سيريا پرەزيدەنتى باشار اساد جاقىن ارادا دونالد ترامپپەن كەزدەسۋى مۇمكىن ەكەنىن ايتتى.
«كەز كەلگەن كەزدەسۋ ناتيجە بەرۋگە ءتيىس، ءبىراق ترامپ سەكىلدى تۇراقسىز ساياساتكەرمەن قانداي مەجەگە جەتۋگە بولاتىنى بەلگىسىز»، - دەيدى سيريا كوشباسشىسى.
ءوزىن «حايۋان» دەپ بالاعاتتاعان اقش پرەزيدەنتىنە جاۋاپ بەرگەن اساد «مۇنداي مالىمدەمە امەريكاندىق مادەنيەتكە ساي ما ەكەن؟»،- دەپ قىزىعۋشىلىق تانىتتى. «الەمدە مۇنداي بالاعات سوزدەردى قولداناتىن قوعام بارىنا كۇمانمەن قارايمىن»،- دەدى اراب ەلىنىڭ باسشىسى.
اساد وزىنە ايتىلعان مۇنداي بالاعات سوزدەرگە تەك ساياساتكەر رەتىندە نازار اۋداراتىنىن، ال ءوز باسىنا مۇنىڭ ەشبىر اسەرى جوق ەكەنىن اڭعارتتى. «ءقازىر مەنىڭ ەلىمدە بولىپ جاتقان سوعىس پەن تەرروريستەر تۋرالى پىكىرلەر عانا ماڭىزدى»، - دەيدى اساد.
ەسكە سالا كەتەيىك، دونالد ترامپ ءساۋىر ايىندا ءوزىنىڭ تۆيتتەر پاراقشاسىندا: «پۋتين، رەسەي جانە يران حايۋان اسادتى قولداعاندارى ءۇشىن جاۋاپتى»، - دەپ جازعان بولاتىن. كرەمل سيريا پرەزيدەنتىنە باعىتتالعان بۇل مالىمدەمەگە «ادەپسىزدىك پەن نامىسقا تيۋ» دەپ باعا بەردى.
