ولار الىس ەلدەرگە ارمان قۋىپ كەتكەن. ولار شەت مەملەكەتتەردە جۇمىس ىستەپ، قازاقتى الەمگە ايگىلەپ ءجۇر. ولاردىڭ قىزمەتى سىرت كوزگە ەلەۋسىز بولسا دا، شىن مانىندەگى ەرەن ەڭبەك سولاردىكى. عىلىم تەرەڭىنە بويلاعان قازاقتار وركەنيەت كوشىنەن قالىسپاي، حالىقارالىق ءىرى مەكەمەلەردە ۇلكەن لاۋازىمدارعا جەتكەن. Qamshy.kz اقپارات اگەنتتىگى اقش پەن ەۋروپادا تۇراتىن عالىمداردىڭ ءبىر پاراسىن نازارلارىڭىزعا ۇسىنباق.

ەرلان ىسقاقوۆ

سەمەي ءوڭىرىنىڭ تۋماسى ەرلان ىسقاقوۆ 26 جاسىندا سانكت-پەتەربۋرگتەگى ايماقارالىق ەكونوميكا جانە قۇقىق ينستيتۋتىنىڭ باسشىسى بولىپ، رەسەيدەگى ەڭ جاس رەكتور اتانعان. ەرلان ىسقاقوۆ 2007 جىلدان بەرى الفەروۆ قورىنىڭ اتقارۋشى ديرەكتورى قىزمەتىن قوسا اتقارىپ ءجۇر.

ازامات سارسەمبايەۆ

شەتەلدە جۇمىس ىستەيتىن قازاق عالىمدارىنىڭ ءبىرى – ازامات سارسەمبايەۆ. وقۋشى كەزىندە ماتەماتيكا پانىنەن حالىقارالىق وليمپيادا جۇلدەگەرى اتانعان، كەيىن ۇلىبريتانياداعى لوندون ەكونوميكالىق مەكتەبىنە تۇسكەن، اقش-تاعى ميچيگان ۋنيۆەرسيتەتىندە ءبىلىم العان. ازامات سارسەمبايەۆ وقۋىن بىتىرگەن سوڭ قازاقستانعا ورالدى. ءبىراق ەلدە كوپ تۇراقتامادى. ءقازىر اقش-تىڭ سان-فرانسيسكو قالاسىندا تۇرادى.

مۇرات ساپاربايەۆ

مۇرات ساپاربايەۆ – ءال-فارابي اتىنداعى قازاق ۇلتتىق ۋنيۆەرسيتەتىنىڭ تۇلەگى. فرانسياداعى گۋستاۆ روزي ينستيتۋتىنىڭ پروفەسسورى. يندۋستريالدى زالالداندىرعىشتاردىڭ اسەرىنەن دنك بۇزىلۋدىڭ مولەكۋلالىق مەحازيمدەرىن زەرتتەۋ سالاسىندا زور تابىسقا جەتكەن.

گۇل­جان مولداجانوۆا

گۇل­جان مولداجانوۆا – رەسەيدەگى «بازوۆىي حول­دينگ­» مەكەمەسىنىڭ باس ديرەكتورى. 1989 جىلى قازاق مەملەكەتتىك ۋنيۆەرسيتەتىن قىزىل ديپلوممەن بىتىرگەن. كەيىن ماسكەۋگە اسپيرانتۋرانى وقىپ، 27 جاسىندا عىلىم كانديداتى اتاندى. «Forbes»  جۋرنالىنىڭ دەرەگىنشە، الەمدەگى ەڭ بەدەلدى 100 ايەل تىزىمىندە گۇلجان مولداجانوۆا 37-ورىندا تۇر.

نۇرشات نۇراجى ۇلى

نۇرشات نۇراجى ۇلى قحر ىلە قازاق اۆتونوميالى وبلىسى شاپشال اۋدانىندا دۇنيەگە كەلگەن. باستاۋىش مەكتەپتە وقۋ ۇلگەرىمى ۇزدىك بولىپ، 3-سىنىپتى اتتاپ وتكەن. 15 جاسىندا شىڭجاڭ ۋنيۆەرسيتەتىنە حيميا ماماندىعى بويىنشا وقۋعا قابىلدانادى. كەيىن نيۋ-يورك قالالىق ۋنيۆەرسيتەتىندە حيميا دوكتورلىعى بويىنشا ءبىلىم العان.

