2018 جىلدىڭ 9 شىلدەسىنەن باستاپ 31 ارناداعى «ينفورمبيۋرو» جاڭالىقتار باعدارلاماسى جاڭا ستۋديادان حابار تاراتا باستايدى. ءساندى دەكوراسيا، جوعارى تەحنولوگيالىق جارىق بەرەتىن قۇرىلعىلار، زاماناۋي اپپاراتتى-ستۋديالىق كەشەن – وسىنىڭ ءبارى اقپاراتتىق حابار تاراتۋ دەڭگەيىن كوتەرۋدىڭ ماڭىزدى كەزەڭدەرىنىڭ ءبىرى.
«ينفورمبيۋرو» – تاۋەلسىز قازاقستاننىڭ ەڭ تابىستى باعدارلامالارىنىڭ ءبىرى. ونىڭ العاشقى شىعارىلىمى 1996 جىلى ەفيرگە شىققان. بۇگىنگى تاڭدا «ينفورمبيۋرو» قازاقستانداعى اقپارات تاراتۋشى باعدارلامالاردىڭ كوشىن باستاپ جۇرگەن جوبالاردىڭ ءبىرى. بىرنەشە جىل قاتارىنان «ۇزدىك اقپاراتتىق باعدارلاما» نوميناسياسى بويىنشا «تۇمار» تەليەۆيزيالىق سىيلىعىن يەلەندى.
«ينفورمبيۋرو» باعدارلاماسى كورەرمەندەرىنىڭ قالاۋىن قاناعاتتاندىرۋ ماقساتىندا بىرنەشە مارتە يميدجدىك وگەرىسكە ءتۇسىپ، ءاردايىم جەتىلىپ وتىردى. بۇل ءداستۇر بۇگىندە ساقتالعان، ونىڭ ۇستىنە زاماننىڭ تالابى باسقا، - دەيدى 31 ارنانىڭ باس ديرەكتورى باعدات قوجاحمەتوۆ. – سول سەبەپتى ءبىز دە زامان اعىمىنا ىلەسىپ، بۇرىنعىدان دا اسەرلى، ەستە قالالارلىق جاڭالىقتار باعدارلاماسى اتانۋ ءۇشىن جاڭا ستۋديا جاساۋ تۋرالى شەشىم قابىلدادىق. جاڭا ستۋديا نەمىستىڭ ARRI كومپانياسىنىڭ يننوۆاسيالىق جارىقتارىمەن جانە ۇزدىك حالىقارالىق ديزاينەرلەردىڭ زاماناۋي دەكوراسيالارىمەن بەزەندىرىلگەن».
كادردىڭ مۇلتىكسىزدىگىنە قول جەتكىزۋ ءۇشىن ستۋديا جۇمىستارىنا بەلگىلى قويۋشى وپەراتور پاۆەل بىكوۆچەنكونى شاقىردىق (2014 جىلى سوچيدە وتكەن وليمپيادا مەن پاراليمپيادانىڭ اشىلۋ جانە جابىلۋ سالتاناتىندا جۇمىس ىستەگەن). ول بىزگە جاڭا ەنگىزىلىمنىڭ ەرەكشەلىكتەرى تۋرالى بايانداپ بەردى. «ستۋدياعا ءبىر ۋاقىتتا بىرنەشە ادامدى وتىرعىزىپ، جارىق پەن ارتتاعى كورىنىستى وزگەرتۋ ارقىلى مۇلدە جاڭا كارتينا قۇراپ شىعارۋعا بولاتىن بىرنەشە ءتۇسىرىلىم نۇكتەسى بار، - دەيدى پاۆەل. – جاڭا ستۋديانىڭ مۇمكىندىگى جاڭالىقتار باعدارلاماسىنىڭ تالاپتارىنان الدەقايدا جوعارى. ونىڭ كولەمى ەسكى ستۋديادان ايتارلىقتاي ۇلكەن. تەليەۆيزيانىڭ قۇدىرەتى سول، كەيدە ستۋدياداعى 2-3 مەتر ارتىق كەڭىستىكتىڭ ءوزىن بەزەندىرىپ، جاڭا ينتەرەردىڭ كومەگىمەن وزگەرتسە، كادردا مۇلدە باسقا كورىنىس شىعا كەلەدى. كينو تۋرالى ايتىلعان «تاڭعاجايىپ يلليۋزيا» دەگەن كلاسسيكالىق تەڭەۋ وسى تەليەۆيزيا سالاسىنا بەرىلگەن ءدال انىقتاما. سول ايتپاقشى، جاڭا ستۋدياعا ءبىر ۋاقىتتا بىرنەشە ادام سيادى. ءبىر جۇرگىزۋشى وتىرىپ جۇرگىزسە، ەندى ءبىرى ورنىنان تۇرىپ باعدارلاما جۇرگىزە الادى. تاعى ءبىر قىزىقتى جايت، جارىقديوتتى ەكران ءبىر نۇكتەدەن ەكىنشى نۇكتەگە وڭاي اۋىسىپ، ءتۇسىرىلىمنىڭ راكۋرسىن وزگەرتىپ وتىرا الادى».
ستۋدياداعى جارىق جۇيەسىن جاساقتاۋعا نەمىستىڭ ARRI Lighting كومپانياسىنىڭ جاڭا زامانعى جارىقديوتتى جارىق بەرۋ قۇرىلعىلارى قولدانىلعان. ARRI كومپانياسى ءوزىنىڭ ءجۇز جىلعا جۋىق تاريحىندا كاسىبي ماقساتتاعى جارىق قۇرىلعىلارىن جاساۋ سالاسىنداعى ەڭ مىقتى الەمدىك ساراپشىلاردىڭ ءبىرى دەگەن اتقا يە.
ەندى وسى تەحنيكالىق جاڭارتۋلاردىڭ ارقاسىندا «ينفورمبيۋرو» جۇرگىزۋشىلەرى كونتەنتتىڭ ساپاسىن ودان ءارى ارتتىرىپ، تەلەكوپىرلەر ۇيىمداستىرىپ، دۇنيەجۇزىندەگى تىلشىلەرمەن تىكەلەي بايلانىسقا شىعىپ، «جاندى رەپورتاجدار» جۇرگىزىپ، كورەرمەنگە قىزىقتى دەگەن قوناقتاردى كوپتەپ شاقىرادى دەگەن ۇمىتتەمىز.
پىكىر قالدىرۋ