قازاقتىڭ قىزى شەتەل ازاماتىنا تۇرمىسقا شىقسا، ىزاعا بۋلىعىپ، الگى قىزعا تاپ بەرىپ جاتامىز. ءبىرىمىز سوزبەن «قارعاپ-سىلەيمىز»، ەندى ءبىرىمىز «ونداي قىزداردى ازاماتتىقتان شىعارۋ كەرەك» دەپ تالاپ ەتەمىز، ودان قالا بەردى ادام ساناتىنان شىعارىپ تاستايمىز. بۇعان مىسال رەتىندە جۋىردا عانا جۇڭگو ازاماتىنا تۇرمىسقا شىققان قازاق قىزىن ايتساق بولادى. نامىستارى ويانعان قازاقتىڭ جىگىتتەرى تويدىڭ شىرقىن بۇزارداي اشۋعا بۋلىعىپ، توپ بولىپ مەيرامحاناعا بارعاندارىن قازاق ءالى تالاي ءسوز ەتەر. ءجا، ايتىپ-ايتپاي نە كەرەك، قىز كەتتى، ارتىنا قاراماي، شەتەلدىكتىڭ قولىن ۇستادى دا، باقىتىن تاپتى. وعان نە ايتساڭ دا، كەش، باقىت تىلەگەننەن باسقا امالىڭ دا جوق.

ال قازاقتىڭ جىگىتى وزگە ۇلت وكىلىنەن قىز السا شە؟ بۇعان قالاي قارار ەدىڭىز؟ «دۇرىس، ەڭ باستىسى ول ايەل قازاقتىڭ ۇرپاعىن» دۇنيەگە اكەلەدى» دەسەدى بىرەۋلەر. ەندى بىرەۋلەرى «مۇلدەم دۇرىس ەمەس. بالانىڭ جانىندا كوپ ۋاقىتىن وتكىزىپ، ونى تاربيەلەيتىن – اناسى. ول بالادا قازاقى تاربيە بولمايدى» دەپ قارسى شىعىپ جاتادى. بۇل تالاستىڭ ءتۇبى شەكسىز. قازاق وتباسىنا ءسىڭىسىپ، ناعىز قازاقتىڭ كەلىنى بولعان وزگە ۇلتتىڭ قىزدارى بار. سونىمەن قاتار، قازاقتىڭ داستۇرلەرىنە كوڭىلى تولماي، ەرىن نە ءوز جاعىنا تارتاتىن، نە اجىراسىپ تىناتىن دا ايەلدەر بار. Qamshy.kz اقپارات اگەنتتىگى بۇگىندە ناعىز قازاقتىڭ كەلىنى بولىپ، قازاق شاڭىراعىنىڭ ءتۇتىنىن تۇتەپ وتىرعان ورىس كەلىندەرىن ءتىزىپ شىقتى. ولار جەلىدە بەلسەندى، ءارى وقىرماندارى دا كوپ. ءتىپتى ريزا بولىپ، سۇيسىنەتىن وقىرمانداردىڭ سانىندا شەك جوق. ال كەتتىك...

بۇل – اننا. جەلىدە «ورىس كەلىن» دەگەن اتپەن تانىمال. قازاق جىگىتىنە تۇرمىسقا شىعىپ، ەكى بالانى تاربيەلەپ وتىرعان انا. جەلىدەگى جازبالارىنا سايكەس، جارىمەن جاپونيادا تانىسقان ەكەن. ءوزى رەسەيدەگى ۆلاديۆوستوك قالاسىندا تۋىپ-وسكەن. نەگىزى جاپونيادا قالۋدى ارمانداعان ەكەن، الايدا تاعدىرى ونى قازاقستانعا ايداپ اكەلدى. ەلدە تۇرىپ جاتقانىنا 10 جىلدان استى. قازاقستان ونىڭ تۋعان مەكەنىنە اينالدى. ەتتى ءسۇيىپ جەيدى، ءمانتى مەن وراما-نان سۇيىكتى تاعامدارى، ال بالالارىنا كەسپە جاساپ بەرگەندى جاقسى كورەدى. جاپونيادان قازاقستانعا ەندى عانا كوشىپ كەلگەن اننا بىرنەشە قاتەلىكتەرگە دە بوي الدىرىپتى. ونى جەلىدەگى پاراقشاسىندا بىلاي دەپ كەلتىردى:

«كۇيەۋىمنىڭ تۋىسقاندارىنا شوشقا ەتىمەن تاماق جاساپ بەردىم. ولاردىڭ تاماق جەمەي، اش وتىرعاندارىنا قاتتى تاڭ قالعان ەدىم. شايدى دا قالاي قۇيۋ كەرەك ەكەنىن ۇمىتىپ قالامىن، كەسەگە تولتىرىپ قۇيىپ بەرەتىنمىن. قايىن اعالارىمدى اتىمەن اتاپ، قايىن اتامنىڭ تۋعان كۇنىنە اشىق قىزىل ءتۇستى كويلەك كيىپ بارماق بولدىم. اۋىلعا باراردا قىسقا بەلدەمشەلەرىمدى الىپ الدىم. تۋىستارىم وتە جاقسى ادامدار بولعاندىقتان، مەنى تۇسىنەتىن»، - دەپ جازدى اننا پاراقشاسىنا.