تەحاس تەحنولوگيالىق ۋنيۆەرسيتەتىندە پروفەسسورلاردىڭ قالاۋىمەن جاساقتالىپ، جابدىقتالعان «نۇرشات نۇراجى اتىنداعى عىلىمي-زەرتتەۋ تاجىريبەحاناسى» بار.

دوستاي رامانقۇلوۆ 

دوستاي رامانقۇلوۆ 1960 جىلى قاسيەتتى تۇركiستان توپىراعىندا دۇنيەگە كەلگەن. ق. ساتبايەۆ اتىنداعى قازاق ۇلتتىق  پوليتەحنيكالىق ۋنيۆەرسيتەتiن بiتiرگەن. ماسكەۋدىڭ جوعارى وقۋ ورىندارىندا ءبىلىمىن شىڭداعان. 1998 جىلدان بەرi اتوم ەنەرگياسى بويىنشا حالىقارالىق اگەنتتىك ۇيىمىندا جۇمىس iستەيدi. وسى ۇيىمدا ىستەپ ءجۇرىپ، ادامزات ءۇشىن اسا ماڭىزدى دەلىنگەن يادرولىق قاۋىپسىزدىكتى ساقتاۋ جولىندا بىلەك سىبانىپ ەڭبەك قىلدى. 2005 جىلى ماگاتە اتىنان ماراپاتقا لايىق دەپ تابىلعان 11 ادامنىڭ ىشىندە دوستاي رامانقۇلوۆ تا بولعان. نوبەل سىيلىعىنىڭ قازاقتان شىققان تۇڭعىش يەگەرى ءقازىر ۆەنادا تۇرادى.

قۋات ەسەنوۆ

قۋات ەسەنوۆ – پاۆلودار قالاسىنداعى دارىندى بالالارعا ارنالعان №8 مەكتەپ-ليسەيدىڭ تۇلەگى. بىرنەشە جىل بۇرىن الەمدى تاڭداي قاقتىرىپ، گيننەستىڭ رەكوردتار كىتابىنا ەنگەن. وقۋشى كەزىندە ەكى رەت ماتەماتيكا پانىنەن دۇنيەجۇزىلىك وليمپيادادا التىن مەدال العان. ءبىلىمدى جىگىت نەبىر كۇردەلى ماتەماتيكالىق تەڭدەۋلەردىڭ شەشىمىن وڭاي تاۋىپ، اقش وقىمىستىلارىن اۋزىنا قاراتقان. 2004 جىلى اقش-تاعى ماسساچۋسەتس تەحنولوگيالىق ۋنيۆەرسيتەتىنە قابىلدانىپ، PhD اكادەميالىق دارەجەسىمەن وقۋىن ءتامامداعان. قۋات ەسەنوۆ ءقازىر سول ۋنيۆەرسيتەتتە عىلىمي قىزمەت اتقارادى.

ەركىن كىتاپبايەۆ

ەركىن كىتاپبايەۆ - بوستون ۋنيۆەرسيتەتىنىڭ پروفەسسورى. ءقازىر ماگيسترانتتارعا قارجى كۋرسىنان ساباق بەرەدى. سونىمەن قاتار ماتەماتيكالىق قارجى سالاسىندا زەرتتەۋلەر جاساپ، حالىقارالىق جۋرنالدارعا ماقالالارىن جاريالاپ تۇرادى.

دارحان تۇيەنبايەۆ

دارحان تۇيەنبايەۆ LIGO كوللابوراسياسىندا 2014 جىلدان بەرى جۇمىس ىستەپ كەلەدى. 2006 جىلى قازۇلتتىق تەحنيكالىق ۋنيۆەرسيتەتىن «اۆتوماتتاندىرۋ جانە باسقارۋ» ماماندىعى بويىنشا بىتىرگەن. 2011 جىلى اقش-قا بارىپ، سان-انتونيو تەحاس ۋنيۆەرسيتەتىنىڭ PhD دوكتورى دارەجەسىن يەلەنگەن. دارحان تۇيەنبايەۆ حالىقارالىق LIGO توبىنىڭ قۇرامىندا ەينشتەيننىڭ گراۆيتاسيا تولقىندارى تۋرالى بولجامىن دالەلدەۋگە قاتىستى.