سەرىكباي قاجى وراز رەسەي مۇسىلماندارى ءدىني باسقارماسىنىڭ ءتوراعاسى راۆيل گاينۋتديننىڭ رەسمي شاقىرۋىمەن ماسكەۋ قالاسىنا باردى، دەپ حابارلايدى Qamshy.kz اقپارات اگەنتتىگى قمدب باسپا ءسوز قىزمەتىنە سىلتەمە جاساپ.

باس ءمۇفتي قالاداعى «دون» قورىمىن زيارات ەتىپ، كورنەكتى قوعام جانە مەملەكەت قايراتكەرى، ۇلت ماقتانىشى ءاليحان بوكەيحان مەن نىعمەت نۇرماق ۇلىنىڭ رۋحىنا قۇران باعىشتاپ، دۇعا جاسادى.

قورىمدى زيارات ەتۋ راسىمىنە ماسكەۋدە وقىپ جاتقان قازاق جاستارى دا قاتىستى. ولارعا ناسيحات ايتقان باس ءمۇفتي: «حالقىمىزدىڭ باسىنان تالاي ناۋبەتتى زاماندار ءوتتى. ۇلت قامىن قاراقان باسىنىڭ مۇددەسىنەن جوعارى قويا بىلگەن كەشەگى الاش ارىستارى ەلىمىز بەن جەرىمىزدىڭ ەرتەڭى ءۇشىن ءوزىن قۇربان ەتتى، شەيىت بولدى. اللا تاعالا ەل ءۇشىن وپات بولعان بابالارىمىزدى ءوز راقىمىنا بولەگەي. ولاردىڭ كۇرەسكە تولى ءومىرى ۇرپاق ءۇشىن قاشان دا وشپەس ونەگە بولىپ قالا بەرەدى. اللاعا شۇكىر، ولار كورە الماي كەتكەن تاۋەلسىزدىكتى ءبىز كورىپ وتىرمىز. قۇدايعا شۇكىر، تاۋەلسىزدىك جولىندا شەيىت بولعانداردىڭ ارمان-تىلەگى ورىندالدى. ەندەشە، بۇگىنگى ەگەمەن ەلدىڭ جاستارى ءۇشىن نامىس، بىلىمگە قۇشتارلىق، يماندىلىق سىندى مىنەز بەن اسىل سيپاتتار كەرەك. بۇگىنگى بەيبىت زاماننىڭ كۇرەسكەر ازاماتتارى وسىنداي بولۋى قاجەت»، – دەدى.

قمدب ءتوراعاسى زيراتتى زيارات ەتكەننەن كەيىن ماسكەۋدە وقىپ جاتقان قازاق جاستارىمەن سۇحباتتاسىپ، ەمەن-جارقىن اڭگىمەلەستى.