قازاقستاندا دومبىرا كۇنى جوعارى دارەجەدە تويلانادى، ءتۇرلى كونسەرتتەر مەن دۋماندى شارالار ۇيىمداستىرىلادى، دەپ حابارلايدى Qamshy.kz اقپارات اگەنتتىگى. 

بۇل تۋرالى بۇگىن استانادا وتكەن باسپا ءسوز ءماسليحاتىندا استانا قالاسى اكىمدىگىنىڭ مادەنيەت جانە سپورت باسقارماسىنىڭ باستىعى بولات ماجاعۇلوۆ مالىمدەدى.

ول وسىعان دەيىن «بايتەرەك» مونۋمەنتىنىڭ جانىندا 500 دومبىراشى قاتىسقان فلەش-موب وتكەنىن اتاپ ءوتتى. سول تۇستا قالالىق بيلىك حالىق اراسىنداعى وسىنداي ءىس-شارالارعا قىزىعۋشىلىق تانىتىپ، قوعامدا رەزونانس تۋعانىن ەسكە الدى.

«بۇل تاريحي ءسات. استانانىڭ 20-جىلدىعىن تويلاۋ اياسىندا 1 شىلدەدە ۇلكەن ءىس-شارا ۇيىمداستىرىلادى. ءقازىردىڭ وزىندە 1300 قاتىسۋشى تىركەلىپ ۇلگەردى. تىركەلگەندەردىڭ بارلىعى دومبىرا شەرتە الادى جانە وسى كۇنى حالىقپەن بىرگە بولعىسى كەلەدى»، - دەدى ماجاعۇلوۆ.

ەلىمىزدىڭ باسقا وڭىرلەرىندە تۇراتىن ازاماتتارعا قالا ورتالىقتارىندا ۇيىمداستىرىلاتىن مەرەكەلىك شارالارعا قاتىسۋىنا بولادى.

«شىن مانىندە، دومبىرا ۇستاي الاتىن كەز كەلگەن ادام قاتىسا الادى، اسپاپتا ءوز قالاۋى بويىنشا ويناي الادى. سونىمەن قاتار، ولار ءبۇتىن ءبىر وركەستر قۇرىپ دومبىرا تارتا الادى. ءىس-شارالاردىڭ كوبىسى قاراپايىپ حالىققا ارنالعان. سول سەبەپتى ءبىز الماتىعا ۇلتتىق اسپاپتار مۋزەيىن الىپ بارامىز. كورمەگە زاماناۋي شەبەرلەردىڭ جاساعان مۋزىكالىق اسپاپتارى دا قويىلادى»، - دەدى باسقارما باسشىسى.

استاناداعى ءىس-شارانىڭ باستالۋى 1 شىلدە كۇنى 12:00-گە جوسپارلانعان.