ال بۇگىندە اننا قازاقتىڭ كەلىنى ەكەنىنە ماقتانادى. شاشىنا اق تۇسسە دە، كوڭىلىنە قاياۋ تۇسپەگەن، جۇرەگى "نەمەرەم" دەپ ەلجىرەپ تۇراتىن، كەڭ ەتەكتى كويلەك كيىپ، كومزولىنىڭ قالتاسىنا نەمەرەمە دەپ تويدان سارقىت جيناپ جۇرەتىن اجەلەرى مەن اۋزىمەن وراق ورمايتىن، قاباعىمەن ءتىل قاتاتىن قاريالار - ورىس كەلىننىڭ وزگەگە ماقتانىشپەن ايتاتىن دۇنيەلەر. بۇگىندە جان جانە تاير اتتى ەكى بالانىڭ اناسى.

-بۇل – يۋليا. جەلىدە #پىسىققاتىن دەگەن حەشتەگپەن تانىمال يۋليانى قازاقستاندىقتار جاقسى كورەدى. شاشى سارعىلت بولعاندىقتان تۋىسقاندارى (قايىن جۇرتى) التىنشاش دەپ اتاپ كەتكەن بولۋ كەرەك. كومزولىن كيىپ، ورامالىن باسىنا تاعىپ الىپ، ومىردەن العان تاجىريبەلەرىمەن ءبولىسىپ وتىرادى. ال وزگە ۇلتتىڭ قىزىن قازاق وتباسى قالاي قابىلدادى؟ جەلىدەگى جازباسىندا يۋليا بىلاي دەيدى:

«جاڭا وتباسىنا كەلىن بولىپ تۇسەردە ءاربىر قىز ءوزىن قالاي قابىلدار ەكەن دەپ قاتتى ۋايىمدايدى. اعايىن-تۋىس – قازاقتىڭ ەڭ باستىعى بايلىعى. ونى ءار كەلىن تۇسىنە ءبىلۋ كەرەك. وزگە ۇلتتىڭ وكىلىنە تۇرمىسقا شىقتىڭ با – ءوز شەشىمىڭە ماڭگىلىك ادال بولۋىڭ شارت. ەڭ باستىسى، جاڭا تۋىستارىڭا دەگەن سىيلاستىعىڭ بەرىك بولسىن. ارينە، العاشقى كۇندەرى قيىن بولدى: وزگە ۇلت، وزگە ءدىن، وزگە ءداستۇر. الايدا نيەت بولسا، كەز كەلگەن ماسەلەنىڭ ءتۇيىنى شەشىلەدى، كەز كەلگەن اداممەن ءتىل تابىسىپ كەتە الاسىڭ»، - دەپ جازادى يۋليا.

ال قازاق وتباسىنا كەلىن بولۋدى بىلاي ءتۇسىندىردى:

«قوش بول، بورشش! قوش كەلدىڭ، بەش! تاماق جاساۋدى بىلەمىن. الايدا مەن اساتىن ەت ءالى دە پروفەسسيونالدىق دەڭگەيگە جەتە قويعان جوق. ءبارى تاجىريبەمەن كەلەدى.

24 ساعاتتىق شارۋا. «كەلىن 5-تە تۇرۋ كەرەك، اۋلانى سىپىرۋ كەرەك. كەلىن وتىرماۋ كەرەك. ءۇيدىڭ ءىشى جايناپ تۇرۋ كەرەك. كيىمدەردى جۋۋ كەرەك، ىدىستاردى جۋۋ كەرەك، تاماق جاساۋ كەرەك». ءيا، دۇرىس، ءبىراق كىر جۋاتىن ماشينە، شاڭسورعىش، مۋلتيپىسىرگىش، وزگە دە تەحنيكا بار كەزدە ءۇيدىڭ تىرلىكتەرىمەن اينالىسۋ راحاتتىڭ راحاتى.

كەلىن شاي. كەلىن ءۇشىن ەڭ قيىنى – وسى. ۇلكەندەردىڭ كوڭىلىنەن شىعاتىنداي ەتىپ شاي دەمدەۋ كادىمگىدەي جۇمىس».

