«Qazaq Banki» اق اكسيونەرى باقىت يبراگيم جانە «RBK» بانكى»اق باسقارما ءتوراعاسىنىڭ بۇرىنعى كەڭەسشىسى جومارت ەرتايەۆ ءبىر ءىس بويىنشا كۇدىكتى بولىپ وتىر. بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ باسپا ءسوز قىزمەتى حابارلادى.

سىبايلاس جەمقورلىققا قارسى كۇرەس اگەنتتىگى «بانك RBK» اق-نىڭ اسا ءىرى كولەمدە قارجىسىن جىمقىردى دەگەن كۇدىكپەن باسقارمانىڭ بۇرىنعى كەڭەسشىسى جومارت ەرتايەۆ پەن «Qazaq Banki» اق اكسيونەرى باقىت يبراگيمدى كىنالى دەپ تاپتى. قازىرگى تاڭدا اتالعان ءىس بويىنشا تەرگەۋ امالدارى جۇرگىزىلىپ جاتىر»،-دەپ حابارلادى ۆەدومستۆا.

«الدىن الا تەرگەۋ بارىسىندا قىلمىستىق كودەكستىڭ 190-بابىنىڭ 2-بولىگى، 2ء-بولىمى (ءىرى مولشەردەگى الاياقتىق) بويىنشا قىلمىستىق ارەكەتتەرىن جۇرگىزۋ ءۇشىن جەتكىلىكتى دالەل جينالدى، - دەلىنگەن حابارلامادا.

«ەرتايەۆ پەن يبراگيم شەتەلدە تەرگەۋ ورگاندارىنان جاسىرىنىپ جۇرگەندىكتەن، ولارعا حالىقارالىق ىزدەۋ جاريالاندى. يبراگيم 23 ساۋىردە گەرمانياداعى فرانكفۋرت مايندا، ەرتايەۆ 8 مامىردا ماسكەۋدە ۇستالدى. باس پروكۋراتۋرا رەسەي مەن گەرمانيانىڭ قۇزىرەتتى ورگاندارىنا ولاردى قازاقستان رەسپۋبليكاسىنا ەكستراديسيالاۋ تۋرالى وتىنىشتەر جىبەردى»، - دەپ اتاپ ءوتتى اگەنتتىك وكىلى. وسى تۇستا جومارت ەرتايەۆتىڭ رەسەيدىڭ ازاماتتىعىن سۇراعانىن ەستەرىڭىزگە سالامىز.

ق ر قىلمىستىق كودەكستىڭ 201-بابىنىڭ 1-تارماعىنا سايكەس تەرگەۋگە قاتىستى باسقا اقپاراتتار ازىرگە قۇپيا بولىپ وتىر.  

ەستەرىڭىزگە سالامىز، وسىعان دەيىن پرەزيدەنت نازاربايەۆ ەلدەگى ەكسيمبانك، Qazaqbank جانە استانا بانكتىڭ جاعدايى جونىندە: «بانك مەنەدجەرلەرى باسقارۋ جۇمىستارىن دۇرىس جۇرگىزبەي، ابدەن قارىزعا باتقان»، — دەگەن بولاتىن. Qazaqbank-تىڭ جۇمىسىنىڭ السىرەۋىن بانك وكىلدەرى 2013-2016 جىلدارداعى «ساپاسىز نەسيەلەرمەن» بايلانىستىرادى. ول كەزدە بانكتى جومارت ەرتايەۆ پەن يبراگيم باقىت باسقارعان ەدى.