الماتى قالاسىنداعى الاتاۋ اۋدانىندا 164 كوشەنىڭ اتاۋى وزگەردى، دەپ حابارلايدى Qamshy.kz اقپارات اگەنتتىگى. بۇل تۋرالى ساياساتتانۋشى ايدوس سارىم ءوزىنىڭ Facebook-تاعى پاراقشاسىندا جازدى.

"98 پايىزى قازاقى اتاۋ! اراسىندا فاريزا وڭعارسىنوۆا، موڭكە بي، مولديار سەرىكبايەۆ، رافيقا نۇرتازينا، جاڭگىر حان، ءابىش كەكىلبايەۆ، ءابىلقايىر حان، ەركەعالي راحمادييەۆ، حاسەن ورالتاي، ساعي ءاشىموۆ، باتىرحان شۇكەنوۆ اتىنداعى كوشەلەر بار! قۇتتى بولسىن! — دەپ ءسۇيىنشى سۇرادى ايدوس سارىم.

كۇنى كەشە "قامشى" پورتالىندا "الماتى كوشەلەرىندە بوداندىقتىڭ ءىزى سايراپ جاتىر" دەگەن ماقالا جارىق كورگەن ەدى. اۆتور الماتىدا ۇلكەندى-كىشىلى 711 كوشە بار ەكەنىن ايتىپ، ونىڭ 100-گە جۋىعى ورىستاردىڭ ەسىم-سويىمەن اتالاتىنا قىنجىلعان.

ايتا كەتەيىك، "رۋحاني جاڭعىرۋ" باعدارلاماسىنىڭ اياسىندا جالپى قازاقستان بويىنشا كوشە اتاۋلارى قازاقشالانىپ جاتىر. مىسالى، جاقىندا پاۆلودارداعى كۋتۋزوۆ كوشەسىن تاۋەلسىزدىك داڭعىلى دەپ اتاۋ ماقۇلداندى. شقو بەلسەندىلەرى وسكەمەندەگى ۆوروشيلوۆ كوشەسىنە شاكارىمنىڭ اتىن بەرۋ كەرەك دەپ وبلىس اكىمىنە حات جازدى.