استانانىڭ 20 جىلدىعىنا ارنالعان ءىس-شارالارعا وتاندىق انشىلەردى كوبىرەك قاتىستىرۋ كەرەك. بۇل تۋرالى سەنات ءتوراعاسى قاسىم-جومارت توقايەۆ تۆيتتەردەگى پاراقشاسىندا حابارلادى.
"ەلوردامىزدىڭ 20 جىلدىعىنا ارنالعان ءىس-شارالارعا شەتەل ارتىستەرىنەن گورى، وتاندىق ورىنداۋشىلاردى كوبىرەك قاتىستىرۋ قاجەت"، - دەپ جازدى سەنات ءتوراعاسى.
2017 جىلى قىركۇيەك ايىندا مەملەكەت باسشىسى استانا قالاسىنىڭ 20 جىلدىعىن مەرەكەلەۋدى تاپسىرعان بولاتىن.
قالا كۇنىنە دايىندىقتىڭ ءۇش باعىتتا ءجۇرىپ جاتىر. ءبىرىنشىسى شاراعا مادەنيەت جانە سپورت مينيسترلىگى، وزگە دە ارىپتەستەرمەن بىرلەسكەن دايىندىق. ەكىنشىسى - قازاقستان وڭىرلەرىمەن ءوزارا ءىس-قيمىل. ءۇشىنشىسى - شەتەلدىك سەرىكتەستەردىڭ قاتىسۋىمەن وتەتىن شارالار. ءبىرىنشى توپتاما بويىنشا 600-دەن استام شارانى قامتيتىن، جىل بويى وتەتىن ىسكەرلىك، مادەني، سپورتتىق باعدارلامالار جيناقتالعان. ونى ءتۇرلى مينيسترلىكتەر، فەدەراسيالار، تەاترلار جانە باسقالارى وتكىزەدى.
استانانىڭ 20 جىلدىق مەرەيتويىن تويلاۋ ءۇشىن رەسپۋبليكالىق بيۋدجەتتەن 18،8 ميلليارد تەڭگە ءبولۋ كوزدەلگەن. بۇل تۋرالى مادەنيەت جانە سپورت ۆيسە-مينيسترى ساكەن مۇسايبەكوۆ مالىمدەدى.
20 جىلدىقتى تويلاۋ اياسىندا وتكىزىلەتىن 85 شاراعا بارلىعى 18 ميلليارد 800 ميلليون تەڭگە قاراستىرىلعان. ۆيسە-مينيستردىڭ ايتۋىنشا، قارجى مينيسترلىگى بۇل شەشىمدى قولداعان جانە بۇل قاراجات بيۋدجەتتە جوسپارلاندى.
ال 29 مامىردا استانا اكىمدىگىنىڭ مادەنيەت جانە سپورت باسقارماسىنىڭ مۇرىندىق بولۋىمەن، «قازاق ەلى» مونۋمەنتى الدىندا، استانامىزدىڭ 20 جىلدىق مەملەكەتتىك مەرەكەسىنە ارنالعان ەڭ العاشقى شارا - Open Air كونسەرتى ءوتتى. دەنى رەسەي ەسترادا جۇلدىزدارى قاتىسقان كونسەرتتىڭ اتى «ۇلى دالا بىرلىگى» دەپ اتالىپتى. رەسەيدەن ديما بيلان، يۋليانا كاراۋلوۆا، سەرگەي لازاريەۆ، اننا سەدوكوۆا، ناتان، اننا سەمەنوۆيچ، دجيگان، ەلەنا تەمنيكوۆا، تيمۋر رودريگەز، ماكس بارسكيح، ميشا مارۆين، «گرادۋسى» توبى، Artik&Asti جانە باسقالارى، ال ءوز ەلىمىزدەن قايرات نۇرتاس، ايقىن، ءمادينا ءسادۋاقاسوۆا، كامشات جولدىبايەۆا، الىشەر كارىموۆ، ەركە ەسماحان، رينات مالساگوۆ، Ringo جانە Ninety One توبى ونەر كورسەتتى. الايدا وتاندىق انشىلەردەن گورى شەتەلدىك ونەرپازداردىڭ ونەر كورسەتۋىنە قالا تۇرعىندارى دا، قوعام بەلسەندىلەرى دە "اقشانىڭ جەلگە ۇشىپ جاتقانىنا" نارازى بولدى.
