ينتەرنەت-كونفەرەنسيامىزدىڭ كەزەكتى قوناعى - بەلگىلى قاجىلىق ساپارىن ۇيىمداستىرۋشى، «نۇر-قازاقستان» قاجىلىق كومپانياسىنىڭ پرەزيدەنتى، فيلوسوفيا عىلىمدارىنىڭ كانديداتى، دوسەنت، كوپتەگەن عىلىمي ەڭبەكتەردىڭ اۆتورى امانگەلدى ەرەنعايىپ ۇلى.
ول قاجىلىقتا 74 مارتە (20 ۇلكەن قاجىلىق، 54 ۋمرا) بولعان. وسى ۋاقىتقا دەيىن 10 مىڭنان استام قازاقستان قاجىلارىن ساۋد ارابياسىنا الىپ بارۋعا جەتەكشىلىك ەتتى. 2007 جىلى ساۋد ارابياسى شەيحتارىنىڭ قولىنان قاعبانىڭ التىنمەن جالاتىلعان جازۋى بار كيسۋاسىن (جامىلعىسىن) سىيلىققا الدى. ال، 2008 جىلى قاسيەتتى قاعبانىڭ ىشىنە كىرىپ، دۇعا تىلەۋ مۇمكىندىگىنە يە بولدى. 2009 جىلى «ءال-اقسا مەشىتىنىڭ تاريحى» ەڭبەگى پالەستينادا جوعارى باعالانىپ، ءال-اقسا مەشىتىنىڭ باس يمامى شەيح مۇحاممەدتىڭ قولىنان «قۋبباتۋس-ساحرا» مەشىتىنىڭ التىن كۇمبەزىنىڭ ءبىر بولىگى بەينەلەنگەن ەسكەرتكىش سىيعا بەرىلدى. 2010 جىلى ەكىنشى رەت قاسيەتتى قاعبانىڭ ىشىنە كىرىپ، دۇعا تىلەۋ مۇمكىندىگىنە يە بولدى جانە ساۋد ارابياسى شەيحتارىنىڭ قولىنان ەكىنشى رەت قاعبانىڭ كيسۋاسىن سىيعا الدى. 2011 جىلى حالىقتار اراسىنداعى بىرلىك پەن ىنتىماقتاستىقتى نىعايتا وتىرىپ، يماندىلىق سالاسىندا جۇرگىزگەن ەڭبەگى ءۇشىن حالىقارالىق «اتا تۇرىك» اتىنداعى التىن مەدالمەن ماراپاتتالدى. 2012 جىلى پالەستينا ولكەسى، يەرۋساليم قالاسىنداعى «ءال-اقسا» اكادەمياسىنىڭ قۇرمەتتى پروفەسسورى اتاعى بەرىلدى. 2013 جىلى بۇۇ اتىنان «قوعام الدىنداعى ەڭبەگى ءۇشىن» التىن مەدالىمەن ماراپاتتالىپ، بۇعان قوسىمشا «بەيبىتشىلىك ميسسياسىنىڭ ەلشىسى» دەگەن ديپلوماتيالىق اتاققا يە بولعان. 2014 جىلى بۇۇ «ادام قۇقىعىن قورعاۋ كوميتەتى» اتىنان، ەرلىگى ءۇشىن بەرىلەتىن «التىن قىران» ءتوس بەلگىسىمەن ماراپاتتالدى. 2015 جىلى امانگەلدى قاجىنىڭ باستاۋىنداعى «نۇر-قازاقستان» قاجىلىق كومپانياسى ۇلتتىق بيزنەس-رەيتينگ بويىنشا تمد ەلدەرىندە العاش رەت «سالا جەتەكشىسى» اتاندى. وسىعان بايلانىستى امانگەلدى ەرەنعايىپۇلىنا مەملەكەتتىك ەكونوميكانى دامىتۋ جانە قازاقستاننىڭ حالىقارالىق بەدەلىن نىعايتۋ سالاسىندا وتان الدىندا ەرەن ەڭبەك ەتكەن تۇلعالارعا بەرىلەتىن «داڭىق جۇلدىزى. قازاقستان ەكونوميكاسى» وردەنى بەرىلدى.
مارتەبەلى، وقىرمان! امانگەلدى ەرەنعايىپۇلىنا قويار ساۋالىڭىز، بولىسەر ويلارىڭىز بولسا، مارحابات!
