مەملەكەت باسشىسى نۇرسۇلتان نازاربايەۆ جۇمىس ساپارىمەن بقو-دا ءجۇر، دەپ جازادى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سۇيەنىپ.
ساپارى بارىسىندا ەلباسى «كۆانت» جاۋاپكەرشىلىگى شەكتەۋلى سەرىكتەستىگىنىڭ جيھاز جاسايتىن فابريكاسىنا باردى. وندا تۇتاس جيھاز جاساۋدىڭ تەحنولوگيالىق ۇدەرىسىمەن تانىستى.
قازاقستان پرەزيدەنتىنە كاسىپورىننىڭ قازىرگى قارجى-شارۋاشىلىق جاعدايى تۋرالى مالىمەت ۇسىنىلىپ، ءوندىرىس اۋقىمىن ۇلعايتۋ جانە دايىن ءونىم تىزبەسىن كەڭەيتۋ جوسپارى جونىندە باياندالدى.
سونىمەن قاتار، فابريكانى ارالاۋ كەزىندە نۇرسۇلتان نازاربايەۆقا ءوڭىردىڭ الەۋمەتتىك-ەكونوميكالىق دامۋ بارىسى، سونىڭ ىشىندە ونەركاسىپ سەكتورىنىڭ، شاعىن جانە ورتا بيزنەستىڭ قازىرگى احۋالى مەن پەرسپەكتيۆالارى جونىندە باياندالدى.
بۇدان بولەك، كاسىپورىن اۋماعىندا مەملەكەت باسشىسىنا يندۋستريالىق-يننوۆاسيالىق دامۋ باعدارلاماسى اياسىندا جۇزەگە اسىرىلىپ جاتقان جوبالار تانىستىرىلدى. اتاپ ايتقاندا، فين تەحنولوگياسى بويىنشا تۇرمىستىق قاتتى قالدىقتاردى قايتا وڭدەۋ جۇيەسىن جاڭعىرتۋ، ءىرى قارا مەن ۇساق مالدىڭ تەرىسىن وڭدەۋ، نان جانە ماكارون ونىمدەرىن ءوندىرۋ، حيميا ءوندىرىسى، ديزەل وتىنىنىڭ كومپونەنتتەرىن گيدروتازالاۋ جونىندەگى جوبالار بار.
«كۆانت» كومپانياسى پورولون، ماتراس، تۇتاس جانە جۇمساق جيھاز جاساۋمەن اينالىسادى. وندىرىستە قولدانىلاتىن بارلىق ماتەريال ەكولوگيالىق تۇرعىدان تازا ءارى مەملەكەتتىك ستاندارتتارعا ساي كەلەدى.
جيھاز ەۋروپالىق تاۋار وندىرۋشىلەردىڭ زاماناۋي قۇرال-جابدىعىمەن وزىق تەحنولوگيالار قولدانىلا وتىرىپ جاسالادى.
