سوڭعى كەزدەرى ءوز ايەلىن سۋرروگات انا بولۋعا يتەرمەلەپ جۇرگەن ەر ادامداردىڭ قاتارى كوبەيىپ كەلەدى دەپ جازادى Qamshy.kz اقپارات اگەنتتىگى Caravan.kz-كە سىلتەمە جاساپ.

ينتەرنەتتە سۋرروگات انا بولامىن دەگەن حابارلامالار كۇننەن كۇنگە ارتىپ كەلەدى. كەيبىرىن كۇيەۋلەرىنىڭ ءوزى جازعانىن كورەسىڭ. «جەڭگەتايلار» ايەلدەرىنىڭ دەنەسىن 9 ايعا جالعا بەرۋگە دايىن.

«جاۋاپكەرشىلىگى مول اتا-انا ءۇشىن ءسابيدى  ەكستراكورپورالدى ۇرىقتاندىرۋ ارقىلى دۇنيەگە الىپ كەلۋگە دايىنمىن. جاسىم 25-تە. بويىم – 170 سم. سالماعىم – 70 كەلى. سۇلۋ، اقىلدى، مەيىرىمدى ايەلمىن. جاساندى تۇسىكتى ەشقاشان جاساعان ەمەسپىن. ەش جەرىم اۋىرمايدى. ىشىمدىك، تەمەكىگە اۋەستىگىم جوق. قىزمەتىم $30 000 تۇرادى جانە اي سايىن 100 000 تەڭگە تولەپ تۇرۋلارىڭىز قاجەت» دەپ جازىلعان حابارلامالاردىڭ بىرىندە.

«استانادا تۇرامىن. ۇلتىم قازاق. ۇش بالام بار. بارلىعىن تابيعي جولمەن دۇنيەگە اكەلدىم. تۇرمىستاعى ايەلمىن. جوعارى ءبىلىمىم بار. بويىم – 163 سم. سالماعىم-57 كەلى. سالاۋاتتى ءومىر سالتىن ۇستانامىن» دەپ جازادى استانا تۇرعىنى.

Caravan.kz ءجۋرناليسى ءوزىن سۋرروگات انا بولۋعا ۇسىنعان ايەلمەن اڭگىمەلەسىپ كوردى. جۋرناليست قارجى تاپشىلىعىنان سۋرروگات انا بولعىسى كەلەتىن، الايدا كۇيەۋىنە ايتۋعا قورقىپ جۇرگەن ايەل رەتىندە حابارلاما يەسىنە حابارلاستى.

– كۇيەۋىم قارسى بولا ما دەپ قورقامىن

– مەنىڭ كۇيەۋىم كەرىسىنشە ءوزى ۇسىندى. وعان ەنەم سولاي ىستەۋگە كەڭەس بەرىپتى. اقشا جاعىنان قىسىلدىق. ونىڭ ۇستىنە باسپانالى بولعىمىز كەلدى. قورىقسام دا كەلىسىمىمدى بەردىم. ەندى سوعان وكىنەمىن. قانشا كوز جاسىمدى توكتىم. گورمونداردىڭ سالدارىنان ءالى كۇنگە دەيىن وزىمە كەلە الماي ءجۇرمىن. جۇيكەم توزدى. دەنساۋلىعىم ناشارلادى.  

جۇكتى بولعاننان كەيىن 7 اي ۇيدە وتىردىم. كۇيەۋىم مەن ەنەم جاعدايىما قاراماستان قارا جۇمىسقا سالدى. ونىڭ اناسى ماعان 5 بالانى جۇمىس ىستەپ ءجۇرىپ دۇنيەگە اكەلگەنىن ۇنەمى ايتىپ وتىراتىن.

جۇكتىلىكتىڭ سوڭعى ايلارى بيولوگيالىق اتا-انانىڭ ۇيىندە تۇردىم. ولار مەنىڭ ءار قادامىمدى اڭدىدى. بوسانعاننان كەيىن بالانى الدى دا ماعان ءتىپتى تاكسيدە شاقىرمادى. ۇيگە اۆتوبۋسپەن جەتتىم.

– كۇيەۋىڭىز قارسى المادى ما؟

– جوق، ونىڭ قولى بوس بولمادى.

– ءۇي ساتىپ الدىڭىزدار ما؟

– جوق، ءالى كۇنگە دەيىن پاتەر جالداپ تۇرامىز. ەنەم دە بىزبەن بىرگە تۇرادى. اقشا جۇمسالىپ كەتتى. كۇيەۋىمنىڭ قارىزدارى بار ەكەن. وعان قوقان-لوقى كورسەتتى. سوندىقتان $10 مىڭ دوللاردى سوعان بەردىك.

– ەندى ەكىنشى مارتە مۇندايعا كەلىسىمىڭىزدى بەرمەيتىن شىعارسىز؟

– جوق، ەندى تەك انالىق جاسۋشامدى عانا وتكىزەمىن.

– كۇيەۋىڭىز جۇمىس ىستەي مە؟

– جوق، ءالى جۇمىس ىستەمەيدى...

تەلەفوننىڭ ارعى جاعىنان ەر ادامنىڭ ايقايلاعان داۋىسى ەستىلدى. وسىمەن اڭگىمە اياقتالدى.

ءار قىز بالاسى ۇلكەن ماحابباتپەن تۇرمىس قۇرىپ، باقىتتى بولۋدى قالايدى. وكىنىشكە قاراي، قىزداردى ايەلدىككە الىپ، ونى ءۇيدىڭ جۇمىسى بىلاي تۇرسىن، قۇرىلىس جۇمىستارىنا دا ارالاستىرادى. قول كوتەرەدى. قور باسشىسى نينا بالابايەۆانىڭ ايتۋىنشا، ايەلدەرىن دوستارىنا ساتپاق بولعان نەمەسە سيريا سەكىلدى سوعىس ءورتى ءورشىپ تۇرعان جەرلەرگە جىنىستىق قۇلدىققا جىبەرەتىن جاعدايلار جيىلەگەن.

ءوز كۇيەۋىن پىشاقتاپ ولتىرگەن ايەلدىڭ دە وقيعاسىن ايتىپ بەردى. تۇرمىس قۇرعان ايەل ۇيىندە كىرپىش تاسۋ، سىلاق سەكىلدى اۋىر جۇمىستاردى جاساعان. ال بىردەڭەنى دۇرىس جاساماسا كۇيەۋى ونى ۇرعان. ايەلىنىڭ جۇمىسى كوڭىلىنەن شىقپاسا جۇدىرىعىن الا جۇگىرگەن. وسىنداي ۇرىس كەرىستىڭ بىرىندە ايەل شىداماي كۇيەۋىن پىشاقپەن ۇرعان. ايەل 5 جىلعا باس بوستاندىعىنان ايىرىلدى.