قازاقستانداعى حالىقتىڭ 40%-ى – «از قامتىلعاندار». ولاردىڭ تابىسى 2025 جىلعا قاراي 22،8%-دان 27%-عا دەيىن ارتتىرىلادى. قازاقستان ۇلتتىق ەكونوميكا ءمينيسترى تيمۋر سۇلەيمەنوۆ بۇل تۋرالى شەتەلدىك ينۆەستورلار كەڭەسىنىڭ 31-وتىرىسىندا مالىمدەدى، دەپ حابارلايدى Qamshy.kz اقپارات اگەنتتىگى ق ر ۇلتتىق ەكونوميكا مينيسترلىگىنىڭ باسپا ءسوز قىزمەتىنە سىلتەمە جاساپ.

قازاقستاننىڭ 2025 جىلعا دەيىنگى ستراتەگيالىق دامۋ جوسپارىنىڭ اياسىنداعى ەلدەگى جوسپارلاردىڭ قاتارىندا حالىقتىڭ جان باسىنا شاققانداعى ءجىو ءوسىمىن 46،1 مىڭ دوللارعا دەيىن، ەڭبەك ونىمدىلىگىن جىلىنا ورتاشا ەسەپپەن 4،7%-عا جەتكىزۋ مىندەتى تۇر. 

«ءسىزدىڭ ءبىزدىڭ الدىمىزعا قويىپ وتىرعان ەلدىڭ الەۋەتىن كوتەرۋ مىندەتى حالىقتىڭ ءومىر ءسۇرۋ ساپاسىنىڭ ارتۋىمەن قاتار ءجۇرۋى قاجەتتىگىن جاقسى تۇسىنەمىز»، - دەدى ت.سۇلەيمەنوۆ مەملەكەت باسشىسىنا قاراتا.

بۇل ءۇشىن، قازاقستان ۇەم باسشىسىنىڭ ايتۋىنشا، حالىقتىڭ ءومىر ءسۇرۋ جاسىنىڭ ۇزاقتىعىن 72 جاستان 75-كە دەيىن كوتەرۋ، از قامتىلعان 40% حالىقتىڭ تابىسىن جالپى تابىس كولەمىنىڭ 22،8%-ىنان 27%-عا دەيىن ارتتىرۋ، ورتا ءبىلىم بەرۋ ساپاسىن PISA تەستىن (وقۋشىلاردىڭ بىلىمدەگى جەتىستىگىن باعالاۋدىڭ حالىقارالىق باعدارلاماسى) قولدانۋ ارقىلى جاقسارتۋ قاجەت. 

«قويىلعان مىندەتتەرگە قول جەتكىزۋدىڭ نەگىزى 2050 ستراتەگياسىن جۇزەگە اسىرۋداعى 7 جۇيەلىك وزگەرىستەر مەن 7 باسىم ساياساتتىڭ ۇيلەسىمدىلىگى»، - دەدى مينيستر.

ماسەلەن، ستراتەگيانى جۇزەگە اسىرۋ ساياساتىنىڭ ءبىرى «جوعارى ءومىر ءسۇرۋ ساپاسىن قامتاماسىز ەتۋ ساياساتى».

«ول حالىقتىڭ الەۋمەتتىك جانە تۇرعىن ءۇي ستاندارتتارىن كەزەڭدىك جاقسارتۋعا باعىتتالعان. بۇل جەردە ءبىز ءسىزدىڭ 5 الەۋمەتتىك باستاماڭىزدى تولىقتاي جۇزەگە اسىرۋعا ءتيىسپىز»، - دەدى قازاقستان ۇەم باسشىسى.

مينيستر سونداي-اق ەلىمىزدىڭ الدىندا جەتى جۇيەلىك وزگەرىستەردىڭ اياسىندا بارلىق كادر دايارلاۋ جۇيەسىن قايتا باعدارلاۋ ماسەلەسىن شەشۋ؛ تەحنولوگيالىق جاڭارتۋدى ىسكە اسىرۋ؛ جەكە سالانى جانداندىرۋ؛ الەم ەلدەرىمەن ىنتىماقتاستىقتا قولايلى ساۋدا رەجيمىن قالىپتاستىرۋ؛ سىبايلاس جەمقورلىقتى جويۋ؛ وڭىرلەردىڭ ەكونوميكالىق دەربەستىگىن ارتتىرۋدىڭ ەسەبىنەن دامىتۋ جانە ت.ب. مىندەتتەر تۇرعاندىعىن ەسكە سالدى.