يۋليا بۇگىندە ەكى بالانىڭ اناسى.

ال مىنا كەلىننىڭ اتى – ماريا. ۇلتى – ورىس. جەلىدە #تاعىداپاپا حەشتەگىمەن تانىمال باقىتجاننىڭ اسىل جارى.

بۇگىندە ونىڭ جەلىدەگى پاراقشاسىندا 60 مىڭنان استام وقىرمانى بار. ولاردىڭ دەنى قازاقتار، سەبەبى ماريا – باقىتجاننىڭ اۋلەتىنىڭ عانا ەمەس، بۇكىل قازاقتىڭ كەلىنى بولىپ وتىرعان ورىستىڭ قىزى. تاربيەسى دە، ءتىلى دە، ءسوزى دە قازاق بولىپ كەتكەن ماريامەن جارى ماقتانادى. ءتىپتى ونىڭ ورىس ۇلتىنان ەكەنىن ۇمىتىپ تا كەتەدى.

ال مىنا ورىس كەلىننىڭ ەسىمى - ەكاتەرينا. ول قاراپايىم قازاقتىڭ ەمەس، كادىمگى جۇلدىزدىڭ جارى. بەلگىلى ءانشى سەيفۋللين جولبارىستىڭ ەكىنشى ايەلى. ءوزى قازاقشاعا سۋداي. الايدا بۇل تۇرعىدا ءانشىنى سىناپ-مىنەگەندەر كوپ بولدى. «قازاقتىڭ قىزىن تاپپاي قالعانى ما؟» دەپ قاپالاندى قانشا جۇرت. تەك ءانشى دە، ونىڭ جارى دا مۇنداي شابۋىلعا دايىن بولعان. ماسەلەن، ەكاتەرينا 31 ارنانىڭ «ايتا بەرسىن» باعدارلاماسىنا بەرگەن سۇحباتىندا ارالاس نەكەگە ۇركىپ قاراۋدىڭ قاجەتى جوق، بۇل قالىپتى جاعداي ەكەنىن ايتقان.

«بۇرىندارى قازاقتىڭ كوپتەگەن ۇلى ادامدارى باسقا ۇلتتان ايەل العانى وتىرىك ەمەس قوي؟

مىسالى، قونايەۆتىڭ تاتار، باۋىرجان مومىش ۇلىنىڭ ورىس ايەلى بولعانىن ءبارى بىلەدى. مۇستافا شوقاي بار، ايتا بەرسەڭ كوپ. سوندىقتان ءبىز ءبىرىنشىمىز دەپ ايتۋعا بولمايدى عوي»، - دەپ رەنجىگەن ەدى كاتيا ءوزىن سىناعاندارعا. 

مىنە، وزگە ۇلت وكىلدەرىنىڭ بۇل قىزدارى قازاقتىڭ ءتۇتىنىن تۇتەتىپ، قازاقتىڭ ۇرپاعىن تاربيەلەپ وتىر. مۇنىڭ دۇرىس-بۇرىسىن ايتىپ تالاسۋدان گورى جاي عانا باقىت تىلەي سالعان ءجون بولار. تەك ۇلى جازۋشى مۇحتار اۋەزوۆتىڭ سوفى سماتايەۆقا ايتقان مىنا اقىلى ساباق بولسىن:

«ءبىزدىڭ جاساعان قاتەلىكتەرىمىزدى قايتالاماڭدار. جوعارى وقۋ ورىندارىندا وقىپ جۇرگەنىمىزدە قازاق قىزدارى ورتالاۋ مەكتەپتى دە بىتىرمەيتىن ەدى. سودان با «تەڭ تەڭىمەن» دەگەنگە اۋلەكىلەنىپ، «قولىمىز جەتكەنىمىز» ورىس قىزىنا، ودان كەيىنگىلەرىمىز تاتارعا، باسقا ۇلت بويجەتكەندەرىنە ۇيلەندىك. ۇلتتىڭ ۇلت بولىپ ۇيىتىلۋى بەسىكتەن باستالارىنا ءمان بەرمەپپىز. ال ۇلتتىڭ ۇلىلىعىن ساقتاۋ ءۇشىن ءوز جۇرتىڭنىڭ ارۋىمەن باس قوسۋدىڭ اسا قاجەتتىگىن كەش سەزىپ، سان سوعىپ ءجۇرمىز. سەندەر ەلدەن الىستا جۇرسىڭدەر. بۇگىندە قازاعىڭنىڭ وقىعان قاراكوزدەرى جەتكىلىكتى. ءبىزدىڭ قاتەلىگىمىزدى تۇزەتۋگە تىرىسىڭدار».