شىۇ-عا مۇشە ەلدەر ءوزارا ساۋدا جاساۋدى ۇلتتىق ۆاليۋتالاردا جۇزەگە اسىرۋ كەرەك، سەبەبى بۇل مەملەكەتتەر اراسىنداعى ەكونوميكالىق قاۋىپسىزدىكتىڭ دەڭگەيىن كوتەرەدى دەپ مالىمدەدى ق ر پرەزيدەنتى نۇرسۇلتان نازاربايەۆ. بۇل تۋرالى Qamshy.kz اقپارات اگەنتتىگىنىڭ ءتىلشىسى حابارلايدى. 

"ءقازىر الەم ۆاليۋتالارىنىڭ قورجىنىن ءارتاراپتاندىرۋ، ۆاليۋتانىڭ تاۋەلدىلىگى مەن كريپتوۆاليۋتانىڭ پايدا بولۋ ءقاۋپىن ازايتۋ تۋرالى كوپ تالقىلانادى. وسىعان بايلانىستى ءبىز شىۇ-عا مۇشە بارلىق ەلدىڭ ءوز ۇلتتىق ۆاليۋتالارىندا ساۋدا جاساۋىن مەملەكەتتەر اراسىنداعى ەكونوميكانىڭ قاۋىپسىزدىك اسپەكتىلەرىنىڭ ءبىرى رەتىندە قاراستىرۋعا ءتيىسپىز"، - دەدى ن.نازاربايەۆ شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ 18ء-شى وتىرىسىندا.

نازاربايەۆتىڭ سوزىنشە، قاۋىمداستىققا مۇشە ەلدەردىڭ ورتالىق بانكتەرى ءتيىستى جول كارتالارىن ازىرلەۋدى باستاۋى ءتيىس.

«ءبىزدىڭ ەلدەر اراسىنداعى ساۋدا-ينۆەستيسيالىق جوبالاردى ەكىجاقتى دەڭگەيدەن  كوپجاقتى دەڭگەيگە  كوتەرۋ ماڭىزدى. ءبىز جوبالاردى قارجىلاندىرۋعا جانە ۇيىمنىڭ شەڭبەرىندە تەحنولوگيالىق رەسۋرستاردى جۇمىلدىرۋعا باعىتتالعان بىرلەسكەن تەتىكتەر قۇرۋدى قولدايمىز»، - دەدى پرەزيدەنت.

ايتا كەتەيىك، سينداو ءسامميتى سەگىزدىك فورماتتا العاش رەت ءوتىپ جاتىر. وتىرىسقا قازاقستان پرەزيدەنتى نۇرسۇلتان نازاربايەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەيەۆ، ءۇندىستان پرەمەر-مينيسترى نارەندرا مودي، شىۇ-عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگيين باتتۋلا جانە ءبىرقاتار حالىقارالىق ۇيىمنىڭ باسشىلارى قاتىستى.

كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى سينداو دەكلاراسياسى قابىلدانىپ، 20-دان استام قۇجاتقا قول قويىلماق. ونىڭ 17ء-سىن مەملەكەت باسشىلارى راسىمدەيدى.

شانحاي ىنتىماقتاستىق ۇيىمى 2001 جىلى قازاقستان، قىرعىزستان، جۇڭگو، رەسەي مەن تاجىكستان باسشىلارى شەكارا ايماعىنداعى اسكەري سالاداعى سەنىم شارالارىن نىعايتۋ تۋرالى كەلىسىم مەن شەكارا ايماعىنداعى اسكەري كۇشتەردى ءوزارا قىسقارتۋ تۋرالىك ەلىسىمگە قول قويعاننان كەيىن قالىپتاسقان «شانحاي بەستىگى» تەتىگىنىڭ نەگىزىندە قۇرىلدى.