ەلباسى نۇرسۇلتان نازاربايەۆ قازاقستان حالقىن 1 مامىر مەرەكەسىمەن قۇتتىقتادى، دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساي وتىرىپ.

"قۇرمەتتى وتانداستار! بارشاڭىزدى 1 مامىر – قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن!

بۇل شىنايى جالپىحالىقتىق مەرەكە وتانشىلدىعىمىزدىڭ، تۋعان جەرگە دەگەن سۇيىسپەنشىلىگىمىز بەن ادالدىعىمىزدىڭ جارقىن سيمۆولى بولىپ سانالادى. بىرلىك پەن كەلىسىمنىڭ ارقاسىندا ءبىز تاۋەلسىز مەملەكەت قالىپتاستىرىپ، زور جەتىستىكتەرگە جەتتىك. الەمگە تانىلىپ، بيىك بەدەلگە يە بولدىق.

بىرلىك پەن كەلىسىمنىڭ ماڭىزدىلىعىن تولىق ۇعىنۋ – ەلىمىزدىڭ ۇيلەسىمدى ءارى ورنىقتى دامۋىنىڭ نەگىزگى فاكتورى.

بىرلىك، دوستىق جانە ءوزارا سىيلاستىق بولعان كەزدە عانا ءبىزدىڭ كەڭ بايتاق ورتاق وتانىمىز – قازاقستان رەسپۋبليكاسى مول بايلىق پەن باق-بەرەكەگە كەنەلەدى. وسى ماڭىزدى قۇندىلىقتار قوعامىمىزدىڭ دۇنيەتانىمىن انىقتاپ، ونىڭ ودان ءارى بىرىگە جانە جۇمىلا ءتۇسۋىنىڭ ايقىن باعدارى بولادى.

مەملەكەت ءومىرىنىڭ بارلىق سالاسىنداعى اۋقىمدى جاڭارۋ جاڭا بەلەستەردى باعىندىرىپ، جەڭىسكە جەتۋ جولىندا بىرلىگىمىز بەن تۇراقتىلىعىمىزدى نىعايتۋعا سەپتىگىن تيگىزەدى دەپ سەنەمىن.

بارشاڭىزعا زور دەنساۋلىق، باق-بەرەكە جانە جاڭا تابىس تىلەيمىن!" - دەپ جازىلعان قۇتتىقتاۋدا.