ايبەك سمادياروۆ قازاقستان سىرتقى ىستەر مينيسترلىگى باسپا ءسوز قىزمەتىنىڭ باسشىسى بولىپ تاعايىندالدى، دەپ حابارلايدى Qamshy.kz اقپارات اگەنتتىگى مينيسترلىكتىڭ باسپا ءسوز قىزمەتىنە سىلتەپ. استانا جۋرناليستىك كورپۋسىن جاڭا باسپا ءسوز حاتشىسىمەن سىرتقى ساياسات ۆەدومستۆوسىنىڭ باسشىسى قايرات ءابدىراحمانوۆ تانىستىردى.
35 جاستاعى ا.سمادياروۆ كادرلىق ديپلومات بولىپ تابىلادى. ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىن ۇزدىك بىتىرگەن. بۇرىن ءسىم-نىڭ ورتالىق اپپاراتىندا، قازاقستاننىڭ ماجارستانداعى ەلشىلىگىندە جانە پرەزيدەنتتىڭ باسپا ءسوز قىزمەتىندە ءارتۇرلى لاۋازىمداردا قىزمەت اتقاردى. سوڭعى جىلدارى قازاقستاننىڭ ۆەتنامداعى ەلشىلىگىندە كەڭەسشى بولدى.
«سىرتقى ساياسات ۆەدومستۆوسى بۇقارالىق اقپارات قۇرالدارى مەن جۇرتشىلىق ءۇشىن اشىق بولىپ قالا بەرەدى. ءسىم پرەزيدەنت نۇرسۇلتان نازاربايەۆتىڭ سىرتقى ساياساتىن ءتۇسىندىرۋ جانە ناسيحاتتاۋ، مەملەكەت پەن قازاقستان حالقىنىڭ مۇددەلەرىن حالىقارالىق ارەنادا قورعاۋ بويىنشا جۇمىسىن جالعاستىراتىن بولادى»، - دەپ ايتتى قازاقستان سىرتقى ىستەر ءمينيسترى قايرات ءابدىراحمانوۆ جۋرناليستەردىڭ الدىندا.
ءسىم باسپا ءسوز قىزمەتىنىڭ بۇرىنعى باسشىسى ءانۋار جايناقوۆ قىسقا مەرزىمدە نيۋ-يوركتاعى قازاقستاننىڭ بۇۇ جانىنداعى تۇراقتى وكىلدىگىنە كەڭەسشى بولىپ تاعايىندالدى.
سىرتقى ىستەر مينيسترلىگى قازاقستاندىق جۋرناليستەردى الدا كەلە جاتقان كاسىبي مەرەكەلەرى - بايلانىس جانە اقپارات قىزمەتكەرلەرى كۇنىمەن قۇتتىقتايدى.
