحناعا شىققىم كەلمەيتىنىن ايتتىم. سابيتكە ۇرپاق قالدىرايىن، ۇل تۋىپ بەرەيىن دەپ ، 4 قىزىم دۇنيەگە كەلدى. ەسەپتەپ تۋۋ دەگەن نارسەنى ءتىپتى بىلمەدىم دە. ال ەندى 4 قىزىمنىڭ اكەسىن بۇكىل حالىققا، اكە-شەشەمنىڭ، قىزدارىمنىڭ الدىندا وتىرىپ تالقىلاۋىمىز كەرەك پە؟ مەنى كىشىپەيىلدىككە، ەردى سىيلاۋعا تاربيەلەدى. ەشقاشان ەرىمنىڭ بەتىنە كەلگەن ەمەسپىن . ەشكىم ەرتەڭگى كۇنىنىڭ قانداي بولاتىنىنا كەپىلدىك بەرە المايدى. مەنىڭ ءومىرىمدى تالقىلاۋ ءۇشىن ، ول ادامدار وزدەرى 100% يدەال بولۋ كەرەك . قانداي بولسا دا ءسابيت قىزدارىمنىڭ اكەسى! امان ءجۇرسىن ، باقىتتى بولسىن ! اللا عانا تورەشى! مەنى ءانشى رەتىندە، انا رەتىندە قالاي سىيلايسىزدار، ءوز ەرىكتەرىڭىزدە. وزگەرتۋگە تىرىسپايمىن. مەنى دۇرىس تۇسىنىڭىزدەر..."ەل بولام دەسەڭ ەكرانىڭدى تۇزە" دەمەكشى بۇكىل xالىقتىڭ الەۋمەتتىك ماسەلەسى كوتەرىلەتىن ۇلكەن ارنا وتباسىلىق ۇساق-تۇيەكپەن اينالىسپاسا ەكەن دەگەن نيەتىم بار... مەنىڭ تاعدىرىم ۇلتتىڭ ماسەلەسى ەمەس! بىرەۋدىڭ تاعدىرىن تالقىلاپ رەيتينگ كوتەرۋ دەگەن، ادامنىڭ تاعدىرىمەن ويناۋ دەگەن ءسوز.... ەشكىمگە مۇنداي تاعدىر تىلەمەيمىن! لايىم، قىزدارىڭىز باقىتتى بولسىن! ەفيرگە بارمايتىنىمىزدى مالىمدەيمىن!»، —  دەپ جازعان بولاتىن التىناي جورابايەۆا. الايدا بەلگىسىز سەبەپتەرمەن بۇل جازباسىن ءوشىرىپ تاستاعان. «تىكەلەي ەفير» باعدارلاماسىنىڭ ينستاگرام پاراقشاسىندا دا التىناي جورابايەۆا تۋرالى جازبا وشىرىلگەن. 

ەسكە سالا كەتەتىن بولساق، وسىدان ءبىراز ۋاقىت بۇرىن التىناي جورابايەۆا ءسابيت ابدىحالىقوۆپەن اجىراسقانىن ايتقان بولاتىن.