بۇگىن راحات الييەۆتىڭ ومىردەن وزعانى جايلى اقپارات تارادى. Facebook الەۋمەتتىك جەلىسىندە ر.الييەۆتىڭ رەسمي پاراقشاسى رەتىندە ۇسىنىلعان بەتتە 23 اقپان، ياعني كەشە عانا ونىڭ اكەسىنە جازعان حاتى جارىق كوردى. "قامشى" وسى جازبانى نازارلارىڭىزعا ۇسىنادى.

اكە، سەن قايتتى دەگەن حابار مەنىڭ قابىرعامدى قايىستىردى. مۇندا، ۆەنانىڭ تەرگەۋ يزولياتورىنا حابار كەش جەتەدى. ءقازىر سىزگە ارناپ ءبىر اۋىز ءسوز ايتۋ ماعان اۋىر. سەبەبى، ەكەۋىمىزدىڭ ارامىزدا كوپ نارسە ايتىلماي، جاسىرىن قالدى. سەن ماعان ءارقاشان ۇلگى بولاتىن ەدىڭ. سەنىڭ ءىزىڭدى قۋىپ، مەن دە سەن سەكىلدى مەديسينا سالاسىندا ءبىلىم الدىم. دارىگەر-حيرۋرگ بولدىم. اكە، سەن قىزىلوردانىڭ قۇمدى بورانىندا، جوقشىلىقتا، ءومىردىڭ تاۋقىمەتىن تارتىپ ءوستىڭ. ءبىراق، سوعان قاراماي، مەديسينانىڭ ۇلكەن شىڭىنا جەتتىڭ. بۇل، بىرىنشىدەن، سەنىڭ قايتپاس قاجىرلىلىعىڭنىڭ ارقاسى ەدى. سونان سوڭ، ق ر مەديسيناسىن ءوز قولىڭا الدىڭ، باسقاردىڭ. ماعان ءبىر جاعىنان قيىن، ەكىنشى جاعىنان وڭاي بولدى. سەنىڭ تانىمالدىلىعىڭنىڭ ارقاسىندا مەن دە بيلىككە كەلدىم.

سەن "كومەككە مۇقتاج پاسيەنتكە قولىڭنان كەلگەنشە كومەك بەرۋ مەنىڭ پارىزىم" دەۋشى ەدىڭ. مۇقتاجدارعا بولىسۋ، كومەك بەرۋ سەنىڭ ەل سۇيگەن قاسيەتتەرىڭنىڭ ءبىرى ەدى. ءبىز وتباسىمىزدا، وسى سەنىڭ كەڭ جۇرەگىڭ قانشاعا جەتەر ەكەن دەپ الاڭداۋشى ەدىك. ءبىراق، بۇل سەنىڭ تاڭداۋىڭ ەكەنىن مەن جاقسى ءتۇسىندىم. سەن مەديسيناداعى الييەۆتەردىڭ ديناستياسىن قۇردىڭ. سەنىڭ شاكىرتتەرىڭ قازاقستاننىڭ شار تارابىندا، ولار ەندى وزدەرى دوكتور، كانديدات جانە مىقتى حيرۋرگتەر تاربيەلەۋدە. مەن ۇقق باسقارۋعا تاعايىنداعان كەزدە سەنىڭ رەاكسياڭدى ءالى ۇمىتقان جوقپىن. سەن: "قولىڭدى بىلعاما!" دەپ ەدىڭ. سونداي-اق، "ۇقق، ۇقق - بۇل وتە لاس ساياسات"دەۋشى ەدىڭ. سوندا سەن: "سەن ەش نارسەنى وزگەرتە المايسىڭ. ۇقق- بۇل مەملەكەتتىك بيلىككە پاراللەلدى-بيلىك جانە ول ءارقاشان لاس نارسەلەرمەن اينالىسادى"دەپ ەدىڭ. مەن ۇقق-دا ىستەگەنىمنىڭ ءبىر عانا قايىرى بولسا، ول ۇقق ارحيۆىنەن اتام تۋرالى دەرەكتەردى تاپقانىم بولدى. ءتىپتى، ارحيۆتەردىڭ اراسىندا اتامنىڭ سۋرەتى دە بولعان ەدى. 1985-1987 جج. ونىڭ باسىنا كۇن تۋعان كەزدە ونىڭ جانىندا ەشكىم قالماعان ەدى. سوندا، سەن، ۆلاديمەر ني جانە سىزدىق ابىشيەۆ قانا بولعان ەدىڭدەر. سوندا سەن ءوز ەركىڭمەن مينيسترلىك ورىندى بوساتىپ، وتستاۆكاعا كەتتىڭ. سەنىڭ بۇل ورىندى بوساتۋىڭنىڭ باستى سەبەبى، ونى تىعىرىقتان شىعارۋ ەدى. ساعان بيلىك، ءمانساپ ەشقاشان قىزىق ەمەس ەدى. سەن "دارىگەر رەتىندە مەن حالىققا كەرەكپىن" دەدىڭ. ءبىزدىڭ وتباسىمىزعا كوڭىل ايتقان حاتىندا ەكى ءتۇرلى وي بىلدىرگەن. وعان راحمەت. ەڭ قۇرىعاندا مەنىڭ بالالارىم، سەنىڭ نەمەرەلەرىڭە سەنىڭ جەرلەۋ راسىمىڭە قاتىسۋعا رۇقسات بەردى. ول بۇل دۇنيەدە ەشكىمنىڭ ماڭگى ەمەس ەكەنىن تۇسىنسە كەرەك. ماعان (سەنىڭ جالعىز ۇلىڭا) ءقازىر وتە قيىن. سەنىڭ الدىڭداعى پەرەزەنتتىك پارىزىمدى وتەي الماعانىما قينالام. ءبىراق، بۇل ۋاقىت كەلەتىنىنە مەن سەنەم. راحات مۇحتار ۇلى الييەۆ P.S.  مەن بارلىق تۋعان-تۋىس، دوس، باۋىرلار مەن جاقىندارىما راحمەت ايتام. سونىمەن قاتار، اكەمنىڭ جەرلەۋ راسىمىنە قاتىسقان بارلىق تانىستارى مەن شاكىرتتەرىنە ريزاشىلىعىمدى بىلدىرگىم كەلەدى. اكەم تۋرالى ەستەلىكتەر سىزدەردىڭ كوڭىلدەرىڭىزدەن سۋىمايىنشا، اكەم ماڭگى جاسايتىن بولادى.