رەسەي پرەزيدەنتى ۆلاديمير پۋتين اقش پحەنياننىڭ يادرولىق قارۋدان تولىق ارىلعانىن قالاسا، وندا سولتۇستىك كورەيانىڭ "قاۋىپسىزدىگىنە كەپىلدىك بەرۋى ءتيىس" دەپ مالىمدەدى.

پۋتين قىتايدىڭ مەملەكەتتىك ورتالىق راديو-تەليەۆيزيا ستانسياسىندا 6 ماۋسىم كۇنى جاريالانعان سۇحباتىندا اقش پرەزيدەنتى دونالد ترامپ پەن سولتۇستىك كورەيا باسشىسى كيم چەن ىن اراسىندا 12 ماۋسىمعا جوسپارلانعان كەزدەسۋ "وڭ ناتيجە بەرەدى" دەپ ۇمىتتەنەتىنىن ايتتى.

پۋتين سولتۇستىك كورەيا باسشىلىعى سامميت الدىندا "بۇرىن-سوڭدى بولماعان" بىرنەشە قادام جاساعانىن ايتتى. ول پحەنياننىڭ زىمىران جانە يادرولىق قارۋ سىناۋدى توقتاتىپ، يادرولىق سىناق پوليگونىن بۇزۋى "نيەتى وڭ ەكەنىن كورسەتەتىنىن" ايتتى.

رەسەي پرەزيدەنتى بۇعان قوسا دونالد ترامپتى كيم چەن ىنمەن كەزدەسۋگە شەشىم قابىلداعانى ءۇشىن "باتىلدىق پەن كورەگەندىك تانىتتى" دەپ ماقتادى.

ءبىراق ول ۆاشينگتون ەگەر سولتۇستىك كورەياعا سالىنعان سانكسيالاردى تۇگەل جويۋ ءۇشىن كيم چەن ىن يادرولىق قارۋدان باس تارتۋى ءتيىس دەگەن تالابىنان اينىمايتىنىن بولسا، وندا پحەنيان قاۋىپسىزدىگىنە ءابساليۋتتى كەپىلدىك بەرىلۋىن" تالاپ ەتەتىنىن ايتتى.

"بۇل، اسىرەسە، ليۆياداعى قايعىلى جاعدايدان كەيىن باسقالاي بولۋى مۇمكىن ەمەس" دەدى پۋتين. ول بۇل سوزىندە ليۆيا جەتەكشىسى مۋاممار كاددافيدى يادرولىق قارۋدان باس تارتۋعا كەلىسكەن سوڭ ليۆيا كوتەرىلىسشىلەرىنىڭ ناتو كومەگىمەن بيلىكتەن تايدىرعانىن مەڭزەدى.

"سولتۇستىك كورەيالىقتار كوز الدىندا نە بولىپ جاتقانىن كورىپ وتىر، سوندىقتان ولار البەتتە، قانداي دا ءبىر كەپىلدىكتەر تالاپ ەتەدى" دەدى پۋتين.

وتكەن اپتادا رەسەي سىرتقى ىستەر ءمينيسترى سەرگەي لاۆروۆ كيم چەن ىنمەن كەزدەسىپ، ترامپپەن الداعى كەزدەسۋ جايىن تالقىلاعان.

سولتۇستىك كورەيا مينيسترلەرى دە كاددافيدى مىسالعا كەلتىرىپ، پحەنياننىڭ ليۆيا سياقتى يادرولىق قارۋدان تولىق باس تارتۋعا كەلىسپەيتىنىن ايتقان. ءبىراق اقش وكىلدەرى كيم چەن ىن الداعى سامميتتە كەلىسىم جاسالۋى ءۇشىن يادرولىق قارۋدان مۇلدەم باس تارتۋى ءتيىس ەكەنىن بىرنەشە رەت قايتالاعان.