بۇگىندە ق ر ءبىلىم بەرۋ سالاسى ءبىر جۇيەگە توعىتىلعان، ەشبىر ءمىنسىز، اينالاسى مۇنتازداي بولىپ كورىنگەنىمەن، ءالى كۇنگە دەيىن شەشىمىن تاپپاي كەلە جاتقان كۇردەلى ماسەلەلەر جوق ەمەس.

ۋاقىت وتكەن سايىن دەرتى اسقىنىپ بارا جاتقان وسىنداي تۇيتكىلدى ماسەلەلەردىڭ ءبىرى- ءالى كۇنگە دەيىن ق ر ءبىلىم جانە عىلىم مينيسترلىگىنىڭ ستاندارتتى مەكتەپ باعدارلاماسىنان "ورىس ادەبيەتى" ءپانىنىڭ تۇسپەي كەلۋى. قازاقستاندىق وقۋشىلار ارنايى "ورىس ادەبيەتىن" وقۋعا مىندەتتى مە؟ جانە ولار نە ءۇشىن ورىس ادەبيەتىن ارنايى ساعاتتار الىپ وقۋى كەرەك؟ ەتەك-جەڭىمىزدى تۇگەندەپ، شەكارامىزدى نىقتاعالى ق ر ءبىلىم جانە عىلىم مينيسترلىگىن 10 مينيستر باسقارىپتى. ءار كەلگەن جاڭا مينيستر رەفورماشىل. بۇل ءبىزدىڭ بعم-داعى قالىپتى ءۇردىس ىسپەتتى. وسى رەفورماشىل باسشىلاردىڭ بىرەۋى دە باستاعان ىستەرىن اياعىنا شىعارماعانىنا قاراپ قارنىڭ اشادى. سونىمەن قاتار ورتا مەكتەپتەردەگى وقۋلىقتار دا جىل سايىن جاڭارتىپ وتىرادى. كەزەگىندە بۇل دا وقىتۋشىلار مەن وقۋشىلار ءۇشىن ديسكومفورت تۋعىزاتىنى تاعى بار. بىزدىڭشە، بۇگىنگى كۇننىڭ باستى تالقىسى - ورتا ءبىلىم بەرۋ مەكەمەلەرىندەگى ستاندارتتى باعدارلاماداعى "ورىس ادەبيەتى" پانىنەن باس تارتۋ. مەملەكەتتىك يدەولوگياعا قيىسپايتىن "ورىس ادەبيەتىن" مەكتەپ قابىرعاسىندا وقىتۋ – جاستاردى ورىس يدەولوگياسىنا بەيىمدەۋ ەمەس پە؟

ماديار ساۋدبايەۆ، وقىتۋشى: مەن جوو وقىتۋشىسى رەتىندە بۇل يدەيانى قولدايمىن. ق ر ورتا مەكتەپتەردەگى وقىتۋ باعدارلاماسىنان «ورىس ادەبيەتىن» جەكە ساعات ءبولىپ وقىتۋ دۇرىس ەمەس. ءبىراق، بۇل ورىس ادەبيەتىنەن تولىقتاي باس تارتۋ دەگەن ءسوز ەمەس. ءبىز قانشا جەردەن رەسەيمەن ەڭ جاقىن كورشى تۇرعانىمىزبەن، 70 جىل ءبىر وداقتا، ءبىر بايراقتىڭ استىندا بولعانىمىزبەن، بۇگىندە كەدەندىك جانە ەۆرازيالىق ەكونوميكالىق وداققا مۇشە بولعانىمىزبەن، ءقازىر يدەولوگيامىز بولەك، ءدىنىمىز بەن ءدىلىمىز بولەك، دەربەس مەملەكەتپىز. سونىدىقتان، بۇرىنعى ورىستاندىرۋ كەزەڭىنىڭ شەڭگەلىنەن شىعاتىن ۋاقىت الدە قاشان كەلگەن. ورتا مەكتەپتەردە ورىس ادەبيەتىن بولەك وقىتۋ – بۇل استىرتىن جۇرگىزىلىپ وتىرعان ساياسات سەكىلدى. ورىس مەكتەپتەرى بولسىن، قازاق مەكتەپتەرى بولسىن-الەم كلاسسيكتەرىنەن ەكشەلەپ، ءبىر ورىستى بولەك وقىتاتىنداي باسىمىزعا نە قارا كۇن تۋدى؟! مەن قازاقستاندىق ورتا مەكتەپكە ارنالعان "ورىس ادەبيەتى" وقۋلىعىنان (6 سىنىپقا ارنالعان) يسا پايعامباردىڭ (يسۋس حريستوس) ءومىرى تۋرالى تاقىرىپتى كورگەندە-اق، وسىنىڭ مۇلدەم دۇرىس ەمەس ەكەنىن ايتقام. قاراپ تۇرساڭىز، ءقازىر الەمنى ەلدەرى يسلام مەن تەرورريزمدى ەگىز ۇعىم دەپ قارايتىن بولدى. نەگە تەرروريزيمدى تەك يسلاممەن بايلانىستىرادى؟ مىسالى، قازاقستانداعى مىڭداعان ورىستىڭ شىركەۋلەرىندە استىرتىن ساياساتتىڭ جۇرگىزىلىپ جاتپاعانىنا كىم كەپىل؟ مىسالى، الماتىنىڭ قاق ورتاسىندا ورنالاسقان 28-پانفيلوۆشىلار پاركىندەگى ەسكى شىركەۋدىڭ اينالاسىندا ۇنەمى ساقالدارى جەر سۇزگەن ادامدار توپتاسىپ جۇرەدى. ول قالا بەردى، سول شىركەۋدىڭ ىشىندە دە، سىرتىندا دا اسكەري فورماداعى ورىس ازاماتتارىن ءجيى ۇشىراتامىز. بۇعان ءمان بەرىپ جاتقان ەشكىم جوق. كەرىسىنشە مۇسىلمان مەشىتتىڭ اينالاسىنان ساقالدى ەركەك، جاۋلىقتى قىزدى كورسە ورە تۇرەگەلىپ، تابالاۋعا دايىن تۇرامىز. ال ورىس اۆتورلارى شىركەۋ تۋرالى، يسا تۋرالى سوناۋ مەكتەپ وقۋلىقتارىندا-اق دارىپتەپ كەلە جاتقانىنا اسا زەر سالمايمىز. سوندىقتان، مۇنىڭ ارتىندا بىلدەي مەملەكەتتىڭ يدەولوگياسى جاتىر. ورىس ادەبيەتىن، ورىس جازۋشىلارى مەن ءدىندارلارىن قازاقستاندىق جاس وسكىنگە ارنايى وقىتۋ، وقۋشىلارعا مەكتەپ قابىرعاسىنان باستاپ دارىپتەۋ – ۇلتتىق يدەولوگيامىزعا مۇلدەم قايشى. ورىستىڭ كلاسسيكتەرىن ءبىرىڭعاي الەم ادەبيەتىنە قوسىپ وقىتۋ الدە قايدا ءتيىمدى دەپ ويلايمىن.

[poll id="4"]

گۇلزات توعجان قىزى