«I am a singer Kazakhstan» حالىقارالىق تالانت شوۋىنىڭ ەكىنشى ماۋسىمى باستالدى. وسىعان وراي قازاقستان باسپا ءسوز كلۋبىندا باسپا ءسوز وتىرىسى ءوتتى. وعان "31-ارنا" باس ديرەكتورى باعدات قوجاحمەتوۆ پەن «I am a singer Kazakhstan» شوۋىنىڭ ساراپشىسى، ءانشى ساكەن مايعازييەۆ قاتىستى، دەپ حابارلايدى Qamshy.kz اقپارات اگەنتتىگى. 

كونفەرەنسيادا ءسوز العان باعدات بولاتجان ۇلى بيىلعى «I am a singer Kazakhstan» شوۋىنىڭ ءبىرىنشى ماۋسىمنان ايىرماشىلىعىن اتاپ ءوتتى. ونىڭ ايتۋىنشا، بيىلعى جوباعا تالانتى بار كەز كەلگەن سالانىڭ وكىلى قازاقستان مەن الەمنىڭ تۇكپىر-تۇكپىرىنەن كەلىپ قاتىسا الادى.

بيىلعى جوباعا گرۋزيا، تۇركيا جانە ءۇندىستاننىڭ ونەرپازدارى قاتىسۋعا نيەت ءبىلدىردى. "31-ارنا" باس ديرەكتورىنىڭ ايتۋىنشا، قىتايدا «I am a singer Kazakhstan» جوباسىنا ەرەكشە قىزىعۋشىلىق تانىتىپ وتىر. باعدات قوجاحمەتوۆتىڭ بەرگەن مالىمەتىنە سايكەس، بىلتىر قىتايدا "I am a singer Kazakhstan" شوۋىنىڭ ءبىرىنشى ماۋسىمىن 150 ميلليون ادام تاماشالاعان. وعان قازاقستاندىق ءانشى ديماش قۇدايبەرگەننىڭ قىتايداعى بەدەلى مەن تانىمالدىلىعى اسەر ەتكەنىن ايتادى.

- ءبىرىنشى ماۋسىمدا "شەتەلدىك انشىلەر بايقاۋعا قاتىسۋ ءۇشىن سول ەلدىڭ ۇلتتىق تەلەارناسى شوۋدى كورسەتۋ قاجەت" دەگەن شارت بولاتىن. بىلتىر بۇل شارتتى الىپ تاستادىق. سەبەبى "I am a singer Kazakhstan" بايقاۋىنا قازاقستاندا دا، شەتەلدە دە قىزىعۋشىلىق زور ەكەنىنە كوزىمىز جەتتى. اسىرەسە، قىتايدا. وعان ديماشتىڭ اسەرى جوق ەمەس. قىتايلىقتار قازاقستاندا 18 ميلليون ديماش تۇرادى ويلاسا كەرەك، - دەيدى "31-ارنا" باس ديرەكتورى.

"I am a singer Kazakhstan" حالىقارالىق تالانت شوۋىنىڭ ەكىنشى ماۋسىمىنىڭ تاعى ءبىر ەرەكشىلىگى - بيىل جوبانى بىردەن ەكى تەلەارنا كورسەتەدى. شوۋدىڭ ءوزىن "31-ارنادان" تاماشالاپ، ونىڭ كۇندەلىگىن «Muzzone» تەلەارناسىنان كورە الاسىزدار.  

اتالمىش جوباعا بىردەن ەكى تەلەارنانىڭ ەفير ۋاقىتى بەرىلگەنى بەكەر ەمەس. بىلتىرعى شوۋ حالىق اراسىندا ۇلكەن سۇرانىسقا يە بولىپ، كورەرمەن سۇيىسپەنشىلىگىنە بولەنگەن. وعان جوعارى رەيتينگ دالەل.

بىلتىر "I am a singer Kazakhstan" حالىقارالىق تالانت شوۋى الەمنىڭ 6 ەلىندە تارالىپ، 8 ەلدىڭ تەلەارناسىندا كورسەتىلگەن. شوۋدى 200 ميلليوننان اسا ادام تاماشالاعان.

