جەلىدە ءوزىنىڭ سەكس-قۇلدىقتان قاشىپ شىققانىن ايتىپ، بازارداعى حالىقتان كومەك سۇراعان قىزدىڭ ۆيدەوسى تارادى، دەپ حابارلايدى Qamshy.kz اقپارات اگەنتتىگى.

وقيعا 2018 جىلى 5 مامىردا ساعات 17:00 شاماسىندا الماتىداعى «ساياحات» اۆتوبەكەتىنىڭ ماڭىندا بولعان كورىنەدى.

كادردا ءبىر قىزدى بىرنەشە ادام الىپ كەتۋگە تىرىسىپ جاتىر. بازارداعى ساتۋشىلار قىزعا اراشا ءتۇسىپ، ونى «قۋعىنشىلارعا» بەرمەي قويادى. قىزدىڭ ارتىنان قۋىپ كەلگەن Toyota Camry كولىگى ادامداردى باسۋعا شاق قالىپ، قاشىپ كەتەدى.

ال قىز «جەدەل جاردەم» كولىگىنە وتىرۋدان باس تارتىپ: «اناۋ بارادى ءقازىر. ولار مەنى بولنيسادان الىپ كەتەدى، جىبەرمەڭدەرشى»، – دەپ ەلگە جالىنادى.

قىزدى قورعاعان ايەلدەر: «قازاقتىڭ قىزدارىن قىرعىزدارعا ساتىپ قورلاتىپ، سولاردىڭ اتىنان اقشا جاساماقسىڭدار»، – دەپ الدەكىمدەردى ايىپتايدى.

«مىنالار ادام ساتىپ ءجۇر»، «ءبىر قورا ادام ءبىر قىزدى قۋىپ ءجۇر عوي، كونەچنو ساتادى»، – دەگەن داۋىستار انىق ەستىلەدى.

ءوزىن ەرجان دەپ تانىستىرعان كۋاگەردىڭ ايتۋىنشا، بۇل قىز «ساياحات» اۆتوبەكەتى ماڭىندا ءجۇرىپ بارا جاتقان كولىكتەن سەكىرىپ تۇسكەن. ەكىنشى ءبىر كولىك ونى بايقاماي قاعىپ وتكەن.

– قىز جانۇشىرا تۇرا سالىپ، ءبىر اياعىندا اياق كيىمى جوق، بازارعا قاشىپ كىردى. بازار كۇزەتشىلەرىنە بارىپ كومەك سۇرادى. ونىڭ ارتىنان بىرەۋلەر قۋىپ كەلىپ، «اپكەسىمىن»، «اعاسىمىن»، «تۋىسىمىن» دەپ قىزدى الىپ كەتپەكشى بولدى. ءبىراق قىز: «مەن بۇلارمەن بارمايمىن، مەن 4 جىل قۇلدىقتا بولدىم. بۇلار مەنى بۇرىن دا وسىلاي قاشقان كەزدە ۇستاپ العان. ول جەردە قىزدار كوپ»، – دەپ جىلادى. سويلەي الماي دىرىلدەپ، ەسى شىعىپ، قاتتى قورقىپ قالعان. ولاردىڭ جەڭگەتايلارى قىرعىزدار ەكەن. جوعارعى باسشىلارمەن دە بايلانىسى بار، ءبىر سوزبەن ايتقاندا، ءتىس باتپايتىن دوكەيلەر. جالعان اقپارات دەسەڭىزدەر، «ساياحات» قىزمەتكەرلەرى كۋا، – دەيدى ەرجان.