«قازاقستاننىڭ دەموكراتيالىق تاڭداۋى» قوزعالىسى ەكسترەميستىك ۇيىمدار قاتارىنا جاتقىزىلدى، دەپ جازادى Qamshy.kz اقپارات اگەنتتىگى. بۇل تۋرالى ق ر باس پروكۋراتۋراسىنىڭ باسپا ءسوز قىزمەتى حابارلادى.

«باس پروكۋراتۋرامەن «قازاقستاننىڭ دەموكراتيالىق تاڭداۋى» اتتى تىركەلمەگەن قوزعالىستىڭ زاڭسىز قىزمەتى انىقتالدى.

ونى قازاقستاندا 20 جىلعا باس بوستاندىعىنان ايىرۋعا سوتتالعان مۇحتار ءابىلازوۆ قۇرعان.

ءابىلازوۆ سوتپەن قىلمىستىق قوعامداستىقتى قۇرعانى، 7،5 ملرد. اقش دوللارىن ۇرلاپ، شەتەلگە شىعارعانى ءۇشىن كىنالى بولىپ تانىلعان.

قىلمىستىق تابىستاردى زاڭداستىرۋ فاكتىلەرى بويىنشا ءبىرقاتار ەۋروپالىق ەلدەردە ءابىلازوۆقا قاتىستى تەرگەۋ جۇرگىزىلۋدە.

ۇلىبريتانيادا لوندون قالاسىنىڭ جوعارعى سوتىنىڭ شەشىمىمەن ءابىلازوۆ پەن ونىڭ سىبايلاستارىنان 4 ملرد. اقش دوللارى وندىرىلگەن.

شەتەلدە سوت جازاسىنان جاسىرىنىپ جۇرگەن ءابىلازوۆ قازاقستان رەسپۋبليكاسى كونستيتۋسياسىنىڭ تالاپتارىن بۇزىپ، كونستيتۋسيالىق قۇرىلىستى كۇشتەپ وزگەرتۋدى ناسيحاتتاۋ مەن ۇگىتتەۋ بويىنشا زاڭسىز ارەكەتىن جالعاستىرۋدا.

ينتەرەنەت جەلىلەر، مەسەندجەرلەر، سونداي-اق ءار ءتۇرلى الەۋمەتتىك توپتارعا پاراقشالار تاراتۋ ارقىلى ءابىلازوۆ بەلسەندى تۇردە قازاقستاننىڭ ازاماتتارىن قوزعالىسقا قوسىلۋعا شاقىرادى، قازىرگى بيلىكتىڭ جاعىمسىز بەينەسىن قۇرىپ، قوعامدا نارازىلىق كوڭىل-كۇيلەر قالىپتاستىرۋدا.

وسىلايشا، جوسپارلى تۇردە الەۋمەتتىك ارازدىق پەن الاۋىزدىقتى قوزدىرۋدا.

نارازىلىق اكسيالاردىڭ بەيبىتشىلىگى تۋرالى ايتسا دا قوزعالىس باسشىسى م.ءابىلازوۆ پەن ونىڭ بەلسەندىلەرىنىڭ قىلمىستىق ماقساتى - بيلىكتى قۇلاتىپ، باسىپ الۋ بولىپ تابىلادى.

بۇل ارەكەتتەر «ەكسترەميزمگە قارسى ءىس-قيمىل تۋرالى» زاڭ بويىنشا ساياسي ەكسترەميزم بولىپ سانالادى جانە مەملەكەتتىڭ قاۋىپسىزدىگىنە قارسى قىلمىس رەتىندە قۋدالانادى. 

وسىعان بايلانىستى، باس پروكۋراتۋرا، «پروكۋراتۋرا تۋرالى» زاڭمەن كوزدەلگەن وكىلەتتىكتەرىن ىسكە اسىرىپ، سوتقا قوزعالىستى ەكسترەميستىك ۇيىم دەپ تانۋ تۋرالى ارىزبەن جۇگىندى.

2018 جىلعى 13 ناۋرىزدا استانا قالاسىنىڭ ەسىل اۋداندىق سوتىنىڭ شەشىمىمەن اتالعان ارىز تولىق كولەمدە قاناعاتتاندىرىلدى.

سوتپەن قوزعالىستىڭ ارەكەتى ەكسترەميستىك دەپ تانىلىپ، وعان قازاقستان رەسپۋبليكاسىنىڭ بارلىق اۋماعىندا تىيىم سالىندى.

سونىمەن قاتار، بۇل ۇيىمنىڭ ارەكەتىن اقپاراتتىق ماتەريالدار، بۇقارالىق اقپارات قۇرالدارى، تەلەكوممۋنيكاسيا، الەۋمەتتىك جەلىلەرى، مەسسەندجەرلەر جانە بەينە-حوستينگتەر ارقىلى تاراتۋعا تىيىم سالىندى.

بۇدان باسقا، الەۋمەتتىك الاۋىزدىقتى قوزدىرۋ، بيلىكتى باسىپ الۋدى ناسيحاتتاۋ جانە وعان جاريا تۇردە شاقىرۋ فاكتىلەرى بويىنشا ۇلتتىق قاۋىپسىزدىك جانە ىشكى ىستەر ورگاندارىمەن سوتقا دەيىنگى تەرگەپ-تەكسەرۋلەر جۇرگىزىلۋدە.

قۇرمەتتى ازاماتتار، باس پروكۋراتۋرا سوت شەشىمىنەن كەيىن «قازاقستاننىڭ دەموكراتيالىق تاڭداۋى» ەكسترەميستىك ۇيىمىنىڭ  كەز كەلگەن ارەكەتىنە قاتىسقانى جانە قارجىلاندىرعانى ءۇشىن قىلمىستىق كودەكستىڭ 182، 258 جانە 405 باپتارىنا سايكەس قىلمىستىق جاۋاپكەرشىلىك كوزدەلگەنىن تۇسىندىرەدى.

«قاتىسۋ» ارەكەتىنە قوزعالىستىڭ يدەياسىن ۇگىتتەۋ جانە ناسيحاتتاۋ، ونىڭ جاريالانىمدارىن، پاراقشالارىن، پوستتارىن، پىكىرلەرىن جانە باسقا دا اقپاراتتىق ماتەريالدارىن دايىنداۋ، شىعارۋ، كوبەيتۋ جانە تاراتۋ جاتادى.

سونىمەن قاتار، «قاتىسۋ» بولىپ قوزعالىستى جانە ونىڭ باسشىسى ءابىلازوۆتى قولداۋدا ميتينگىلەردى، شەرۋلەردى، جاريا اكسيالارىن جانە باسقا جاپپاي ءىس-شارالاردى ۇيىمداستىرۋ جانە وتكىزۋ سانالادى.

«قارجىلاندىرۋ» ۇعىمىنا ءابىلازوۆ پەن قوزعالىسقا  اقشانى، وزگە دە مۇلىكتى بەرۋ نەمەسە جيناۋ، سىيعا تارتۋ، ايىرباستاۋ، قايىرمالدىق جاساۋ، سپونسورلىق جانە قايىرىمدىلىق كومەك، اقپاراتتىق جانە وزگە دە قىزمەت تۇرلەرىن كورسەتۋ جاتادى.

سونىمەن قاتار، ىستەگى زاڭناماعا سايكەس، ەكسترەميستىك توپتىڭ ارەكەتىنە قاتىسۋدى ءوز ەركىمەن توقتاتقان ادام قىلمىستىق جاۋاپتىلىقتان بوساتىلادى»، - دەلىنگەن مالىمدەمەدە.