ەۋروپا مەن ازيا باسشىلارى تاجىريبە الماسىپ، راديو سالاسىن دامىتۋ بويىنشا وي ءبولىسۋ ءۇشىن استانادا باس قوستى.

باس قالاداعى قازمەديا ورتالىعىندا «ازيا مەديا ديالوگى» اتتى حالىقارالىق شارا ءوتىپ جاتىر. شارادا ورتا ازياداعى راديونىڭ بۇگىنى مەن ەرتەڭى، مەديا سالاسىنداعى ورتاق ماسەلەلەر تالقىلانباق. اۋديتوريانى زەرتتەۋ، راديو فورماتىن قالىپتاستىرۋ، وزىق تاجىريبەلەردى ەسكەرىپ، تەلەراديوحابار تاراتۋ سالاسىن زامانعا لايىق دامىتۋ ماسەلەلەرىن قاۋزاۋ ءۇشىن 40 ەلدەن 150-گە جۋىق ساراپشى كەلدى. بۇل تۋرالى ق ر اقپارات جانە كوممۋنيكاسيا ءمينيسترى داۋرەن ابايەۆ ءمالىم ەتتى.

تۇركيانىڭ ترت راديوسى شىلدەنىڭ 9 كۇنى «قازاق راديولارىمەن» بەيرەسمي كەزدەسۋ وتكىزدى. كورشىلەس ەلدەگى راديو سالاسىنىڭ ماماندارى ەتنواۋىلدى كورىپ، قازاقتىڭ سالت-داستۇرىمەن كەڭىنەن تانىستى. ەتنواۋىلداعى «بايگە»، «تەڭگە ءىلۋ»، «كوكپار» سىندى ۇلتتىق ويىندارعا قاتىساتىن سالىم اتتارى مەن سايىس اتتارىن كورىپ، ءبىزدىڭ قۇندىلىققا دەگەن قىزىعۋشىلىعىمىزعا تاڭدانا قاراپ، تۇركياداعى ۇلتتىق سپورتتى قولعا الىپ، دامىتىپ جاتقانىنا 8 جىل بولعانىن ايتتى.

تۇركيا راديولارى باسقارماسىنىڭ باسشىسى احمەت اكچاكايا: «ءبىزدى «قازاق راديولارىنداعى»  الەۋمەتتىك جەلىدەگى جۇمىسى قىزىقتىرىپ وتىر. ينتەرنەتتىڭ راديو يميدجىنە بەرەر پايداسىن كورىپ، بولاشاقتا وسى سالادا مىندەتتى تۇردە تاجىريبە الماساتىنىمىزدى ايتقىمىز كەلەدى. ال، ءبىزدىڭ وسى ەلگە كەلگەن باستى ماقساتىمىز – تۇركيا راديولارى مەن «قازاق راديولارى» اراسىندا ىنتىماقتاستىق ورناتۋ»،- دەيدى.

ايتا كەتەيىك، مامىردا «قازاق راديولارى» سەرىكتەستىگىنىڭ باسشىسى ءمادي ماناتبەك ۇلى باستاعان دەلەگاسيا تۇركياعا بارىپ، مالاتيا قالاسىندا تۇركيا ەلدەرى راديو فەستيۆالىنىڭ قۇرمەتتى قوناعى بولدى. سول جەردە باستالعان دوستىق، ىنتاماقتاستىق ەلوردامىزدا ءوز جالعاسىن تاۋىپ وتىر.