تۇران دالاسىن مەكەن ەتكەن قازاق پەن وزبەكتىڭ مادەني ءھام ءدىنىي بايلانىسى ەجەلدەن ەتەنە جاقىن. مەملەكەتتىك دەڭگەيدەگى باۋىرلاستىق ميرزەيەۆتىڭ پرەزيدەنتتىك كەزەڭىنەن كەيىن ودان ءارى جاندانا ءتۇستى. بيىل قازاقستاندا وزبەكستان جىلى بولىپ جاريالانعانى اعايىندى قازاق-وزبەك حالىقتارىنىڭ اراسىنداعى ىنتىماقتاستىق جاڭا دەڭگەيگە كوتەرە تۇسەتىنى داۋسىز.

بۇگىن قازاقستان رەسپۋبليكاسىنىڭ ءدىن ىستەرى جانە ازاماتتىق قوعام ءمينيسترى دارحان كالەتايەۆ وزبەكستاننىڭ قازاقستان رەسپۋبليكاسىنداعى ەلشىسى سايديكرام نيازحودجايەۆپەن كەزدەسۋ وتكىزدى، دەپ حابارلايدى Qamshy.kz اقپارات اگەنتتىگى ق ر ءدىن ىستەرى جانە ازاماتتىق قوعام مينيسترلىگىنىڭ باسپا ءسوز قىزمەتىنە سىلتەمە جاساپ.

كەزدەسۋ بارىسىندا ەكى جاقتى ىنتىماقتاستىقتى ودان ءارى دامىتۋ ماسەلەلەرى تالقىلاندى. دارحان كالەتايەۆ ەكى ەل اراسىندا دوستىق جانە باۋىرلاستىق قارىم-قاتىناس قالىپتاسقانىن اتاپ ءوتتى.

ءمينيستردىڭ ايتۋىنشا، 2018 جىلى قازاقستانداعى وزبەكستان جىلىنىڭ اياسىندا باۋىرلاس ەلدەر اراسىنداعى دوستىقتى ودان ءارى نىعايتۋعا ىقپال ەتەتىن ءتۇرلى ءىس-شارالار وتكىزىلەتىن بولادى.  

كەزدەسۋدە 2017 جىلعى 10 ناۋرىزدا قازاقستان مەن وزبەكستاننىڭ قاۋىپسىزدىك كەڭەستەرى اراسىنداعى كونسۋلتاسيالار شەڭبەرىندە قول جەتكىزىلگەن ۋاعدالاستىقتاردى ىسكە اسىرۋ اياسىندا ءدىني قىزمەتتى رەتتەيتىن ۋاكىلەتتى مەملەكەتتىك ورگاندار اراسىندا مەموراندۋمعا قول قويۋ ماسەلەسى تالقىلاندى.  

د. كالەتايەۆ جاقىن ارادا ىنتىماقتاستىقتىڭ باسىم باعىتتارىن كورسەتەتىن اتالعان كەلىسىمگە قول قويىلاتىنىنا سەنىم ءبىلدىردى.

وزبەكستاننىڭ قازاقستانداعى ەلشىسى سايديكرام نيازحودجايەۆ ەكى ەل جاستارىنىڭ فورۋمىن وتكىزۋ، ءدىني ءتۋريزمدى دامىتۋ بويىنشا بىرلەسكەن جۇمىستى ۇيىمداستىرۋدى ۇسىندى.

كەزدەسۋ سوڭىندا تاراپتار ءدىن، ازاماتتىق قوعام جانە جاستار ساياساتى سالاسىنداعى ىنتىماقتاستىقتى ودان ءارى تەرەڭدەتۋگە نيەت ءبىلدىردى.

ايتا كەتەتىن بولساق، ناۋرىز ايىندا عانا قمدب باس ءمۇفتيى سەرىكباي قاجى وراز وزبەكستانعا جاساعان رەسمي ساپارى بارىسىندا ەكى ەلدىڭ مۇفتيلەرى ءدىن سالاسىنداعى ۇزاقمەرزىمدى ىنتىماقتاستىقتى ورناتۋعا ارنالعان قۇجاتقا قول قويعان بولاتىن.