تۇركيادا ءتۇرلى مينيسترلىكتەر مەن ۆەدومستۆولارداعى مەملەكەتتىك قىزمەتتەن "ۇلتتىق قاۋىپسىزدىككە قارسى ىس-ارەكەت" كۇدىگىنە ىلىككەن 18 مىڭنان استام ادام بوساتىلعان. بۇل تۋرالى جەكسەنبى كۇنى "رەسمي گازەتا" باسىلىمىندا جاريالانعان "زاڭدى كۇشى بار جارلىقتا" ايتىلعان.

شىلدەنىڭ 8-ىندە جارىق كورگەن جارلىققا سايكەس، ەلدە 12 اسسوسياسيا، ءۇش گازەت جانە تەلەارنا جابىلادى. ەڭ كوپ ادام – 9 مىڭعا جۋىق قىزمەتكەر باس قاۋىپسىزدىك باسقارماسىنان جۇمىستان بوساتىلادى. سونىمەن بىرگە عىلىمي ينستيتۋتتاردا ەڭبەك ەتكەن 199 ادام جۇمىسسىز قالدى. جۇمىستان بوساعانداردىڭ بارلىعى مەملەكەتتىك قىزمەتشىگە تيەسىلى جەڭىلدىكتەن ايرىلدى، ولارعا مەملەكەتتىك قۇرىلىمداردا جۇمىس ىستەۋگە تىيىم سالىنعان.

وسىدان ەكى جىل بۇرىن ىسكە اسپاي قالعان مەملەكەتتىك توڭكەرىس ارەكەتىنەن كەيىن ەلدە جاريالانعان توتەنشە جاعداي ءتارتىبى وسى ايدا اياقتالادى دەپ حابارلانعان.

تۇركيا ۇكىمەتى 2016 جىلعى شىلدەنىڭ 16-سىندا 250 ادامنىڭ قازاسىنا سەبەپ بولعان مەملەكەتتىك توڭكەرىس جاساۋعا تىرىستى دەپ اقش-تا تۇراتىن تۇرىك ءدىني قايراتكەرى فەتحۋللا گۇلەندى ايىپتايدى، گۇلەن وزىنە تاعىلعان ايىپتى جوققا شىعارادى.

دەرەككوز:ازاتتىق راديوسى