كحدر باسشىسى كيم چەن ىننىڭ ۇشاعى جەكسەنبى كۇنى پحەنياننان سينگاپۋرعا ۇشتى. 

سولتۇستىك كورەيا تاراپىنان رەسمي حابار شىققان جوق. بۇدان بۇرىن رەنحاپ اگەنتتىگى پحەنياننان سينگاپۋرعا قاراي قىتايلىق اۋە كومپانيالارىنىڭ رەيستەرى ۇشقانىن حابارلاعان. مامانداردىڭ بولجامىنشا، ۇشاقتىڭ ىشىندە كحدر باسشىسى كيم چەن ىن وتىر، الايدا رەسمي اقپارات جوق.

بلۋمبەرگ اگەنتتىگىنىڭ حابارلاۋىنشا، ترامپ كيم چەن ىننىڭ كەزدەسۋگە كەلگەندەگى نيەتىن ءبىر كورگەننەن بايقايتىنىن ايتقان.

ايتا كەتەيىك، امەريكا قۇراما شتاتتارى پرەزيدەنتى دونالد ترامپ پەن سولتۇستىك كورەيا ليدەرى كيم چەن ىننىڭ العاشقى كەزدەسۋى 12 ماۋسىمدا جەرگىلىكتى ۋاقىتپەن ساعات 09.00-دا سينگاپۋردا وتەدى.

بۇدان بۇرىن اق ءۇي مالىمدەمەشىسى سارا ساندەرس كۇندەلىكتى باسپا ءسوز بريفينگىندە اقش پرەزيدەنتى دونالد ترامپ پەن سولتۇستىك كورەيا ليدەرى كيم چەن ىننىڭ كەزدەسۋى جونىندە مالىمدەمە جاسادى.

كەزدەسۋگە بايلانىستى دايىندىقتاردىڭ ويداعىداي ءوتىپ جاتقانىن بىلدىرگەن ساندەرس: «پرەزيدەنت كۇن سايىن كومانداسىنان سولتۇستىك كورەياعا بايلانىستى بريفنگ الىپ وتىر.  وسى ايادا ترامپ پەن كيم اراسىنداعى ءبىرىنشى كەزدەسۋ 12 ماۋسىم كۇنى سينگاپۋردا جەرگىلىكتى ۋاقىتپەن ساعات 09-دا باستالادى» دەدى.

ترامپتىڭ كيمنەن العان حات جونىندەگى ءبىر سۇراققا جاۋاپ بەرگەن ساندەرس حاتتىڭ نە تۋرالى ەكەنىن ايتپايتىنىن،  الايدا حاتتى وقىعان كەزدە «تۋرا جولدارى ەكەنىن كورسەتكەنىن» ءبىلدىردى.

ساندەرس كورەيا تۇبەگى يادرولىق قارۋدان تازالانعانعا دەيىن سولتۇستىك كورەياعا باعىتتالعان سانكسيالاردىڭ جويىلمايتىنىن اتاپ كورسەتتى.

قوس باسشىنىڭ كەزدەسۋدەگى نەگىزگى ماقسات – جاعدايدى ءبىر قالىپقا كەلتىرۋ، رەتتەۋ. حالىقارالىق قاۋىمداستىقتىڭ پحەنيانعا قويىپ وتىرعان تالابى – يادرولىق سىناقتان باس تارتۋ.