تۇركيا پرەزيدەنتى تايىپ ەردوعان ەلدەگى "Uber" تاكسي قىزمەتىنىڭ توقتاعانىن مالىمدەدى، دەپ جازادى Qamshy.kz اقپارات اگەنتتىگى Daily Sabah - قا سىلتەمە بەرىپ.
"ەندى Uber بيزنەسى جوق. ءوزىمىزدىڭ تاكسي جۇيەمىز بار، ال جەكە تاكسيلەردىڭ تۇرىك تاكسي جۇرگىزۋشىلەرىنىڭ بيزنەسىن بۇزۋعا جول بەرمەيمىز"، - دەدى ەردوعان.
"News Turk"- ءتىڭ حابارلاۋىنشا، كوكتەمدە ستامبۋلدىڭ تاكسي جۇرگىزۋشىلەرى مەن Uber تاسىمالداۋشىلارى اراسىندا تەكەتىرەس بولىپ، ارتىنشا كيكىلجىڭ ۇلكەن داۋعا اينالعان. تاكسي جۇرگىزۋشىلەرى نارازىلىق بىلدىرگەن.
Uber تۇركيادا 2014 جىلدان بەرى جۇمىس جاساپ كەلەدى. سوڭعى دەرەكتەرگە سۇيەنسەك، ەلدە كولىكپەن قىزمەت كورسەتۋشىلەردىڭ سانى شامامەن 5 مىڭعا جەتكەن. Uber XL شاعىن اۆتوبۋستارى جەرگىلىكتى تۇرعىندار مەن تۋريستەر اراسىندا ەڭ قولايلى كولىك ءتۇرى بولىپ ۇلگەرگەن ەدى.
قازاقستاندا Uber جانە ياندەكس تاكسي قىزمەتى نارىقتاعى ءوز ورنىن ۇستاپ تۇر. وسى سەبەپتى تاكسي پاركتەرىنىڭ تابىسى ەكىنشى جىل قاتارىنان تومەن بولىپ وتىر.
