گۇلنار ءمىرجاقىپ قىزى دۋلاتوۆا 1915 جىلى ورىنبور قالاسىندا دۇنيەگە كەلگەن. الماتى مەملەكەتتىك مەديسينالىق ينستيتۋتىن بىتىرگەن سوڭ زەينەتكە شىققانعا دەيىن دارىگەر بولىپ قىزمەت اتقاردى. ول - «الاش» قوزعالىسىنىڭ قايراتكەرلەرى ءاليحان بوكەيحان، احمەت بايتۇرسىن ۇلى، ءمىرجاقىپ دۋلاتوۆ، جۇسىپبەك ايماۋىتوۆ سياقتى تۇلعالار تۋرالى دەرەكتەردى العاش جاريالاۋشى. الماتىداعى ورتالىق مۇراجايعا، تورعايداعى، قوستانايداعى، سەمەيدەگى جانە استاناداعى مۇراجايلارعا ساياسي قۋعىن-سۇرگىن قۇرباندارىنا قاتىستى ولاردىڭ جەكە زاتتارىن، كىتاپتارىن، سۋرەتتەرىن، حاتتارى مەن قۇجاتتارىن تاپسىرعان. باسپاسوزدە گۇلنار دۋلاتوۆانىڭ وچەركتەرى مەن ەسسەلەرى 1988 جىلدان باستاپ جاريالانا باستادى. 1995-1999 جىلدارى «سۆەت يستينى» («شىندىق شىراعى») اتتى ەكى تومدىق كىتابى جارىق كوردى. ول - ءمىرجاقىپ دۋلاتوۆتىڭ «ويان، قازاق!» كىتابىن جانە كوپتومدىق شىعارمالار جيناعىن قۇراستىرۋشىلاردىڭ ءبىرى. قامشى.kz   پورتالىنىڭ ۇجىمى مارقۇمنىڭ وتباسى مەن اعايىن-تۋىستارىنا قايعىلارىنا ورتاقتاسىپ كوڭىل ايتادى!