قىرعىزستان پارلامەنتىنىڭ دەپۋتاتى، پرەزيدەنتتىكتەن بۇرىنعى كانديدات ومۋربەك بابانوۆ وزىنە قوزعالعان قىلمىستىق ءىستى "ساياسي ءىس" دەپ اتادى، دەپ حابارلايدى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.

"ءبىز بۇگىن قۇقىق قورعاۋ ورگاندارى تاراپىنان باسسىزدىق جاسالعانىن كورىپ وتىرمىز. ولار ساياسي قىلمىستىق ءىس قوزعاپ وتىر. بۇل بارىمىزگە بەلگىلى" دەدى بابانوۆ.

ول سونىمەن بىرگە ەلدەگى جاعدايعا ءوزىن كىنالاپ، ءازازىل ەتىپ كورسەتۋدىڭ قاجەتى جوق ەكەنىن مالىمدەدى. "بيلىك پروبلەمانىڭ كوزى بابانوۆتا ەمەس ەكەنىن تۇسىنبەيدى. ولار مەنى ساياسي الاڭنان الىپ تاستاعانىمەن، پروبلەما شەشىلمەيدى. ەلدىڭ جاعدايى جاقسارىپ كەتپەيدى. شىندىق ءبارىبىر شىعادى" دەدى ول.

4 قاراشادا قىرعىزستان باس پروكۋراتۋراسى جوگوركۋ كەڭەش دەپۋتاتى، پرەزيدەنتتىك سايلاۋدان ۇمىتكەر بولعان ومىربەك بابانوۆ پەن باسقا تۇلعالارعا قارسى قىرعىزستان قىلمىستىق كودەكسى 297-بابىنىڭ 1-تارماعى (كونستيتۋسيالىق قۇرىلىمدى كۇشپەن وزگەرتۋگە شاقىرۋ) جانە 299-بابىنىڭ 1-تارماعى (ۇلتارالىق، ناسىلدىك جانە ءدىني ارازدىقتى قوزدىرۋ) بويىنشا قىلمىستىق ءىس قوزعالعانىن مالىمدەگەن.

بۇل ءىس بابانوۆتىڭ 28 قىركۇيەكتە سايلاۋالدى ۇگىت-ناسيحات ناۋقانى كەزىندە وش قالاسىنىڭ "ءامىر تەمىر" شاعىن اۋدانى تۇرعىندارى الدىندا سويلەگەن سوزدەرىنە بايلانىستى قوزعالعان.

قىرعىزستان باس پروكۋراتۋراسى "تەرگەۋگە دەيىنگى تەكسەرۋ كەزىندە جوگوركۋ كەنەش دەپۋتاتى و. بابانوۆتىڭ 2017 جىلى 28 قىركۇيەك كۇنى سايلاۋالدى ناۋقانى بارىسىندا وش قالاسى ءامىر تەمىر اۋدانىنىڭ نەگىزىنەن ۇلتى وزبەك تۇرعىندارىمەن كەزدەسكەنى انىقتالدى. بابانوۆ ولاردىڭ قولداۋىنا يە بولۋ ماقساتىندا كەزدەسۋدە ەتنيكالىق وزبەكتەردىڭ قۇقىعى شەكتەلەتىنى، ەلدە ۇلتتار تەڭدىگى جوق ەكەنى، مەملەكەتتىك ورگاندار تاراپىنان وزبەكتەرگە قىسىم جاسالاتىنى تۋرالى پىكىرلەر ايتىپ، مۇنداي جاعدايعا بەلسەندى تۇردە قارسىلىق كورسەتۋگە شاقىرعان" دەپ حابارلاعان.

ومۋربەك بابانوۆتىڭ ءوزى بۇعان دەيىن الگى كەزدەسۋدە ايتقان سوزدەرى بۇرمالانعانىن، ەلەكتروندىق ب ا ق بەتتەرىندە تاراعان ۆيدەولاردىڭ "مونتاجدالعانىن" مالىمدەگەن بولاتىن.

"رەسپۋبليكا" پارتياسىنىڭ وكىلدەرى ومۋربەك بابانوۆتىڭ ءقازىر رەسەيدە ەمدەلىپ جاتقانىن ايتادى. ونىڭ قاشان ەلگە ورالاتىنى بەلگىسىز.

قىرعىزستاندا 15 قازاندا وتكەن پرەزيدەنت سايلاۋى كەزىندە ومىربەك بابانوۆ جەڭىسكە جەتكەن بيلىك پارتياسى اتىنان تۇسكەن سوورونباي جەەنبەكوۆتىڭ باستى قارسىلاسى بولدى.