قىتايدىڭ سينداو قالاسىندا ءوتىپ جاتقان شىۇ ءسامميتى بارىسىندا ەلباسى نۇرسۇلتان نازاربايەۆ ۇيىمنىڭ ستراتەگيالىق باسىمدىقتارىن اتادى، دەپ حابارلايدى Qamshy.kz اقپارات اگەنتتىگىنىڭ ءتىلشىسى. 

"بۇگىنگى جيىننىڭ ناتيجەسىندە پاكىستەن مەن ءۇندىستاننىڭ قوسىلۋىمەن سەگىزدىك فورماتتاعى ۇيىم جۇمىسىنىڭ ارى قاراي داميتىنىنا سەنىمدىمىن. قۇرمەتتى ارىپتىستەر، ءبىزدىڭ ىنتىماقتاستىعىمىزدىڭ كەلەسى اسپەكتىلەرىنە توقتالىپ وتسەم دەيمىن: بىرىنشىدەن، شىۇ-نىڭ ستراتەگيالىق باسىمدىلىعى ساياسي ديالوگتى نىعايتىپ، ۇيىمعا مۇشە ەلدەردىڭ قاۋىپسىزدىگىن قامتاماسىز ەتۋ مەن دامۋىن جالعاستىرۋ بولىپ قالۋى ءتيىس. وسىعان بايلانىستى ءبىز شىۇ-عا مۇشە مەملەكەتتەردىڭ ۇزاقمەرزىمدى ىنتىماقتاستىعى مەن تاتۋلىعى تۋرالى كەلىسىمىمىزدى جۇيەلى تۇردە جۇزەگە اسىرا بەرەمىز"، - دەدى ەلباسى سامميتتە.

نازاربايەۆتىڭ ايتۋى بويىنشا بۇل قۇجات سەرىكتەستىكتىڭ كوزدەگەن ماقساتتارعا جەتەلەيتىن نەگىزگى باعىتى سانالادى.

"بۇگىن قول قويىلىپ جاتقان 2018-2022 جىلدارعا ارنالعان جۇمىس جوسپارى ۇيىمنىڭ وسى جولداعى جول كارتاسىنا اينالادى. ەكىنشىدەن، ۇيىمعا مۇشە ەلدەردىڭ ءۇش ميلليارد ادامى بار كەڭىسىتىگىن شىۇ-نىڭ نەگىزگى ەكونوميكالىق ىنتىماقتاستىقتى جانداندىراتىن نەگىزگى قۋات كۇشى رەتىندە پايدالانۋىمىز كەرەك"، - دەدى نازاربايەۆ.

ايتا كەتەيىك، سينداو ءسامميتى سەگىزدىك فورماتتا العاش رەت ءوتىپ جاتىر. وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ءۇندىستان پرەمەر-مينيسترى نارەندرا مودي، شىۇ-عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگيين باتتۋلا جانە ءبىرقاتار حالىقارالىق ۇيىمنىڭ باسشىلارى قاتىستى.

جيىن قورىتىندىسىنا سايكەس، شانحاي ىنتىماقتاستىق ۇيىمىنىڭ كەلەسى ءتوراعاسى قىرعىزستان بولدى. شي جين پيڭ قىرعىز رەسپۋبليكاسىنىڭ ۇيىمعا ءتوراعالىعىنا قولداۋ كورسەتەتىنىن مالىمدەدى.

كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى سينداو دەكلاراسياسى قابىلدانىپ، 20-دان استام قۇجاتقا قول قويىلماق. ونىڭ 17ء-سىن مەملەكەت باسشىلارى راسىمدەيدى.