قازاقستان رەسپۋبليكاسىنىڭ رەسەي فەدەراسياسىنداعى ەلشىسى يمانعالي تاسماعامبەتوۆ ۆدنح-دا قايتا جوندەلىپ جاتقان قازاقستاندىق عيمارات كەشەنىنە بارىپ كوشپەلى جيىن وتكىزدى.

ءتۇرلى كورمەلەر ورتالىعىنا اينالعان  ماسكەۋدەگى ۆدنح-داعى قازاقستاندىق عيمارات كەشەنى استانانىڭ 20 جىلدىعىنا وراي قايتادان جاعارتىلىپ، ساۋلەت ونەرىنىڭ سوڭعى ۇلگىسىنە ساي اسپەتتەلىپ، سۋ جاڭا كۇيىندە اشىلۋعا ازىرلىك جۇمىستارىن جۇرگىزۋدە. قۇرىلىس جۇمىستارىنا جاۋاپتى تۇلعالارعا  جيىن وتكىزگەن قازاقستاننىڭ ەلشىسى يمانعالي تاسماعامبەتوۆ، بۇل ەڭ الدىمەن ەلباسى ن.ءا. نازاربايەۆتىڭ قولداۋىمەن جاسالىپ جاتقان ءىرى جوبا. جۋىردا ءبىزدىڭ كەشەن وسى جەردىڭ ءىنجۋ-مارجانىنا اينالىپ، ەلىمىزدىڭ ابىرويىن رەسەي جەرىندە اسقاقتاتاتىنىن ايتتى.

بۇگىنگى كۇنى قۇرىلىس جۇمىستارىنىڭ قارقىنىنا قاراپ، عيماراتتىڭ تەك ىشكى عانا ەمەس، سونداي-اق سىرتقى  كەلبەتى ايرىقشا وزگەرەتىنى بايقالىپ وتىر. سەبەبى قايتا جاڭارتىلىپ جاتقان  كەشەننىڭ سۇلباسى ادام تانىماستاي وزگەرگەن. 

"قازاقستاننىڭ عيماراتى وزگەلەرگە قاراعاندا وق بويى وزىق تۇرۋى شارت. سول سەبەپتى قۇرىلىس جۇرگىزىپ جاتقان توپ ەڭ الدىمەن ساپاسىنا ءمان اۋدارسا، ونىڭ ۋاقتىلى ءبىتىرۋىن دە قاپەرىنەن شىعارىپ الماۋى ءتيىس"،-دەپ پىسىقتادى يمانعالي تاسماعامبەتوۆ.

سونىمەن قاتار، ەلشى مىرزانىڭ ايتۋىنشا، كۇردەلى جوندەۋ جۇمىستارى بارىسىندا عيماراتتىڭ كىرە بەرىسى، ىشكى قۇرىلىمى مەن مۇسىنشەلىك كومپوزيسياسى  ەرەكشە ساۋلەت ونەرىنىڭ تالاپتارىنا ساي جاسالسا، باسپالداعى مەن تەرەزە اينەكپەن كومكەرىلگەن كۇمبەز ءتارىزدى شاڭىراعى جاڭادان سالىنادى. 

ەسكەرە كەتۋ كەرەك، فەدەرالدىق ماعىنادا مادەني مۇرا رەتىندە تانىلعان №11 "مەتاللۋرگيا" كەشەنى 1964 جىلى قازاق كسر-نىڭ حالىق شارۋاشىلىق جەتىستىكتەرىن كورسەتەتىن، كەيىننەن رەسپۋبليكامىزدىڭ ءتۇرلى-تۇستى مەتاللۋرگيا، مۇنايگاز جانە كومىر ءوندىرۋ ونەركاسىبىن پاش ەتەتىن جەرىنە اينالدى. ال  2011 جىلى رەسەي فەدەراسياسى ۇكىمەتىنىڭ جارلىعىنا سايكەس قازاقستانعا 50 جىلعا جالعا بەرىلدى.