- "I am a singer Kazakhstan" شوۋىنىڭ قامتىعان اۋماعى مەن اۋقىمى كەڭ، ۇيىمداستىرىلۋ دەڭگەيى جوعارى، ساپاسىنا قويىلعان تالاپ جوعارى بولدى. قازاقستاندىق نارىقتىڭ الدىنا بيىك بەلەستى بەلگىلەپ بەردى. رەيتينگ كورسەتىپ وتىرعانداي، شوۋ كورەرمەننىڭ دە، ۇيىمداستىرۋشىلاردىڭ دا كوڭىلىنەن شىقتى، - دەيدى باعدات بولاتجان ۇلى.

قاتىسۋشىلاردىڭ تالانتىن باعالايتىن ساراپشى ساكەن مايعازييەۆ ۋاقىتتىڭ تىعىزدىعىنا قاراماستان «I am a singer Kazakhstan» شوۋىندا ساراپشى بولۋعا قۋانا كەلىسكەنىن ايتادى.

- ماعان وسىنداي ۇسىنىس كەلگەندە قۋاندىم. سەبەبى "I am a singer Kazakhstan" شوۋى ماعان قاتتى ۇنايدى. شوۋعا قاتىسقان قايرات، ەردەن، جارقىناي جانە باسقا دا بارلىق قاتىسۋشىلار وزدەرىنىڭ بارلىق مۇمكىندىگىن اشىپ، كاسىبي دەڭگەيىن كورسەتە ءبىلدى. قانشا تالانت تاسادا قالىپ قويىپ جاتىر. وسى جوبا ناعىز تالانتتارعا ونەرىن پاش ەتۋگە كەرەمەت مۇمكىندىك بەرىپ وتىر، - دەدى ساكەن مايعازييەۆ.

ءانشىنىڭ بۇلاي دەۋىنە نەگىز دە جوق ەمەس. ەكىنشى ماۋسىمدا جۇلدەلى 3 ورىنعا يە بولعاندار سالماقتى سىيلىقتاردى يەلەنەدى. بيىلعى شوۋدىڭ جۇلدە قورى – 50 000 000 ميلليون تەڭگە.

- 50 000 000 ميلليون تەڭگە ءبىرىنشى، ەكىنشى جانە ءۇشىنشى ورىن اراسىندا ۇلەستىرىلەدى. باس جەڭىمپاز الماتىدا جەكە كونسەرتىن وتكىزىپ، جاڭا ءانىن جازىپ، بەينەبايان تۇسىرۋگە جانە ونى قازاقستاندىق راديوستانسيالاردا، مۋزىكالىق تەلەارنالاردا جىل بويى روتاسيالاۋعا مۇمكىندىك الادى، - دەدى باعدات بولاتجان ۇلى.

شوۋدىڭ ەكىنشى ماۋسىمىندا 4 ساراپشى بولادى. ونىڭ ۇشەۋى تۇراقتى بولسا، ءتورتىنشىسى تاۋەلسىز، ياعني اۋىسىپ وتىرادى. شوۋ ۇيىمداستىرۋشىلارى ازىرگە انشىلەردىڭ ونەرىن باعالايتىن باسقا دا ساراپشىلاردىڭ ەسىمىن اتاماي وتىر. بۇل كورەرمەن ءۇشىن جاعىمدى توسىنسىي بولماق. قىسقاسى، ەكىنشى ماۋسىمدا كورەرمەندى كوپتەگەن قىزىق كۇتىپ تۇر.

"I am a singer Kazakhstan" حالىقارالىق تالانت شوۋىنىڭ ەكىنشى ماۋسىمىندا زالدا وتىرعان كورەرمەن ۇمىتكەرلەرگە داۋىس بەرە الادى. ول ءۇشىن ارنايى قۇرىلعى ورناتىلادى. ەگەر جوباعا قاتىسۋشىنىڭ ونەرى زالداعى كورەرمەننىڭ 50 پايىزىنا ۇناسا، قازىلار القاسى دا ونىڭ شىعارماشىلىعىن باعالاي الادى.

جوباعا قاتىسۋ ءۇشىن وتىنىمدەردى قابىلداۋ باستالدى. ول 2018 جىلدىڭ 28 شىلدەسىنە دەيىن جالعاسادى. ءوتىنىم بەرۋ ءۇشىن singer.31.kz سايتىنداعى ساۋالنامانى تولتىرۋ قاجەت. سونىمەن قاتار ۇمىتكەردىڭ فوتوسى مەن ۆيدەو قوسا جىبەرىلەدى. قاتىسۋشىنىڭ جاسى 16-دان تومەن بولماۋى ءتيىس.