اقمولا جانە سولتۇستىك قازاقستان وبلىستارىنىڭ ەكى ازاماتى رەسەيگە زاڭسىز ءوتىپ كەتپەكشى بولعان، دەپ حابارلايدى Qamshy.kz اقپارات اگەنتتىگى قازاقپارات-قا سىلتەمە جاساپ.

سوت ماتەريالدارىنا سايكەس، 2017 جىلى 21 قازاندا ەكى ەر ادام شارباقتى اۋدانى ارقىلى رەسەيگە زاڭسىز ءوتىپ كەتكەن. الايدا شەكاراشىلاردىڭ قولىنا ءتۇستى. سوتتا م. ەسىمدى ازامات ءوز كىناسىن مويىنداپ، تۋىسقانىمەن بىرگە اتالعان قۇقىق بۇزۋشىلىققا نە ءۇشىن بارعانىن ءتۇسىندىردى. ونىڭ ايتۋىنشا، تۋعان-تۋىستاردىڭ ءوتىنىشى بويىنشا رەسەيدە اكەسىنىڭ «قىرقىن» بەرگىسى كەلدى. سەبەبى قايتىس بولعان اكەسى - رەسەي فەدەراسياسىنىڭ ازاماتى. الايدا ۇلى كورشى مەملەكەتكە زاڭدى جولمەن شىعا المادى. ويتكەنى بانكتەن العان نەسيە بويىنشا قارىزى بار. ال ونداي ادامدارعا شەتەلگە شىعۋعا رۇقسات جوق. وسىدان كەيىن ول اعاسى ەكەۋى شەكارا بەكەتىن اينالىپ ءوتىپ، رەسەيگە زاڭسىز ءوتىپ كەتۋگە بەل بۋعان.

«پاۆلودار وبلىسى شارباقتى اۋداندىق سوتى اقمولا جانە سولتۇستىك قازاقستاننىڭ ەكى ازاماتىن قىلمىستىق كودەكستىڭ 392-بابى، 1-تارماعى بويىنشا كىنالى دەپ تانىپ، 6 ايعا شارتتى تۇردە باس بوستاندىعىنان ايىرۋ جازاسىن تاعايىندادى»، - دەلىنگەن سوتتىڭ رەسمي حابارلاماسىندا.