باتىس قازاقستان وبلىسىنىڭ داريان اۋىلىندا جاستاردىڭ بيزنەس، شىعارماشىلىق، وقۋ باعدارلامالارى اياسىنداعى كرەاتيۆتى جوبالارىن جارىققا شىعارىپ قانا قويماي، ونى جۇزەگە اسىرۋعا مۇمكىندىك بەرەتىن كوۆوركينگ ورتالىعى اشىلدى.

زەلەنوۆ اۋدانىنىڭ ورتالىعى داريان اۋلىندا اشىلعان كوۆوركينگ ورتالىعى «شابىت»  دەپ اتالدى.

- جاستار – قوعامنىڭ قوزعاۋشى كۇشى. دەگەنمەن قازىرگى تاڭدا جاستارىمىزدىڭ كىتاپحانعا كەلۋى ازايدى. اۋىل جاستارىنىڭ يگىلىگىنە بەرىلگەلى تۇرعان كوۆوركينگ ورتالىعى دەگەنىمىز – كىتاپحاناعا ەڭبەكتەگەن بالادان ەڭكەيگەن قارياعا دەيىن ادامداردى تارتۋدىڭ جاڭا ءادىسى. سونداي-اق ورتالىق جاستاردىڭ ءوز مۇمكىندىكتەرىن تولىق پايدالانىپ، شىعارماشىلىق جانە باسقا دا قابىلەتتەرىن دامىتۋعا دا ۇلكەن سەپتىگىن تيگىزەدى. ەل بولاشاعى جاستارعا قولداۋ كورسەتۋ تۋراسىنداعى جۇمىستار ءالى دە جالعاساتىن بولادى. قازاقستانىمىز باسەكەگە قابىلەتتى ۇزدىك ەلۋ ەل قاتارىنا ەنسىن دەسەك، جاستاردى قولداۋىمىز كەرەك، – دەپ جينالعانداردى ورتالىقتىڭ اشىلۋىمەن قۇتتىقتادى. جاستارعا ۇلكەن مۇمكىندىكتەر بەرەتىن ورتالىقتىڭ اشىلۋ سالتاناتىندا رەسپۋبليكالىق پاندىك وليمپيادا جەڭىمپازى، داريان جالپى ورتا ءبىلىم بەرەتىن قازاق مەكتەبىنىڭ 11-سىنىپ وقۋشى دانيارا عالييەۆا ءسوز الىپ: – اۋىل جاستارى وسى ورتالىقتىڭ اشىلۋىن كوپتەن كۇتتى. كوۆوركينگ ورتالىعى جاستاردىڭ جان-جاقتى دامۋىنا مۇمكىندىك بەرەتىن بولادى. مۇندا جاستار ءۇشىن بارلىق جاعداي جاسالعان. وقيمىن، ىزدەنەمىن، جاڭا دوستار تابامىن دەگەن جانداردى بوس ۋاقىتىن كوۆوركينگ ورتالىعىندا وتكىزۋگە شاقىرامىن. جانە دە وسىنداي تاماشا ورىن سالىپ بەرگەن اۋدان باسشىلىعىنا ريزاشىلىعىمىز شەكسىز، – دەدى.

داريان مودەلدى بالالار كىتاپحاناسىنىڭ جانىنان اشىلعان كوۆوركينگ ورتالىعى بىرنەشە ايماققا بولىنگەن. العاشقىسى – جۇمىس ايماعى. ول جەردە كەلۋشىلەر ارنايى قويىلعان كومپيۋتەرلەرگە وتىرىپ، ەلەكتروندى ۇكىمەت پورتالىنا كىرە الادى. ەكىنشى كومپيۋتەرگە وتىرعان جان عالامتور ارقىلى وزىنە كەرەكتى اقپاراتتى الىپ قانا قويماي، الەۋمەتتىك جەلىلەرگە كىرىپ، ۋاقىت وتكىزۋگە مۇمكىندىك بار. كوۆوركينگ ورتالىعىنا كەلۋشىلەر جۇمىس ايماعىنان اۋداننىڭ تاريحى جايىندا دا دەرەك الا الادى. ول ءۇشىن ارنايى كومپيۋتەر دە قويىلعان. الداعى ۋاقىتتا ع.وتەبالييەۆ، ت.ابدراحمانوۆ، ت.كۋدرياشوۆا سياقتى جەرگىلىكتى ولكەتانۋشىلاردىڭ دا ەڭبەكتەرى سيفرلانىپ، ورتالىق قورىنا قوسىلماق. دارياندىقتاردى ۇلكەن قۋانىشقا بولەگەن ورتالىق قىزمەتكەرى ءمارزيا قونىسبايەۆا: – بولاشاقتا ءوڭىرىمىز بەن ەلىمىزدەگى باسقا كوۆوركينگ ورتالىقتارىمەن حات-حابار الماسىپ، تاجىريبەلەرىمەن ءبولىسىپ تۇراتىن بولامىز. جاستار ءۇشىن جاسالعان ورتالىقا بيزنەس-ترەنينگتەر مەن ءتۇرلى شەبەرلىك ساعاتتارى، ينتەللەكتۋالدى ويىندار مەن دەباتتار جانە اعىلشىن ءتىلىن ۇيرەتۋ كۋرستارى دا وتكىزىلەتىن بولادى. سونداي-اق ۆيدەوروليكتەردى مونتاجداۋ، فوتوونەرگە باۋلۋ مەن ديزاينەرلەردىڭ شەبەرلىك ساعاتتارىن وتكىزۋدى جوسپارلاپ قويدىق. كىشكەنتاي بۇلدىرشىندەر ءۇشىن دە ورتالىققا ءتۇرلى فيلمدەر كورىپ، قىزىقتى ويىندار وينايتىن بولادى، – دەدى زەلەنوۆ اۋدانىنىڭ اكىمى اسحات شاحاروۆ.

بۇدان بولەك «شابىت» كوۆوركينگ ورتالىعىندا ۇستەل تەننيسى،  توعىزقۇمالاق، اسىق، دراتس ويىندارىن ويناپ، كوڭىل كوتەرۋگە بولادى. تابيعاتتى سۇيەتىن جاندار بولسا، توتىقۇس پەن اكۆاريۋمداعى بالىقتاردى تاماشالاي الادى. كوۆوركينگ ورتالىعى قىزمەتكەرلەرى مەن اۋىل جاستارى ورتالىقتا ىسكە اسىرار يدەيالارىنىڭ كوپ ەكەندىگىن العا تارتادى.